ਗੁਆਂਢੀ ਮੁਲਕ ਨੂੰ ਲੱਗਾ ਵੱਡਾ ਝਟਕਾ! ਭਾਰਤ ਦੀ ਇਸ ਕੰਪਨੀ ਨੇ ਬੰਗਲਾਦੇਸ਼ ਦੀ ਬੱਤੀ ਕੀਤੀ ਗੁੱਲ

ਨਵੀਂ ਦਿੱਲੀ - ਅਡਾਨੀ ਪਾਵਰ ਦੀ ਸਹਾਇਕ ਕੰਪਨੀ ਅਡਾਨੀ ਪਾਵਰ ਝਾਰਖੰਡ ਲਿਮਿਟੇਡ (APJL) ਨੇ 84.6 ਕਰੋੜ ਡਾਲਰ ਦੇ ਬਕਾਇਆ ਬਿੱਲ ਕਾਰਨ ਬੰਗਲਾਦੇਸ਼ ਨੂੰ ਆਪਣੀ ਬਿਜਲੀ ਸਪਲਾਈ ਅੱਧੀ ਕਰ ਦਿੱਤੀ ਹੈ। ਇਕ ਖਬਰ ਮੁਤਾਬਕ ਪਾਵਰ ਗਰਿੱਡ ਬੰਗਲਾਦੇਸ਼ PLC ਦੇ ਅੰਕੜਿਆਂ ਤੋਂ ਪਤਾ ਚੱਲਦਾ ਹੈ ਕਿ ਅਡਾਨੀ ਗਰੁੱਪ ਦੇ ਪਾਵਰ ਪਲਾਂਟ ਨੇ ਵੀਰਵਾਰ ਰਾਤ ਤੋਂ ਸਪਲਾਈ ਘਟਾ ਦਿੱਤੀ ਸੀ। ਮੀਡੀਆ ਰਿਪੋਰਟਾਂ ਅਨੁਸਾਰ, ਬੰਗਲਾਦੇਸ਼ ਵਿੱਚ ਵੀਰਵਾਰ ਅਤੇ ਸ਼ੁੱਕਰਵਾਰ ਦੀ ਦਰਮਿਆਨੀ ਰਾਤ ਵਿੱਚ 1600 ਮੈਗਾਵਾਟ ਤੋਂ ਵੱਧ ਦੀ ਬਿਜਲੀ ਦੀ ਕਮੀ ਦਰਜ ਕੀਤੀ ਗਈ। ਇਸ ਦਾ ਕਾਰਨ ਲਗਭਗ 1496 ਮੈਗਾਵਾਟ ਦੀ ਸਮਰੱਥਾ ਵਾਲਾ ਪਲਾਂਟ ਹੁਣ ਇਕ ਯੂਨਿਟ ਤੋਂ ਸਿਰਫ਼ 700 ਮੈਗਾਵਾਟ ਬਿਜਲੀ ਪੈਦਾ ਕਰ ਰਿਹਾ ਹੈ।

ਅਡਾਨੀ ਪਾਵਰ ਨੇ 27 ਅਕਤੂਬਰ ਨੂੰ ਲਿਖਿਆ ਸੀ ਪੱਤਰ 

ਇਸ ਤੋਂ ਪਹਿਲਾਂ ਅਡਾਨੀ ਪਾਵਰ ਨੇ ਬੰਗਲਾਦੇਸ਼ ਦੇ ਊਰਜਾ ਸਕੱਤਰ ਨੂੰ ਪੱਤਰ ਲਿਖ ਕੇ ਬੇਨਤੀ ਕੀਤੀ ਸੀ ਕਿ ਬੰਗਲਾਦੇਸ਼ ਪਾਵਰ ਡਿਵੈਲਪਮੈਂਟ ਬੋਰਡ (ਪੀਡੀਬੀ) ਨੂੰ 30 ਅਕਤੂਬਰ ਤੱਕ ਬਕਾਇਆ ਰਾਸ਼ੀ ਦਾ ਭੁਗਤਾਨ ਕਰਨ ਲਈ ਕਿਹਾ ਜਾਵੇ। ਅਡਾਨੀ ਗਰੁੱਪ ਦੀ ਕੰਪਨੀ ਨੇ 27 ਅਕਤੂਬਰ ਨੂੰ ਲਿਖੇ ਪੱਤਰ ਵਿੱਚ ਕਿਹਾ ਸੀ ਕਿ ਜੇਕਰ ਬਕਾਇਆ ਬਿੱਲਾਂ ਦਾ ਭੁਗਤਾਨ ਨਾ ਕੀਤਾ ਗਿਆ ਤਾਂ ਕੰਪਨੀ 31 ਅਕਤੂਬਰ ਨੂੰ ਬਿਜਲੀ ਸਪਲਾਈ ਮੁਅੱਤਲ ਕਰਕੇ ਪਾਵਰ ਪਰਚੇਜ਼ ਐਗਰੀਮੈਂਟ (ਪੀਪੀਏ) ਤਹਿਤ ਜ਼ਰੂਰੀ ਕਦਮ ਚੁੱਕਣ ਲਈ ਮਜਬੂਰ ਹੋਵੇਗੀ।

