ਉੱਤਰ ਪ੍ਰਦੇਸ਼ ਵਿਚ ਕਾਂਗਰਸ ਅਤੇ ਸਪਾ ਵਿਚਕਾਰ ਵਧਦਾ ਪਾੜਾ

ਉੱਤਰ ਪ੍ਰਦੇਸ਼ ਵਿਚ ਸਿਆਸੀ ਹਲਚਲ ਤੇਜ਼ ਹੋ ਗਈ ਹੈ ਕਿਉਂਕਿ ਸਹਾਰਨਪੁਰ ਤੋਂ ਕਾਂਗਰਸ ਦੇ ਸੰਸਦ ਮੈਂਬਰ ਇਮਰਾਨ ਮਸੂਦ ਨੇ ਇਹ ਕਹਿ ਕੇ ਉੱਤਰ ਪ੍ਰਦੇਸ਼ ਦੇ ਸਿਆਸੀ ਹਲਕਿਆਂ ਵਿਚ ਹਲਚਲ ਮਚਾ ਦਿੱਤੀ ਹੈ ਕਿ ਬਹੁਜਨ ਸਮਾਜ ਪਾਰਟੀ (ਬਸਪਾ) ਨਾਲ ਗੱਠਜੋੜ ਕਰਨ ਨਾਲ ਕਾਂਗਰਸ ਨੂੰ ਆਪਣੇ ਮੌਜੂਦਾ ਸਹਿਯੋਗੀ ਸਮਾਜਵਾਦੀ ਪਾਰਟੀ (ਸਪਾ) ਨਾਲੋਂ ਜ਼ਿਆਦਾ ਫਾਇਦਾ ਹੋਵੇਗਾ। ਮਸੂਦ ਦੀ ਇਹ ਟਿੱਪਣੀ ਲੋਕ ਸਭਾ ਚੋਣਾਂ ਤੋਂ ਬਾਅਦ ਕਾਂਗਰਸ ਅਤੇ ਸਪਾ ਵਿਚਕਾਰ ਵਧਦੇ ਤਣਾਅ ਦੇ ਵਿਚਕਾਰ ਆਈ ਹੈ।

ਕਾਂਗਰਸ ਸੂਬੇ ’ਚ 6 ਸੀਟਾਂ ਜਿੱਤ ਕੇ ਆਪਣੇ ਪ੍ਰਦਰਸ਼ਨ ਤੋਂ ਉਤਸ਼ਾਹਿਤ ਹੈ ਅਤੇ ਹੁਣ ਉਹ ਆਪਣੇ ਗੱਠਜੋੜ ਦੀਆਂ ਤਰਜੀਹਾਂ ’ਤੇ ਮੁੜ ਵਿਚਾਰ ਕਰਦੀ ਦਿਸ ਰਹੀ ਹੈ। ਸਿਆਸੀ ਨਿਰੀਖਕਾਂ ਦਾ ਮੰਨਣਾ ਹੈ ਕਿ ਕਾਂਗਰਸ ਅਤੇ ਸਪਾ ਵਿਚਾਲੇ ਵਧਦਾ ਪਾੜਾ ਬਸਪਾ ਲਈ ਮੌਕੇ ਦੀ ਇਕ ਖਿੜਕੀ ਖੋਲ੍ਹ ਸਕਦਾ ਹੈ।

ਹਾਲਾਂਕਿ, ਅਜਿਹਾ ਗੱਠਜੋੜ ਬਣਾਉਣਾ ਆਸਾਨ ਨਹੀਂ ਹੋ ਸਕਦਾ। ਕਾਂਗਰਸ ਅਤੇ ਸਪਾ ਦੇ ਤਿੱਖੇ ਆਦਾਨ-ਪ੍ਰਦਾਨ ਅਤੇ ਬਿਆਨਬਾਜ਼ੀ ਜਾਰੀ ਰਹਿਣ ਦੇ ਕਾਰਨ, ਮਸੂਦ ਵਰਗੇ ਬਿਆਨ ਭਵਿੱਖ ਦੀਆਂ ਚੋਣਾਂ ਵਿਚ ਕਾਂਗਰਸ ਲਈ ਗੱਠਜੋੜ ਵਿਚ ਬਿਹਤਰ ਹਿੱਸੇਦਾਰੀ ਲਈ ਸਪਾ ’ਤੇ ਦਬਾਅ ਪਾਉਣ ਬਾਰੇ ਹੋ ਸਕਦੇ ਹਨ।

