185 ਭਾਰਤੀਆਂ ਦੀ ਦੌਲਤ GDP ਦਾ ਇੱਕ ਤਿਹਾਈ, ਚੋਟੀ ਦੇ 10 ''ਚ ਹੈ ਸਿਰਫ਼ ਇੱਕ ਔਰਤ
Tuesday, Sep 03, 2024 - 06:11 PM (IST)
ਨਵੀਂ ਦਿੱਲੀ - ਭਾਰਤ ਦੇ ਸਭ ਤੋਂ ਅਮੀਰ ਲੋਕਾਂ ਦੀ ਕੁੱਲ ਦੌਲਤ 1 ਟ੍ਰਿਲੀਅਨ ਡਾਲਰ ਨੂੰ ਪਾਰ ਕਰ ਗਈ ਹੈ ਅਤੇ 1.19 ਟ੍ਰਿਲੀਅਨ ਡਾਲਰ (ਲਗਭਗ 99.86 ਲੱਖ ਕਰੋੜ ਰੁਪਏ) ਹੋ ਗਈ ਹੈ। ਸੋਮਵਾਰ ਨੂੰ ਜਾਰੀ ਫਾਰਚਿਊਨ ਇੰਡੀਆ ਦੀ ਰਿਪੋਰਟ 'ਚ ਇਹ ਖੁਲਾਸਾ ਹੋਇਆ ਹੈ।
ਸੂਚੀ 'ਚ 185 ਲੋਕਾਂ ਨੂੰ 'ਡਾਲਰ ਅਰਬਪਤੀ' ਦਾ ਦਰਜਾ ਦਿੱਤਾ ਗਿਆ ਹੈ, ਯਾਨੀ ਉਨ੍ਹਾਂ ਕੋਲ ਘੱਟੋ-ਘੱਟ 1 ਅਰਬ ਡਾਲਰ ਦੀ ਜਾਇਦਾਦ ਹੈ।
ਫਾਰਚਿਊਨ ਇੰਡੀਆ ਵਾਟਰਫੀਲਡ ਐਡਵਾਈਜ਼ਰਜ਼ 2024 ਰੈਂਕਿੰਗ ਅਨੁਸਾਰ, ਭਾਰਤ ਦੇ ਅਰਬਪਤੀਆਂ ਦੀ ਕੁੱਲ ਸੰਪਤੀ 2022 ਤੱਕ 832 ਬਿਲੀਅਨ ਡਾਲਰ ਤੋਂ 50 ਪ੍ਰਤੀਸ਼ਤ ਵੱਧ ਗਈ ਹੈ। ਉਸ ਸਮੇਂ ਭਾਰਤ ਵਿਚ ਡਾਲਰ ਅਰਬਪਤੀਆਂ ਦੀ ਸੰਖਿਆ 142 ਸੀ।
ਸੰਸਾਰਕ ਚੁਣੌਤੀਆਂ ਦੇ ਬਾਵਜੂਦ ਵਧੀ ਦੌਲਤ
ਰਿਪੋਰਟ ਵਿੱਚ ਕਿਹਾ ਗਿਆ ਹੈ, "ਇਹ ਵਿਸ਼ਵ ਆਰਥਿਕ ਚੁਣੌਤੀਆਂ ਅਤੇ ਡਾਲਰ ਦੇ ਮੁਕਾਬਲੇ ਰੁਪਏ ਵਿੱਚ 5 ਪ੍ਰਤੀਸ਼ਤ ਦੀ ਗਿਰਾਵਟ ਦੇ ਬਾਵਜੂਦ ਦੌਲਤ ਵਿੱਚ ਮਹੱਤਵਪੂਰਨ ਵਾਧਾ ਦਰਸਾਉਂਦਾ ਹੈ।"
ਭਾਰਤ ਦੇ ਅਰਬਪਤੀਆਂ ਦੀ ਕੁੱਲ ਦੌਲਤ ਹੁਣ ਭਾਰਤ ਦੇ ਨਾਮਾਤਰ ਕੁੱਲ ਘਰੇਲੂ ਉਤਪਾਦ (ਜੀਡੀਪੀ) ਦੇ 33.81 ਪ੍ਰਤੀਸ਼ਤ ਦੇ ਬਰਾਬਰ ਹੋ ਗਈ ਹੈ।
