ਸਾਡੇ ਬਜ਼ੁਰਗ ਸਾਡਾ ਵਿਰਸਾ ਆਓ ਮਿਲ ਕੇ ਇਸ ਨੂੰ ਸੰਭਾਲੀਏ

ਦੁਨੀਆ ਦਾ ਹਰ ਦੇਸ਼ ਆਪਣੀ ਪੁਰਾਤਨ ਵਿਰਾਸਤ ਨੂੰ ਸੰਭਾਲਣ ਲਈ ਹਰ ਸੰਭਵ ਯਤਨ ਕਰਦਾ ਹੈ। ਪੁਰਾਤਨ ਇਮਾਰਤਾਂ ਜਿਵੇਂ ਕਿ ਮੰਦਰ, ਕਿਲੇ ਆਦਿ। ਇੱਥੋਂ ਤੱਕ ਕਿ ਹਰ ਦੇਸ਼ ਵਿਚ ਪੁਰਾਣੀਆਂ ਰੇਲ ਗੱਡੀਆਂ, ਹਵਾਈ ਜਹਾਜ਼, ਪੁਲਸ ਅਤੇ ਫੌਜੀ ਹਥਿਆਰ, ਪੁਰਾਣੇ ਨੋਟ ਅਤੇ ਸਿੱਕੇ ਆਦਿ ਸੁਰੱਖਿਅਤ ਰੱਖੇ ਜਾਂਦੇ ਹਨ, ਤਾਂ ਕੀ ਇਹ ਜ਼ਰੂਰੀ ਨਹੀਂ ਕਿ ਬੁਢਾਪੇ ਵਿਚ ਉਨ੍ਹਾਂ ਮਾਪਿਆਂ ਦੀ ਦੇਖਭਾਲ ਅਤੇ ਸੁਰੱਖਿਆ ਵੱਲ ਧਿਆਨ ਦਿੱਤਾ ਜਾਵੇ? ਹੁਣ ਤਾਂ ਕਾਨੂੰਨ ਵੀ ਬਣ ਗਿਆ ਹੈ ਕਿ ਮਾਪਿਆਂ ਦੀ ਪੂਰੀ ਸੁਰੱਖਿਆ ਬੱਚਿਆਂ ਦੀ ਜ਼ਿੰਮੇਵਾਰੀ ਹੈ।

ਕੁਝ ਮਹੀਨੇ ਪਹਿਲਾਂ ਮੇਰਾ ਇਕ ਲੇਖ ਛਪਿਆ ਸੀ - ‘ਸਾਂਭ ਲਓ ਮਾਪੇ, ਰੱਬ ਮਿਲ ਜਾਊ ਆਪੇ’। ਇਸ ਲੇਖ ਦੇ ਪ੍ਰਕਾਸ਼ਿਤ ਹੋਣ ਤੋਂ ਬਾਅਦ, ਮੈਨੂੰ ਸਮਾਜ ਤੋਂ ਬਹੁਤ ਵਧੀਆ ਪ੍ਰਤੀਕਿਆ ਦੇਖਣ ਨੂੰ ਮਿਲੀ। ਬਜ਼ੁਰਗਾਂ ਨੇ ਤਾਂ ਇਸ ਲੇਖ ਨੂੰ ਬਹੁਤ ਪਸੰਦ ਕੀਤਾ ਪਰ ਬਹੁਤ ਸਾਰੇ ਨੌਜਵਾਨ ਜੋੜਿਆਂ ਅਤੇ ਖਾਸ ਕਰ ਕੇ ਬੱਚਿਆਂ ਨੇ ਮਾਪਿਆਂ ਅਤੇ ਦਾਦਾ-ਦਾਦੀ ਦੇ ਵਿਹਾਰ ਪ੍ਰਤੀ ਬਹੁਤ ਸਕਾਰਾਤਮਕ ਪ੍ਰਤੀਕਿਰਿਆ ਦਿਖਾਈ। ਮੇਰੇ ਇਕ ਯੋਗਾਚਾਰੀਆ ਮਿੱਤਰ ਨੇ ਮਾਤਾ-ਪਿਤਾ ਪ੍ਰਤੀ ਆਯੁਰਵੈਦਿਕ ਪਹੁੰਚ ਪੇਸ਼ ਕਰਦੇ ਹੋਏ ਕਿਹਾ ਕਿ ਜਦੋਂ ਬੱਚਾ ਮਾਂ ਦੇ ਗਰਭ ਵਿਚ ਬਣਦਾ ਹੈ ਤਾਂ ਉਸ ਦੇ ਦੋ ਤਰ੍ਹਾਂ ਦੇ ਸਰੀਰ ਹੁੰਦੇ ਹਨ-ਭੌਤਿਕ ਸਰੀਰ ਅਤੇ ਮਾਨਸਿਕ ਸਰੀਰ।