‘ਮੋਦੀ ਸਰਕਾਰ ਕੇ 11 ਸਾਲ–ਸੰਕਲਪ ਸੇ ਸਿੱਧੀ’ : ਭਾਜਪਾ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਕਾਰਜਕਾਲ ਦੇ 11 ਸਾਲ ਪੂਰੇ ਹੋਣ ਦੇ ਮੌਕੇ ’ਤੇ ‘ਮੋਦੀ ਸਰਕਾਰ ਕੇ 11 ਸਾਲ–ਸੰਕਲਪ ਸੇ ਸਿੱਧੀ’ ਸਿਰਲੇਖ ਵਾਲੀ ਇਕ ਖਾਹਿਸ਼ੀ ਦੇਸ਼ ਵਿਆਪੀ ਮੁਹਿੰਮ ਦੀ ਯੋਜਨਾ ਬਣਾਈ ਹੈ।

ਇਸ ਮੁਹਿੰਮ ਦਾ ਉਦੇਸ਼ ਸ਼ਾਸਨ ਦੀਆਂ ਪ੍ਰਾਪਤੀਆਂ ਦਾ ਜਸ਼ਨ ਮਨਾਉਣਾ ਅਤੇ ਇਕ ਵਿਕਸਤ ਭਾਰਤ ਦੇ ਦ੍ਰਿਸ਼ਟੀਕੋਣ ਨੂੰ ਪੇਸ਼ ਕਰਨਾ ਹੈ। ਭਾਜਪਾ ਨੇ 26 ਮਈ ਨੂੰ ਕੇਂਦਰ ਦੀ ਸੱਤਾ ਵਿਚ 11 ਸਾਲ ਪੂਰੇ ਕਰ ਲਏ, ਉਥੇ ਹੀ ਪਾਰਟੀ 9 ਜੂਨ ਨੂੰ ਪ੍ਰਧਾਨ ਮੰਤਰੀ ਮੋਦੀ ਦੀ ਅਗਵਾਈ ਵਾਲੀ ਸਰਕਾਰ ਦੇ ਤੀਜੇ ਕਾਰਜਕਾਲ ਦੀ ਪਹਿਲੀ ਵਰ੍ਹੇਗੰਢ ਮਨਾਏਗੀ।

ਇਸ ਪਹਿਲ ’ਚ ‘ਆਪ੍ਰੇਸ਼ਨ ਸਿੰਧੂਰ’ ਦੀ ਹਾਲੀਆ ਸਫਲਤਾ ਨੂੰ ਵੀ ਉਜਾਗਰ ਕੀਤਾ ਜਾਵੇਗਾ। ਦੂਜੇ ਪਾਸੇ, ਭਾਜਪਾ ਦੇ ਰਾਸ਼ਟਰੀ ਪ੍ਰਧਾਨ ਅਤੇ ਕੇਂਦਰੀ ਸਿਹਤ ਮੰਤਰੀ ਜੇ. ਪੀ. ਨੱਡਾ ਨੇ ਸਰਕਾਰ ਦੀਆਂ ਪ੍ਰਾਪਤੀਆਂ ਬਾਰੇ ਜਾਗਰੂਕਤਾ ਫੈਲਾਉਣ ਅਤੇ ਕੇਂਦਰੀ ਯੋਜਨਾਵਾਂ ਵਿਚ ਨਾਮਜ਼ਦਗੀ ਨੂੰ ਯਕੀਨੀ ਬਣਾਉਣ ਲਈ 29 ਮਈ ਤੱਕ ਰਾਜ ਪੱਧਰੀ ਕਮੇਟੀਆਂ ਅਤੇ 3 ਜੂਨ ਤੱਕ ਜ਼ਿਲ੍ਹਾ ਟੀਮਾਂ ਦੇ ਗਠਨ ਦੇ ਨਿਰਦੇਸ਼ ਦਿੱਤੇ ਹਨ।