ਡਾਲਰ ਦੇ ਅਰਬਪਤੀਆਂ ਦੀ ਸੂਚੀ ਵਿੱਚ 29 ਨਵੇਂ ਲੋਕ ਸ਼ਾਮਲ
ਇਸ ਸਾਲ, ਫਾਸਟ-ਮੂਵਿੰਗ ਕੰਜ਼ਿਊਮਰ ਗੁਡਜ਼ (FMCG), ਫਾਰਮਾਸਿਊਟੀਕਲ ਅਤੇ ਟੈਕਨਾਲੋਜੀ ਸਮੇਤ ਵੱਖ-ਵੱਖ ਖੇਤਰਾਂ ਦੇ 29 ਨਵੇਂ ਅਰਬਪਤੀਆਂ ਡਾਲਰ ਅਰਬਪਤੀਆਂ ਦੀ ਸੂਚੀ ਵਿੱਚ ਸ਼ਾਮਲ ਹੋਏ ਜਿਨ੍ਹਾਂ ਨੇ ਸਮੂਹਿਕ ਤੌਰ 'ਤੇ 4.09 ਲੱਖ ਕਰੋੜ ਰੁਪਏ ਦੀ ਜਾਇਦਾਦ ਇਕੱਠੀ ਕੀਤੀ ਹੈ।
ਸਿਖਰ 'ਤੇ ਰਿਲਾਇੰਸ ਦੇ ਮੁਕੇਸ਼ ਅੰਬਾਨੀ
ਫਾਰਚਿਊਨ ਇੰਡੀਆ ਨੇ ਕਿਹਾ ਹੈ ਕਿ ਰਿਲਾਇੰਸ ਗਰੁੱਪ ਦੇ ਚੇਅਰਮੈਨ ਮੁਕੇਸ਼ ਅੰਬਾਨੀ 10.5 ਲੱਖ ਕਰੋੜ ਰੁਪਏ ਦੀ ਸੰਪੱਤੀ ਦੇ ਨਾਲ ਸੂਚੀ ਵਿੱਚ ਸਭ ਤੋਂ ਉੱਪਰ ਹਨ। ਉਨ੍ਹਾਂ ਤੋਂ ਬਾਅਦ ਅਡਾਨੀ ਗਰੁੱਪ ਦੇ ਚੇਅਰਮੈਨ ਗੌਤਮ ਅਡਾਨੀ ਦੂਜੇ ਨੰਬਰ 'ਤੇ ਹਨ।
ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਅਮਰੀਕੀ ਸ਼ਾਰਟ ਸੇਲਰ ਹਿੰਡਨਬਰਗ ਰਿਸਰਚ ਵੱਲੋਂ ਲਗਾਏ ਗਏ ਦੋਸ਼ਾਂ ਕਾਰਨ ਚੁਣੌਤੀਆਂ ਦਾ ਸਾਹਮਣਾ ਕਰਨ ਦੇ ਬਾਵਜੂਦ ਇਸ ਸਮੇਂ ਦੌਰਾਨ ਅਡਾਨੀ ਦੀ ਜਾਇਦਾਦ ਲਗਭਗ ਦੁੱਗਣੀ ਹੋ ਕੇ 10.4 ਲੱਖ ਕਰੋੜ ਰੁਪਏ ਹੋ ਗਈ ਹੈ।
ਪਿਛਲੇ ਹਫਤੇ, ਅਡਾਨੀ ਨੂੰ ਹੁਰੁਨ ਇੰਡੀਆ ਦੀ 2024 ਦੀ ਸੂਚੀ ਵਿੱਚ 11.6 ਲੱਖ ਕਰੋੜ ਰੁਪਏ ਦੀ ਜਾਇਦਾਦ ਦੇ ਨਾਲ ਏਸ਼ੀਆ ਦਾ ਸਭ ਤੋਂ ਅਮੀਰ ਵਿਅਕਤੀ ਚੁਣਿਆ ਗਿਆ ਸੀ।
