ਚੋਰੀ ਦਾ ਸਾਮਾਨ ਖਰੀਦਣ ਵਾਲਾ ਪੁਲਸ ਹਿਰਾਸਤ ''ਚੋਂ ਝਕਾਨੀ ਦੇ ਕੇ ਹੋਇਆ ਨੌ ਦੋ ਗਿਆਰਾਂ
08/14/2019 5:27:37 PM
ਲੋਹੀਆਂ ਖਾਸ (ਮਨਜੀਤ)— ਲੋਹੀਆਂ ਥਾਣੇ ਦੇ ਪੁਲਸ ਮੁਲਾਜ਼ਮਾਂ ਕੋਲੋਂ ਬੀਤੇ ਦਿਨ ਇਕ ਕਾਬੂ ਕੀਤਾ ਨੌਜਵਾਨ ਝਕਾਨੀ ਦੇ ਕੇ ਨੌ ਦੋ ਗਿਆਰਾਂ ਹੋ ਗਿਆ। ਜਾਣਕਾਰੀ ਮੁਤਾਬਕ ਪਿੰਡ ਯੂਸਫਪੁਰ ਦਾਰੇਵਾਲ ਦੇ ਸਰਕਾਰੀ ਪ੍ਰਾਇਮਰੀ ਸਕੂਲ 'ਚ 2 ਵਾਰ ਚੋਰ ਚੋਰੀ ਦੀ ਵਾਰਦਾਤ ਨੂੰ ਅੰਜਾਮ ਦੇ ਕੇ ਮਿਡ-ਡੇਅ-ਮੀਲ ਦੇ ਭਾਂਡੇ ਤੇ ਗੈਸ ਸਿਲੰਡਰ ਸਮੇਤ ਹੋਰ ਸਾਮਾਨ ਚੋਰੀ ਕਰਕੇ ਲੈ ਗਿਆ। ਚੋਰ ਨੇ ਚੋਰੀ ਕੀਤਾ ਸਿਲੰਡਰ ਪਿੰਡ ਦੇ ਹੀ ਇਕ ਵਿਅਕਤੀ ਨੂੰ ਵੇਚ ਦਿੱਤਾ, ਜਿਸ ਦੀ ਖਬਰ ਲੋਹੀਆਂ ਪੁਲਸ ਨੂੰ ਮਿਲੀ ਤਾਂ 2 ਪੁਲਸ ਮੁਲਾਜ਼ਮ ਚੋਰੀ ਦੇ ਸਾਮਾਨ ਖਰੀਦਣ ਵਾਲੇ ਵਿਅਕਤੀ ਨੂੰ ਕਾਬੂ ਕਰਨ ਪਿੰਡ ਪਹੁੰਚ ਗਏ ਤੇ ਕਾਬੂ ਕਰ ਕੇ ਗੱਡੀ 'ਚ ਬਿਠਾ ਕੇ ਲੋਹੀਆਂ ਵੱਲ ਨੂੰ ਤੁਰ ਪਏ।
ਰਸਤੇ 'ਚ ਪੈਂਦੇ ਇਕ ਪੈਟਰੋਲ ਪੰਪ 'ਤੇ ਜਦੋਂ ਪੁਲਸ ਮੁਲਾਜ਼ਮਾਂ ਨੇ ਤੇਲ ਪਵਾਉਣ ਲਈ ਗੱਡੀ ਰੋਕੀ ਤਾਂ ਕਾਬੂ ਕੀਤਾ ਵਿਅਕਤੀ ਪੁਲਸ ਨੂੰ ਝਕਾਨੀ ਦੇ ਕੇ ਫਰਾਰ ਹੋ ਗਿਆ ਤਾਂ ਪੁਲਸ ਮੁਲਾਜ਼ਮਾਂ ਨੂੰ ਭਾਜੜਾਂ ਪੈ ਗਈਆਂ ਮੁਲਜ਼ਮ ਦੀ ਭਾਲ 'ਚ ਇੱਧਰ-ਉੱਧਰ ਦੌੜਨ ਲੱਗੇ ਇੱਥੋਂ ਤੱਕ ਕਿ ਝੋਨੇ ਵਾਲੇ ਖੇਤਾਂ 'ਚ ਵੀ ਮੁਲਜ਼ਮ ਦੀ ਭਾਲ ਕੀਤੀ ਪਰ ਮੁਲਜ਼ਮ ਨਹੀਂ ਮਿਲਿਆ। ਮੌਕੇ 'ਤੇ ਇਕੱਠੇ ਹੋਏ ਲੋਕਾਂ ਨੇ ਪੁਲਸ 'ਤੇ ਦੋਸ਼ ਲਾਉਂਦੇ ਹੋਏ ਕਿਹਾ ਕਿ ਮੁਲਜ਼ਮ ਪੁਲਸ ਦੀ ਮਿਲੀਭੁਗਤ ਨਾਲ ਹੀ ਫਰਾਰ ਹੋ ਸਕਦਾ ਹੈ। ਇਸ ਬਾਰੇ ਥਾਣਾ ਮੁਖੀ ਨੇ ਦੱਸਿਆ ਕਿ ਪੁਲਸ ਮੁਲਜ਼ਮ ਨੂੰ ਜਲਦ ਕਾਬੂ ਕਰ ਲਵੇਗੀ। ਜਦਕਿ ਖਬਰ ਲਿਖੇ ਜਾਣ ਤੱਕ ਮੁਲਜ਼ਮ ਪੁਲਸ ਹਿਰਾਸਤ 'ਚੋਂ ਬਾਹਰ ਹੀ ਸੀ।