ਮਹਾਰਾਸ਼ਟਰ ਵਿਚ ਆਉਣ ਵਾਲੀਆਂ ਲੋਕਲ ਬਾਡੀ ਚੋਣਾਂ ਲਈ ਮਹਾਯੁਤੀ-ਐੱਨ. ਡੀ. ਏ. ਦੀਆਂ ਤਿਆਰੀਆਂ ਸ਼ੁਰੂ : ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਮਹਾਰਾਸ਼ਟਰ ਵਿਚ ਆਉਣ ਵਾਲੀਆਂ ਲੋਕਲ ਬਾਡੀ ਚੋਣਾਂ ਲਈ ਮਹਾਯੁਤੀ-ਐੱਨ. ਡੀ. ਏ. ਦੀਆਂ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਹਨ, ਜਦਕਿ ਵਿਰੋਧੀ ਮਹਾ ਵਿਕਾਸ ਅਘਾੜੀ ਦੇ ਸਹਿਯੋਗੀ ਗੱਠਜੋੜ ਫਾਰਮੂਲੇ ’ਤੇ ਆਪਣੇ ਪੱਤੇ ਨਹੀਂ ਖੋਲ੍ਹ ਰਹੇ ਹਨ। ਚਰਚਾ ਹੈ ਕਿ ਭਾਜਪਾ ਹੁਣ ਵੱਡੇ ਸ਼ਹਿਰੀ ਕੇਂਦਰਾਂ-ਮੁੰਬਈ, ਠਾਣੇ ਅਤੇ ਪੁਣੇ ਵਿਚ ਸੁਤੰਤਰ ਤੌਰ ’ਤੇ ਚੋਣ ਲੜਨ ਦੇ ਬਦਲ ਦੀ ਭਾਲ ਕਰ ਰਹੀ ਹੈ।

ਇਹ ਤਬਦੀਲੀ ਗੱਠਜੋੜ ਸਹਿਯੋਗੀਆਂ ਸ਼ਿਵ ਸੈਨਾ (ਏਕਨਾਥ ਸ਼ਿੰਦੇ ਦੀ ਅਗਵਾਈ ਵਿਚ) ਅਤੇ ਐੱਨ. ਸੀ. ਪੀ. (ਅਜੀਤ ਪਵਾਰ ਧੜੇ) ਦੇ ਅੰਦਰੂਨੀ ਵਿਰੋਧ ਤੋਂ ਬਾਅਦ ਆਈ ਹੈ, ਦੋਵੇਂ ਹੀ ਆਪਣੇ-ਆਪਣੇ ਗੜ੍ਹਾਂ ਵਿਚ ਸੀਟਾਂ ਦੀ ਉਚਿਤ ਹਿੱਸੇਦਾਰੀ ਦੀ ਮੰਗ ਕਰ ਰਹੇ ਹਨ। ਰਾਜ ਦੇ ਆਪਣੇ 3 ਦਿਨਾ ਦੌਰੇ ਦੌਰਾਨ, ਸ਼ਾਹ ਨੇ ਮੁੱਖ ਮੰਤਰੀ ਦੇਵੇਂਦਰ ਫੜਨਵੀਸ ਨਾਲ ਵਿਅਕਤੀਗਤ ਤੌਰ ’ਤੇ ਅਤੇ ਨਾਲ ਹੀ ਆਪਣੇ 2 ਉਪ ਮੁੱਖ ਮੰਤਰੀਆਂ ਦੇ ਨਾਲ ਮਿਲ ਕੇ ਭਵਿੱਖ ਦੀ ਕਾਰਜ ਯੋਜਨਾ ਤੈਅ ਕੀਤੀ।

ਸ਼ਿਵਾਜੀ ਗਣੇਸ਼ਨ ਤੋਂ ਬਾਅਦ ਉੱਚ ਸਦਨ ਵਿਚ ਪ੍ਰਵੇਸ਼ ਕਰਨ ਵਾਲੇ ਤੀਜੇ ਵੱਡੇ ਸਿਤਾਰੇ 71 ਸਾਲਾ ਕਮਲ ਹਾਸਨ ਤਾਮਿਲਨਾਡੂ ਤੋਂ ਹੋਣਗੇ। ਇਸ ਤੋਂ ਪਹਿਲਾਂ ਮਰਹੂਮ ਸ਼ਿਵਾਜੀ ਗਣੇਸ਼ਨ ਨੂੰ 1980 ਦੇ ਦਹਾਕੇ ਦੀ ਸ਼ੁਰੂਆਤ ਵਿਚ ਸਾਬਕਾ ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ ਨੇ ਰਾਜ ਸਭਾ ਲਈ ਨਾਮਜ਼ਦ ਕੀਤਾ ਸੀ, ਉਸ ਤੋਂ ਬਾਅਦ 1984 ਵਿਚ ਜੇ. ਜੈਲਲਿਤਾ ਏ. ਆਈ. ਏ. ਡੀ. ਐੱਮ. ਕੇ. ਦੇ ਉਮੀਦਵਾਰ ਵਜੋਂ ਚੁਣੀ ਗਈ ਸੀ ਜਦੋਂ ਉਸ ਦੇ ਗੁਰੂ ਐੱਮ. ਜੀ. ਰਾਮਚੰਦਰਨ (ਆਮ ਲੋਕਾਂ ਲਈ ਐੱਮ. ਜੀ. ਆਰ.) ਮੁੱਖ ਮੰਤਰੀ ਸਨ।

