ਪਿਛਲੇ ਵਿੱਤੀ ਸਾਲ ''ਚ ਰਿਕਾਰਡ ਪੱਧਰ ''ਤੇ ਪਹੁੰਚੀ ਮਾਰੂਤੀ ਸੁਜ਼ੂਕੀ, ਹੁੰਡਈ, ਟਾਟਾ ਮੋਟਰਜ਼ ਦੀ ਥੋਕ ਵਿਕਰੀ

ਮੁੰਬਈ - ਪ੍ਰਮੁੱਖ ਵਾਹਨ ਨਿਰਮਾਤਾ ਕੰਪਨੀਆਂ - ਮਾਰੂਤੀ ਸੁਜ਼ੂਕੀ, ਹੁੰਡਈ ਅਤੇ ਟਾਟਾ ਮੋਟਰਜ਼ ਨੇ ਵਿੱਤੀ ਸਾਲ 2022-23 ਵਿੱਚ ਆਪਣੀ ਹੁਣ ਤੱਕ ਦੀ ਸਭ ਤੋਂ ਵਧੀਆ ਘਰੇਲੂ ਥੋਕ ਵਿਕਰੀ ਦਰਜ ਕੀਤੀ ਹੈ। ਇਸ ਦੇ ਨਾਲ ਹੀ ਘਰੇਲੂ ਯਾਤਰੀ ਵਾਹਨ ਉਦਯੋਗ ਨੂੰ ਵਧੀਆ ਕਾਰਗੁਜ਼ਾਰੀ ਦਾ ਲਾਭ ਮਿਲਿਆ ਹੈ। ਦੇਸ਼ ਦੀ ਸਭ ਤੋਂ ਵੱਡੀ ਕਾਰ ਨਿਰਮਾਤਾ ਕੰਪਨੀ ਮਾਰੂਤੀ ਸੁਜ਼ੂਕੀ ਇੰਡੀਆ ਨੇ 2022-23 ਵਿੱਚ 19 ਫੀਸਦੀ ਦੇ ਵਾਧੇ ਨਾਲ ਹੁਣ ਤੱਕ ਦੀ ਸਭ ਤੋਂ ਵੱਧ 19,66,164 ਇਕਾਈਆਂ ਦੀ ਵਿਕਰੀ ਦਰਜ ਕੀਤੀ, ਜਦੋਂ ਕਿ ਵਿੱਤੀ ਸਾਲ 2021-22 ਵਿੱਚ ਇਹ ਅੰਕੜਾ 16,52,653 ਇਕਾਈ ਸੀ। ਮਾਰੂਤੀ ਨੇ ਖ਼ਤਮ ਵਿੱਤੀ ਸਾਲ ਵਿਚ ਘਰੇਲੂ ਬਾਜ਼ਾਰ ਵਿਚ 17,06,831 ਇਕਾਈਆਂ ਦੀ ਥੋਕ ਸਪਲਾਈ ਕੀਤੀ ਜਿਹੜੀ 2021-22 ਵਿਚ 14,14,277 ਇਕਾਈ ਦੇ ਅੰਕੜੇ ਨਾਲ 21 ਫ਼ੀਸਦੀ ਜ਼ਿਆਦਾ ਹੈ। 

ਹੁੰਡਈ ਮੋਟਰ ਇੰਡੀਆ ਨੇ ਕਿਹਾ ਕਿ ਵਿੱਤੀ ਸਾਲ 2022-23 ਵਿੱਚ ਉਸਦੀ ਕੁੱਲ ਵਿਕਰੀ 7,20,565 ਯੂਨਿਟ ਰਹੀ, ਜੋ ਕਿ 2021-22 ਵਿੱਚ 6,10,760 ਯੂਨਿਟਾਂ ਨਾਲੋਂ 18 ਪ੍ਰਤੀਸ਼ਤ ਵੱਧ ਹੈ। ਕੰਪਨੀ ਮੁਤਾਬਕ ਭਾਰਤ 'ਚ ਕੰਮ ਸ਼ੁਰੂ ਕਰਨ ਤੋਂ ਬਾਅਦ ਇਕ ਵਿੱਤੀ ਸਾਲ 'ਚ ਇਹ ਉਸ ਦੀ ਸਭ ਤੋਂ ਜ਼ਿਆਦਾ ਵਿਕਰੀ ਦਾ ਅੰਕੜਾ ਹੈ। ਕੰਪਨੀ ਨੇ 2022-23 ਵਿੱਚ ਘਰੇਲੂ ਤੌਰ 'ਤੇ ਵਿਕਰੇਤਾਵਾਂ ਨੂੰ 5,67,546 ਯੂਨਿਟ ਭੇਜੇ, ਜੋ ਕਿ 2021-22 ਵਿੱਚ ਭੇਜੇ ਗਏ 4,81,500 ਯੂਨਿਟਾਂ ਤੋਂ 18 ਪ੍ਰਤੀਸ਼ਤ ਵੱਧ ਹਨ।

