''ਕੱਪੜੇ ਉਤਾਰ ਕੇ ਨੱਚ'', ਜਦੋਂ ਸੈੱਟ ''ਤੇ ਡਾਇਰੈਕਟਰ ਨੇ ਅਦਾਕਾਰਾ ਨਾਲ ਕੀਤੀ ਬਦਤਮੀਜ਼ੀ

ਮੁੰਬਈ- ਬਾਲੀਵੁੱਡ ਅਦਾਕਾਰਾ ਤਨੁਸ਼੍ਰੀ ਦੱਤਾ, ਜੋ ਆਪਣੇ ਬੇਬਾਕ ਅੰਦਾਜ਼ ਲਈ ਜਾਣੀ ਜਾਂਦੀ ਹੈ, ਇੱਕ ਵਾਰ ਫਿਰ ਸੁਰਖੀਆਂ ਵਿੱਚ ਹੈ। ਸੋਸ਼ਲ ਮੀਡੀਆ 'ਤੇ ਅਦਾਕਾਰਾ ਦਾ ਇੱਕ ਪੁਰਾਣਾ ਵੀਡੀਓ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ, ਜਿਸ ਵਿੱਚ ਉਸਨੇ ਫਿਲਮ ਦੇ ਸੈੱਟ 'ਤੇ ਇੱਕ ਨਿਰਦੇਸ਼ਕ (ਡਾਇਰੈਕਟਰ) ਵੱਲੋਂ ਕੀਤੀ ਗਈ ਬਦਸਲੂਕੀ ਦਾ ਦਰਦਨਾਕ ਕਿੱਸਾ ਸਾਂਝਾ ਕੀਤਾ ਹੈ।
"ਕੱਪੜੇ ਉਤਾਰ ਕੇ ਨੱਚ"
ਵਾਇਰਲ ਹੋ ਰਹੀ ਵੀਡੀਓ ਵਿੱਚ ਤਨੁਸ਼੍ਰੀ ਦੱਤਾ ਨੇ ਦੱਸਿਆ ਕਿ ਇੱਕ ਫਿਲਮ ਦੀ ਸ਼ੂਟਿੰਗ ਦੌਰਾਨ ਡਾਇਰੈਕਟਰ ਨੇ ਉਨ੍ਹਾਂ ਨਾਲ ਬਹੁਤ ਹੀ ਘਿਨਾਉਣੀ ਭਾਸ਼ਾ ਵਿੱਚ ਗੱਲ ਕੀਤੀ ਸੀ। ਅਦਾਕਾਰਾ ਅਨੁਸਾਰ, ਡਾਇਰੈਕਟਰ ਨੇ ਉਨ੍ਹਾਂ ਨੂੰ ਕਿਹਾ ਸੀ, "ਕੱਪੜੇ ਉਤਾਰ ਕੇ ਨੱਚ"। ਤਨੁਸ਼੍ਰੀ ਨੇ ਦੱਸਿਆ ਕਿ ਉਹ ਇੱਕ 'ਪਾਣੀ ਦੇ ਹੇਠਾਂ' ਵਾਲਾ ਡਾਂਸ ਸੀਨ ਸੀ ਅਤੇ ਉਨ੍ਹਾਂ ਨੇ ਜੋ ਕੱਪੜੇ ਪਾਏ ਹੋਏ ਸਨ, ਉਹ ਪਹਿਲਾਂ ਹੀ ਕਾਫੀ ਐਕਸਪੋਜ਼ਰ ਵਾਲੇ ਸਨ। ਉਨ੍ਹਾਂ ਕਿਹਾ ਕਿ ਕਿਸੇ ਪ੍ਰੋਫੈਸ਼ਨਲ ਜਾਂ 'ਮਿਸ ਇੰਡੀਆ' ਰਹਿ ਚੁੱਕੀ ਲੜਕੀ ਨਾਲ ਗੱਲ ਕਰਨ ਦਾ ਇਹ ਕੋਈ ਤਰੀਕਾ ਨਹੀਂ ਹੈ।

ਸੈੱਟ 'ਤੇ ਮਿਲਿਆ ਸਾਥੀਆਂ ਦਾ ਸਮਰਥਨ
ਅਦਾਕਾਰਾ ਨੇ ਦੱਸਿਆ ਕਿ ਜਦੋਂ ਡਾਇਰੈਕਟਰ ਨੇ ਇਹ ਸ਼ਬਦ ਕਹੇ, ਤਾਂ ਉਨ੍ਹਾਂ ਨੂੰ ਬਹੁਤ ਬੁਰਾ ਲੱਗਾ। ਉਨ੍ਹਾਂ ਦਿਨਾਂ ਵਿੱਚ ਉਹ ਕਾਫੀ ਸ਼ਾਂਤ ਸੁਭਾਅ ਦੀ ਸੀ, ਇਸ ਲਈ ਉਸ ਵੇਲੇ ਉਹ ਚੁੱਪ ਰਹੀ ਪਰ ਡਾਇਰੈਕਟਰ ਨੂੰ ਸਖ਼ਤ ਨਜ਼ਰਾਂ ਨਾਲ ਦੇਖਿਆ। ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਸੈੱਟ 'ਤੇ ਮੌਜੂਦ ਹੋਰ ਕਲਾਕਾਰਾਂ ਨੂੰ ਵੀ ਇਹ ਗੱਲ ਬਹੁਤ ਬੁਰੀ ਲੱਗੀ ਅਤੇ ਉਨ੍ਹਾਂ ਨੇ ਤਨੁਸ਼੍ਰੀ ਦਾ ਸਮਰਥਨ ਕੀਤਾ, ਜਿਸ ਕਾਰਨ ਉਹ ਡਾਇਰੈਕਟਰ ਚੁੱਪ ਹੋ ਗਿਆ।
ਡਾਇਰੈਕਟਰ ਨੇ ਖ਼ੁਦ ਹੀ ਖੋਲ੍ਹ ਦਿੱਤੀ ਪੋਲ
ਖ਼ਾਸ ਗੱਲ ਇਹ ਰਹੀ ਕਿ ਤਨੁਸ਼੍ਰੀ ਨੇ ਮੀਡੀਆ ਵਿੱਚ ਗੱਲ ਕਰਦਿਆਂ ਉਸ ਡਾਇਰੈਕਟਰ ਦਾ ਨਾਮ ਵੀ ਨਹੀਂ ਲਿਆ ਸੀ। ਪਰ ਜਿਵੇਂ ਹੀ ਇਹ ਗੱਲ ਬਾਹਰ ਆਈ, ਉਹ ਡਾਇਰੈਕਟਰ ਖ਼ੁਦ ਹੀ ਸਫ਼ਾਈਆਂ ਦੇਣ ਲੱਗ ਪਿਆ ਅਤੇ ਅੱਜ ਤੱਕ ਇਸ ਬਾਰੇ ਇੰਟਰਵਿਊ ਦੇ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ ਤਨੁਸ਼੍ਰੀ ਨੇ 'ਆਸ਼ਿਕ ਬਣਾਇਆ ਆਪਨੇ', 'ਚਾਕਲੇਟ', 'ਭਾਗਮ ਭਾਗ' ਅਤੇ 'ਢੋਲ' ਵਰਗੀਆਂ ਕਈ ਸੁਪਰਹਿੱਟ ਫਿਲਮਾਂ ਵਿੱਚ ਕੰਮ ਕੀਤਾ ਹੈ।