ਜਦੋਂ ਕਿ ਡੀ. ਐੱਮ. ਕੇ. ਪ੍ਰਧਾਨ ਅਤੇ ਮੁੱਖ ਮੰਤਰੀ ਐੱਮ. ਕੇ. ਸਟਾਲਿਨ ਨੇ ਬੁੱਧਵਾਰ ਨੂੰ ਰਾਜ ਸਭਾ ਚੋਣਾਂ ਵਿਚ ਐੱਮ. ਐੱਨ. ਐੱਮ. ਨੂੰ ਆਪਣੀ ਪਾਰਟੀ ਦੇ ਸਮਰਥਨ ਦਾ ਐਲਾਨ ਕੀਤਾ, ਜਿਸ ’ਚ 2024 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਹਾਸਨ ਦੇ ਨਾਲ ਬਣੀ ਸਹਿਮਤੀ ਵੱਲ ਇਸ਼ਾਰਾ ਕੀਤਾ ਗਿਆ ਜਦੋਂ ਐੱਮ. ਐੱਨ. ਐੱਮ. ਡੀ. ਐੱਮ. ਕੇ. ਦੀ ਅਗਵਾਈ ਵਾਲੇ ਮਹਾਗੱਠਜੋੜ ਦਾ ਹਿੱਸਾ ਸੀ।

ਡੀ. ਐੱਮ. ਕੇ. ਅਤੇ ਇਸ ਦੇ ਸਹਿਯੋਗੀ, ਜਿਨ੍ਹਾਂ ਵਿਚ ਕਾਂਗਰਸ, ਦੋ ਮੁੱਖ ਖੱਬੇਪੱਖੀ ਪਾਰਟੀਆਂ ਅਤੇ ਥੋਲ ਥਿਰੂਮਾਵਲਵਨ ਦੀ ਅਗਵਾਈ ਵਾਲੀ ਦਲਿਤ ਪਾਰਟੀ ਵੀ. ਸੀ. ਕੇ. ’ਚ ਸ਼ਾਮਲ ਹਨ, ਦੇ ਕੋਲ 234 ਮੈਂਬਰੀ ਵਿਧਾਨ ਸਭਾ ਵਿਚ 158 ਵਿਧਾਇਕਾਂ ਦਾ ਬਹੁਮਤ ਹੈ, ਜਿਸ ਨਾਲ ਡੀ. ਐੱਮ. ਕੇ. ਨੂੰ ਖਾਲੀ ਹੋਣ ਵਾਲੀਆਂ ਛੇ ਰਾਜ ਸਭਾ ਸੀਟਾਂ ਵਿਚੋਂ ਚਾਰ ਆਸਾਨੀ ਨਾਲ ਜਿੱਤਣ ਵਿਚ ਮਦਦ ਮਿਲਣੀ ਚਾਹੀਦੀ ਹੈ।

66 ਵਿਧਾਇਕਾਂ ਨਾਲ, ਮੁੱਖ ਵਿਰੋਧੀ ਧਿਰ ਏ. ਆਈ. ਏ. ਡੀ. ਐੱਮ. ਕੇ. ਦੋ ਬਾਕੀ ਸੀਟਾਂ ਲਈ ਮੈਦਾਨ ’ਚ ਉਤਰੇਗਾ, ਜਦਕਿ ਭਾਜਪਾ ਨੇ ਪਾਰਟੀ ਨਾਲ ਆਪਣੇ ਸਬੰਧਾਂ ਦਾ ਨਵੀਨੀਕਰਨ ਕੀਤਾ ਹੈ। ਰਾਜ ਤੋਂ ਰਾਜ ਸਭਾ ਲਈ ਇਕ ਮੈਂਬਰ ਚੁਣਨ ਲਈ ਘੱਟੋ-ਘੱਟ 34 ਵੋਟਾਂ ਦੀ ਲੋੜ ਹੁੰਦੀ ਹੈ।

ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ ਨੂੰ ਅਜੇ ਤੱਕ ਸਰਕਾਰੀ ਰਿਹਾਇਸ਼ ਨਹੀਂ ਮਿਲੀ : ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ ਨੂੰ ਆਪਣੇ ਕਾਰਜਕਾਲ ਦੇ 100 ਦਿਨ ਪੂਰੇ ਕਰਨ ਦੇ ਬਾਵਜੂਦ ਅਜੇ ਤੱਕ ਸਰਕਾਰੀ ਰਿਹਾਇਸ਼ ਨਹੀਂ ਮਿਲੀ ਹੈ। ਰੇਖਾ ਗੁਪਤਾ ਦੀ ਪੂਰਵਗਾਮੀ ਆਤਿਸ਼ੀ ਆਪਣੇ ਛੋਟੇ ਜਿਹੇ ਕਾਰਜਕਾਲ ਦੌਰਾਨ ਸੁਪਰੀਮ ਕੋਰਟ ਦੇ ਨੇੜੇ ਏ. ਬੀ.-17, ਮਥੁਰਾ ਰੋਡ ਬੰਗਲੇ ਵਿਚ ਰਹਿੰਦੀ ਸੀ, ਜਦੋਂ ਕਿ ‘ਆਪ’ ਦੇ ਰਾਸ਼ਟਰੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੂੰ ਸਿਵਲ ਲਾਈਨਜ਼ ਖੇਤਰ ਵਿਚ 6, ਫਲੈਗ ਸਟਾਫ ਰੋਡ ’ਤੇ ਸਥਿਤ ਇਕ ਵਿਸ਼ਾਲ ਰਿਹਾਇਸ਼ ਅਲਾਟ ਕੀਤੀ ਗਈ ਸੀ। ਹੁਣ ਰੇਖਾ ਗੁਪਤਾ ਇਸ ਸਮੇਂ ਆਪਣੇ ਲਈ ਇਕ ਢੁੱਕਵੀਂ ਸਰਕਾਰੀ ਰਿਹਾਇਸ਼ ਦੀ ਭਾਲ ਕਰ ਰਹੀ ਹੈ। ਉਸ ਨੇ 22 ਮਈ ਨੂੰ 2 ਨਾਰਥ ਐਂਡ ਰੋਡ ’ਤੇ ਬ੍ਰਿਟਿਸ਼ ਯੁੱਗ ਦੇ ਬੰਗਲੇ ਦਾ ਦੌਰਾ ਕੀਤਾ।

ਇਸ ਦੌਰਾਨ, ਮੁੱਖ ਮੰਤਰੀ, ਜਿਸ ਨੇ ਹੁਣ ਆਪਣੇ ਕਾਰਜਕਾਲ ਦੇ 100 ਦਿਨ ਪੂਰੇ ਕਰ ਲਏ ਹਨ, ਨੇ ਇਕ ਵਿਵਹਾਰਕ ਪਹੁੰਚ ਅਪਣਾਈ ਹੈ। ਉਸ ਨੇ ਪਾਣੀ ਦੀ ਕਮੀ ਨੂੰ ਦੂਰ ਕਰਨ ਲਈ ਸਰਕਾਰੀ ਸਕੂਲਾਂ ਦੇ ਅਣਐਲਾਨੇ ਦੌਰੇ ਕੀਤੇ, ਟੋਇਆਂ ਨੂੰ ਭਰੇ ਜਾਣ ਨੂੰ ਯਕੀਨੀ ਬਣਾਉਣ ਲਈ ਸੜਕਾਂ ਦਾ ਨਿਰੀਖਣ ਕੀਤਾ, ਮਰੀਜ਼ਾਂ ਦੀ ਤੁਰੰਤ ਦੇਖਭਾਲ ਅਤੇ ਆਈ. ਸੀ. ਯੂ. ਦਾਖਲੇ ਨੂੰ ਯਕੀਨੀ ਬਣਾਉਣ ਲਈ ਐੱਲ. ਐੱਨ. ਜੇ. ਪੀ. ਹਸਪਤਾਲ ਦਾ ਦੌਰਾ ਕੀਤਾ ਅਤੇ ਯਮੁਨਾ ਨਦੀ ਦੀ ਸਫਾਈ ਦਾ ਨਿਰੀਖਣ ਕੀਤਾ।

ਰਾਹਿਲ ਨੋਰਾ ਚੋਪੜਾ