ਇੱਥੇ ਅਸੀਂ ਮਾਨਸਿਕ ਸਰੀਰ ਬਾਰੇ ਵਿਸ਼ੇਸ਼ ਤੌਰ ’ਤੇ ਚਰਚਾ ਕਰਨਾ ਚਾਹਾਂਗੇ। ਇਹ ਮਾਨਸਿਕ ਸਰੀਰ ਇਕ ਤਰ੍ਹਾਂ ਨਾਲ ਸਾਡੀ ਆਤਮਾ ਦੀ ਪ੍ਰਤੀਨਿਧਤਾ ਕਰਦਾ ਹੈ। ਜਦੋਂ ਕਿਸੇ ਮਾਂ ਦੀ ਕੁੱਖ ਵਿਚ ਬੱਚੇ ਦੇ ਜਨਮ ਦੀ ਪ੍ਰਕਿਰਿਆ ਸ਼ੁਰੂ ਹੁੰਦੀ ਹੈ ਅਤੇ ਚੌਥੇ ਮਹੀਨੇ ਤੱਕ ਭੌਤਿਕ ਸਰੀਰ ਦਾ ਢਾਂਚਾ ਬਣਨ ਤੋਂ ਬਾਅਦ ਮਾਨਸਿਕ ਸਰੀਰ ਭਾਵ ਆਤਮਾ ਦਾ ਪ੍ਰਵੇਸ਼ ਹੁੰਦਾ ਹੈ।

ਜਨਮ ਲੈਣ ਵਾਲੀ ਆਤਮਾ ਦਾ ਸਬੰਧ ਪਿਛਲੇ ਜਨਮਾਂ ਵਿਚ ਮਾਤਾ ਅਤੇ ਪਿਤਾ ਦੋਵਾਂ ਨਾਲ ਹੁੰਦਾ ਹੈ। ਪਿਛਲੇ ਜਨਮਾਂ ਦੇ ਰਿਸ਼ਤੇ ਸਿਰਫ ਦੋ ਤਰ੍ਹਾਂ ਦੇ ਨਤੀਜੇ ਹੀ ਲੈ ਕੇ ਆਉਂਦੇ ਹਨ - ਜਾਂ ਤਾਂ ਕਰਜ਼ ਚੁਕਾਉਣ ਲਈ ਜਾਂ ਕਰਜ਼ੇ ਦੀ ਵਸੂਲੀ ਲਈ। ਕਾਨੂੰਨ ਬੱਚਿਆਂ ਨੂੰ ਉਨ੍ਹਾਂ ਦੇ ਮਾਪਿਆਂ ਦੀ ਭੌਤਿਕ ਜਾਇਦਾਦ ’ਤੇ ਪੂਰਾ ਅਧਿਕਾਰ ਵੀ ਪ੍ਰਦਾਨ ਕਰਦਾ ਹੈ। ਸਾਨੂੰ ਇਸ ਨੂੰ ਇਸ ਤਰ੍ਹਾਂ ਸਮਝਣਾ ਚਾਹੀਦਾ ਹੈ ਕਿ ਮਾਪੇ ਬਿਨਾਂ ਕਿਸੇ ਸ਼ਰਤ ਤੋਂ ਆਪਣੀ ਸਾਰੀ ਦੌਲਤ ਆਪਣੇ ਬੱਚਿਆਂ ਨੂੰ ਸਮਰਪਿਤ ਕਰ ਕੇ ਆਪਣੇ ਪਿਛਲੇ ਜਨਮਾਂ ਦਾ ਕਰਜ਼ਾ ਚੁਕਾਉਂਦੇ ਹਨ।

ਇਸੇ ਤਰ੍ਹਾਂ ਬੱਚਿਆਂ ਨੂੰ ਵੀ ਆਪਣੇ ਮਨ ਵਿਚ ਸਪੱਸ਼ਟ ਵਿਚਾਰ ਰੱਖਣਾ ਚਾਹੀਦਾ ਹੈ ਕਿ ਸਾਡੇ ਵੀ ਪਿਛਲੇ ਜਨਮਾਂ ਤੋਂ ਆਪਣੇ ਮਾਤਾ-ਪਿਤਾ ਪ੍ਰਤੀ ਕੁਝ ਕਰਜ਼ ਹੋਣਗੇ, ਜੋ ਸਾਨੂੰ ਉਨ੍ਹਾਂ ਦੀ ਸੇਵਾ ਆਦਿ ਰਾਹੀਂ ਚੁਕਾਉਣ ਤੋਂ ਪਿੱਛੇ ਨਹੀਂ ਹਟਣਾ ਚਾਹੀਦਾ ਪਰ ਕਲਯੁਗ ਵਿਚ ਕਈ ਅਜਿਹੀਆਂ ਘਟਨਾਵਾਂ ਦੇਖਣ ਨੂੰ ਮਿਲਦੀਆਂ ਹਨ ਜਦੋਂ ਬੱਚੇ ਆਪਣੇ ਮਾਤਾ-ਪਿਤਾ ਰਾਹੀਂ ਪੈਦਾ ਹੋਣ ਤੋਂ ਬਾਅਦ, ਉਨ੍ਹਾਂ ਦੀ ਮਦਦ ਨਾਲ ਆਪਣੀ ਛੋਟੀ ਉਮਰ ਤੱਕ ਪਾਲਣ-ਪੋਸ਼ਣ ਕਰਵਾਉਣ ਤੋਂ ਬਾਅਦ, ਇੱਥੋਂ ਤੱਕ ਕਿ ਉਨ੍ਹਾਂ ਦੀਆਂ ਜਾਇਦਾਦਾਂ ਵੀ ਆਪਣੇ ਨਾਮ ’ਤੇ ਤਬਦੀਲ ਕਰਾਉਣ ਤੋਂ ਬਾਅਦ, ਉਨ੍ਹਾਂ ਨੂੰ ਬੇਸਹਾਰਾ ਅਵਸਥਾ ’ਚ ਛੱਡ ਕੇ ਸਿਰਫ ਆਪਣੀ ਤਰੱਕੀ ਦੇ ਨਸ਼ੇ ਵਿਚ ਵੱਖਰੇ ਜਾ ਵਸਦੇ ਹਨ।