17 ਕਰੋੜ ਡਾਲਰ ਦਾ ਕਰਜ਼ਾ ਵਾਪਸ ਕਰਨ ਤੋਂ ਮੁਕਰਿਆ ਬੰਗਲਾਦੇਸ਼ 

ਅਡਾਨੀ ਪਾਵਰ ਨੇ ਕਿਹਾ ਕਿ ਪੀਡੀਬੀ ਨੇ ਨਾ ਤਾਂ ਬੰਗਲਾਦੇਸ਼ ਐਗਰੀਕਲਚਰਲ ਬੈਂਕ ਤੋਂ 17 ਕਰੋੜ ਡਾਲਰ ਦੇ ਕਰਜ਼ੇ ਦੀ ਸਹੂਲਤ ਪ੍ਰਦਾਨ ਕੀਤੀ ਹੈ ਅਤੇ ਨਾ ਹੀ 84.6 ਕਰੋੜ ਡਾਲਰ ਦੀ ਬਕਾਇਆ ਰਕਮ ਦਾ ਭੁਗਤਾਨ ਕੀਤਾ ਹੈ। ਡੇਲੀ ਸਟਾਰ ਨੇ ਪੀਡੀਬੀ ਦੇ ਇੱਕ ਅਧਿਕਾਰੀ ਦੇ ਹਵਾਲੇ ਨਾਲ ਕਿਹਾ ਕਿ ਬਕਾਏ ਦਾ ਇੱਕ ਹਿੱਸਾ ਪਹਿਲਾਂ ਹੀ ਅਦਾ ਕੀਤਾ ਜਾ ਚੁੱਕਾ ਹੈ ਪਰ ਜੁਲਾਈ ਤੋਂ, ਏਪੀਜੇਐਲ ਪਿਛਲੇ ਮਹੀਨਿਆਂ ਦੇ ਮੁਕਾਬਲੇ ਵੱਧ ਵਸੂਲੀ ਕਰ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪੀਡੀਬੀ ਹਰ ਹਫ਼ਤੇ ਲਗਭਗ 1.8 ਕਰੋੜ ਡਾਲਰ ਦਾ ਭੁਗਤਾਨ ਕਰ ਰਿਹਾ ਹੈ, ਜਦੋਂ ਕਿ ਚਾਰਜ 2.2 ਕਰੋੜ ਡਾਲਰ ਤੋਂ ਵੱਧ ਹਨ, ਜਿਸ ਕਾਰਨ ਬਕਾਇਆ ਵਧ ਗਿਆ ਹੈ।

ਸਮਝੌਤੇ ਦੇ 1 ਸਾਲ ਪੂਰੇ ਹੋਣ 'ਤੇ ਕੰਪਨੀ ਨੇ ਕੀਮਤਾਂ ਵਧਾ ਦਿੱਤੀਆਂ ਹਨ

ਵਾਧੂ ਭੁਗਤਾਨ ਬਾਰੇ, ਇਸ ਅਧਿਕਾਰੀ ਨੇ ਕਿਹਾ ਕਿ ਜਦੋਂ ਪੀਡੀਬੀ ਨੇ ਪਿਛਲੇ ਸਾਲ ਫਰਵਰੀ ਵਿੱਚ ਕੋਲੇ ਦੀ ਕੀਮਤ ਬਾਰੇ ਸਵਾਲ ਉਠਾਏ ਸਨ, ਤਾਂ ਇੱਕ ਪੂਰਕ ਸਮਝੌਤਾ ਕੀਤਾ ਗਿਆ ਸੀ। ਇਸ ਵਿੱਚ ਅਡਾਨੀ ਗਰੁੱਪ ਦੀ ਕੰਪਨੀ ਨੂੰ ਹੋਰ ਕੋਲਾ ਆਧਾਰਿਤ ਪਾਵਰ ਪਲਾਂਟਾਂ ਵੱਲੋਂ ਵਸੂਲੇ ਜਾਣ ਵਾਲੇ ਰੇਟਾਂ ਨਾਲੋਂ ਘੱਟ ਕੀਮਤ ਰੱਖਣ ਲਈ ਮਜਬੂਰ ਕੀਤਾ ਗਿਆ ਸੀ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਇੱਕ ਸਾਲ ਦੀ ਸਪਲੀਮੈਂਟਰੀ ਡੀਲ ਦੀ ਮਿਆਦ ਪੂਰੀ ਹੋਣ ਤੋਂ ਬਾਅਦ, ਅਡਾਨੀ ਪਾਵਰ ਨੇ ਪੀਪੀਏ ਦੇ ਅਨੁਸਾਰ ਦੁਬਾਰਾ ਚਾਰਜ ਕਰਨਾ ਸ਼ੁਰੂ ਕਰ ਦਿੱਤਾ ਹੈ।