ਇਹ ਵੀ ਪੜ੍ਹੋ : ਅੱਜ ਤੋਂ ਬਦਲਣ ਵਾਲੇ ਹਨ ਆਮਦਨ ਟੈਕਸ ਸਮੇਤ ਕਈ ਅਹਿਮ ਨਿਯਮ, ਹਰ ਨਾਗਰਿਕ ਨੂੰ ਕਰਨਗੇ ਪ੍ਰਭਾਵਿਤ

ਵਿੱਤੀ ਸਾਲ 2022-23 ਦੌਰਾਨ ਟਾਟਾ ਮੋਟਰਜ਼ ਦੀ ਕੁੱਲ ਘਰੇਲੂ ਵਿਕਰੀ 9,31,957 ਯੂਨਿਟ ਰਹੀ, ਜੋ ਕਿ ਵਿੱਤੀ ਸਾਲ 2021-22 ਦੇ 6,92,554 ਯੂਨਿਟਾਂ ਦੇ ਮੁਕਾਬਲੇ 35 ਫੀਸਦੀ ਵੱਧ ਹੈ। ਟਾਟਾ ਮੋਟਰਜ਼ ਦੇ ਯਾਤਰੀ ਵਾਹਨਾਂ ਦੀ ਵਿਕਰੀ ਇਸ ਵਿੱਤੀ ਸਾਲ 'ਚ 3,70,372 ਇਕਾਈਆਂ ਤੋਂ 45 ਫੀਸਦੀ ਵਧ ਕੇ 5,38,640 ਇਕਾਈਆਂ 'ਤੇ ਪਹੁੰਚ ਗਈ। ਕਿਆ ਇੰਡੀਆ ਨੇ ਵਿੱਤੀ ਸਾਲ 2022-23 ਵਿੱਚ 2,69,229 ਯੂਨਿਟਸ ਵੇਚੇ, ਜੋ ਕਿ 44 ਫੀਸਦੀ ਵੱਧ ਹੈ, ਜਦੋਂ ਕਿ 2021-22 ਵਿੱਚ ਕੰਪਨੀ ਨੇ 1,86,787 ਯੂਨਿਟਸ ਵੇਚੇ। ਜਨਵਰੀ-ਮਾਰਚ 2023 ਤਿਮਾਹੀ 'ਚ ਕੰਪਨੀ ਦੀ ਵਾਹਨ ਉਦਯੋਗ ਖ਼ੇਤਰ ਵਿਚ ਹੁਣ ਤੱਕ ਦੀ ਸਭ ਤੋਂ ਵਧ 7.4 ਫ਼ੀਸਦੀ ਹਿੱਸੇਦਾਰੀ ਰਹੀ।

ਵਿੱਤੀ ਸਾਲ 2022-23 ਵਿੱਚ ਟੋਇਟਾ ਕਿਰਲੋਸਕਰ ਮੋਟਰ ਦੀ ਥੋਕ ਵਿਕਰੀ ਵਿੱਤੀ ਸਾਲ 2021-22 ਵਿੱਚ 1,23,770 ਯੂਨਿਟਾਂ ਦੇ ਮੁਕਾਬਲੇ 41 ਪ੍ਰਤੀਸ਼ਤ ਦੇ ਵਾਧੇ ਨਾਲ 1,74,015 ਯੂਨਿਟ ਰਹੀ।

ਹੌਂਡਾ ਕਾਰਸ ਇੰਡੀਆ ਦੀ 2022-23 ਵਿਚ ਘਰੇਲੂ ਬਾਜ਼ਾਰ ਵਿਚ ਥੋਕ ਵਿਕਰੀ 7 ਫ਼ੀਸਦੀ ਦੇ ਵਾਧੇ ਨਾਲ 91,418 ਇਕਾਈ ਰਹੀ, ਜਦੋਂਕਿ 2021-22 ਵਿਚ ਇਹ 85,609 ਰਹੀ ਸੀ। ਕੰਪਨੀ ਨੇ 2022-23 ਵਿਚ 17 ਫ਼ੀਸਦੀ ਦੇ ਵਾਧੇ ਨਾਲ 22,722 ਇਕਾਈਆਂ ਦਾ ਨਿਰਯਾਤ ਕੀਤਾ ਜਦੋਂਕਿ 2021-22 ਵਿਚ ਇਹ ਅੰਕੜਾ 18,401 ਸੀ। 