ਸ਼ੇਅਰ ਬਾਜ਼ਾਰ ਨੇ ਅਰਬਪਤੀਆਂ ਦੀ ਦੌਲਤ ਵਧਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ
ਸ਼ੇਅਰ ਬਾਜ਼ਾਰ ਨੇ ਇਨ੍ਹਾਂ ਡਾਲਰਾਂ ਦੇ ਅਰਬਪਤੀਆਂ ਦੀ ਦੌਲਤ ਵਧਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ। ਬੈਂਚਮਾਰਕ ਸੂਚਕਾਂਕ ਰਿਕਾਰਡ ਉੱਚੇ ਪੱਧਰ 'ਤੇ ਪਹੁੰਚ ਗਏ ਹਨ ਅਤੇ ਵਿੱਤੀ ਸਾਲ 2022-23 ਤੋਂ ਵਿੱਤੀ ਸਾਲ 2023-24 ਦੌਰਾਨ 15.94 ਪ੍ਰਤੀਸ਼ਤ ਦੀ ਮਿਸ਼ਰਿਤ ਸਾਲਾਨਾ ਵਿਕਾਸ ਦਰ (CAGR) ਨਾਲ ਵਧੇ ਹਨ।
ਅਰਬਪਤੀਆਂ ਦੀ ਔਸਤ ਸੰਪਤੀ ਸਾਲ 2022 ਵਿੱਚ 46,729 ਕਰੋੜ ਰੁਪਏ ਸੀ, ਜੋ ਸਾਲ 2024 ਵਿੱਚ ਵਧ ਕੇ 53,978 ਕਰੋੜ ਰੁਪਏ ਹੋ ਗਈ।
ਚੋਟੀ ਦੇ 10 ਡਾਲਰ ਅਰਬਪਤੀਆਂ ਵਿੱਚ ਸਿਰਫ਼ ਇੱਕ ਔਰਤ
ਅਡਾਨੀ ਅਤੇ ਅੰਬਾਨੀ ਤੋਂ ਇਲਾਵਾ ਮਿਸਤਰੀ ਪਰਿਵਾਰ, ਸ਼ਿਵ ਨਾਦਰ, ਰਾਧਾਕਿਸ਼ਨ ਦਾਮਾਨੀ, ਸੁਨੀਲ ਮਿੱਤਲ ਅਤੇ ਅਜ਼ੀਮ ਪ੍ਰੇਮਜੀ ਚੋਟੀ ਦੇ 10 ਡਾਲਰ ਅਰਬਪਤੀਆਂ ਦੀ ਸੂਚੀ ਵਿੱਚ ਮੌਜੂਦ ਹਨ।
ਜਿੰਦਲ ਪਰਿਵਾਰ ਦੀ ਮਾਤਾ ਅਤੇ ਜਿੰਦਲ ਗਰੁੱਪ ਦੀ ਚੇਅਰਪਰਸਨ ਸਾਵਿਤਰੀ ਦੇਵੀ ਜਿੰਦਲ 33.06 ਬਿਲੀਅਨ ਡਾਲਰ ਦੀ ਕੁੱਲ ਜਾਇਦਾਦ ਦੇ ਨਾਲ ਚੋਟੀ ਦੇ 10 ਦੀ ਸੂਚੀ ਵਿੱਚ ਇਕਲੌਤੀ ਔਰਤ ਹੈ ਅਤੇ ਚੌਥੇ ਸਥਾਨ 'ਤੇ ਹੈ।