ਇਹ ਵੀ ਪੜ੍ਹੋ : ਜਾਣੋ ਅੱਜ ਤੋਂ ਕੀ ਹੋਵੇਗਾ ਮਹਿੰਗਾ ਅਤੇ ਕੀ ਹੋਵੇਗਾ ਸਸਤਾ, ਦੇਖੋ ਸੂਚੀ

ਦੇਸ਼ ਦੀ ਪ੍ਰਮੁੱਖ ਦੋਪਹੀਆ ਵਾਹਨ ਨਿਰਮਾਤਾ ਕੰਪਨੀ ਹੀਰੋ ਮੋਟੋਕਾਰਪ ਨੇ ਵਿੱਤੀ ਸਾਲ 2022-23 ਦੌਰਾਨ ਘਰੇਲੂ ਬਾਜ਼ਾਰ ਵਿੱਚ 51.55 ਲੱਖ ਤੋਂ ਵੱਧ ਯੂਨਿਟ ਵੇਚੇ, ਜੋ ਕਿ ਇੱਕ ਸਾਲ ਪਹਿਲਾਂ 46.43 ਲੱਖ ਵਾਹਨਾਂ ਦੇ ਮੁਕਾਬਲੇ 11 ਪ੍ਰਤੀਸ਼ਤ ਵੱਧ ਹਨ। ਹਾਲਾਂਕਿ ਇਸ ਦੌਰਾਨ ਇਸ ਦਾ ਨਿਰਯਾਤ 3.0 ਲੱਖ ਵਾਹਨਾਂ ਤੋਂ ਘਟ ਕੇ 1.72 ਲੱਖ ਯੂਨਿਟ ਰਹਿ ਗਿਆ।

ਟੀਵੀਐਸ ਮੋਟਰ ਕੰਪਨੀ ਨੇ ਮਾਰਚ ਵਿੱਚ ਪੰਜ ਫੀਸਦੀ ਵਾਧੇ ਨਾਲ 3,07,559 ਦੋਪਹੀਆ ਵਾਹਨ ਵੇਚੇ, ਜਦੋਂ ਕਿ ਮਾਰਚ 2022 ਵਿੱਚ 2,92,918 ਦੋਪਹੀਆ ਵਾਹਨ ਵੇਚੇ ਗਏ। ਇਸ ਸਮੇਂ ਦੌਰਾਨ ਇਸ ਦੀ ਘਰੇਲੂ ਵਿਕਰੀ 22 ਫੀਸਦੀ ਦੇ ਵਾਧੇ ਨਾਲ 2,40,780 ਯੂਨਿਟ ਰਹੀ।

ਮੋਟਰਸਾਈਕਲ ਨਿਰਮਾਤਾ ਕੰਪਨੀ ਰਾਇਲ ਐਨਫੀਲਡ ਨੇ ਮਾਰਚ 'ਚ 72,235 ਇਕਾਈਆਂ ਦੀ ਵਿਕਰੀ ਕੀਤੀ, ਜੋ ਪਿਛਲੇ ਸਾਲ ਮਾਰਚ 'ਚ 67,677 ਇਕਾਈਆਂ ਦੇ ਮੁਕਾਬਲੇ ਸੱਤ ਫੀਸਦੀ ਵੱਧ ਹੈ। ਸਮੀਖਿਆ ਅਧੀਨ ਮਹੀਨੇ ਦੌਰਾਨ ਇਸਦੀ ਘਰੇਲੂ ਵਿਕਰੀ 59,884 ਇਕਾਈ ਰਹੀ, ਜੋ ਕਿ ਦੋ ਫੀਸਦੀ ਦੀ ਵਾਧਾ ਦਰ ਨਾਲ ਹੈ।

ਇਹ ਵੀ ਪੜ੍ਹੋ : ਭਾਰਤ, ਇੰਡੋਨੇਸ਼ੀਆ ਅਗਲੇ ਪੰਜ ਸਾਲ ਤੱਕ ਹੋਣਗੇ ਸਭ ਤੋਂ ਤੇਜ਼ੀ ਨਾਲ ਅੱਗੇ ਵਧਣ ਵਾਲੇ ਦੇਸ਼

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।