ਪ੍ਰੇਸ਼ਾਨ ਨਾ ਹੋਵੇ ਭਾਜਪਾ

ਲੋਕ ਸਭਾ ਵਿਚ ਵਿਰੋਧੀ ਧਿਰ ਦੇ ਨੇਤਾ ਅਤੇ ਰਾਏਬਰੇਲੀ ਤੋਂ ਸੰਸਦ ਮੈਂਬਰ ਨੇ ਭਾਜਪਾ ਅਤੇ ਚੋਣ ਕਮਿਸ਼ਨ (ਈ. ਸੀ. ਆਈ.) ’ਤੇ ਵੋਟ ਚੋਰੀ ਦੇ ਦੋਸ਼ਾਂ ਨੂੰ ਦੁਹਰਾਇਆ ਅਤੇ ਕਿਹਾ ਕਿ ਦੇਸ਼ ਵਿਚ ਵੋਟਾਂ ਵਿਚ ਧੋਖਾਦੇਹੀ ਰਾਹੀਂ ਸਰਕਾਰਾਂ ਬਣਾਈਆਂ ਜਾ ਰਹੀਆਂ ਹਨ। ਉਨ੍ਹਾਂ ਨੇ ਵੀਰਵਾਰ ਨੂੰ ਰਾਏਬਰੇਲੀ ਦੇ ਆਪਣੇ ਦੋ ਦਿਨਾ ਦੌਰੇ ਦੇ ਅੰਤ ’ਤੇ ਇਹ ਗੱਲ ਕਹੀ। ਰਾਹੁਲ ਗਾਂਧੀ ਨੇ ਕਿਹਾ, ‘‘ਅਸੀਂ ਕਾਲੇ ਅਤੇ ਚਿੱਟੇ ਰੰਗ ਵਿਚ ਧੋਖਾਦੇਹੀ ਦੇ ਸਬੂਤ ਦੇ ਦਿੱਤੇ ਹਨ। ਬਸ ਸਬੂਤਾਂ ਦੀ ਅਗਲੀ ਲੜੀ ਦਾ ਇੰਤਜ਼ਾਰ ਕਰੋ।

ਮੈਂ ਭਾਜਪਾ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਚਿੰਤਾ ਨਾ ਕਰੋ ਕਿਉਂਕਿ ਜੋ ਸਬੂਤ ਆ ਰਿਹਾ ਹੈ ਉਹ ਇਕ ਹਾਈਡ੍ਰੋਜਨ ਬੰਬ ਹੋਵੇਗਾ ਜੋ ਸਭ ਕੁਝ ਸਾਫ਼ ਕਰ ਦੇਵੇਗਾ।’’ ਇਸ ਦੌਰਾਨ ਰਾਏਬਰੇਲੀ ਸੰਸਦੀ ਖੇਤਰ ਵਿਚ ਰਾਹੁਲ ਗਾਂਧੀ, ਸਮਾਜਵਾਦੀ ਪਾਰਟੀ ਦੇ ਪ੍ਰਧਾਨ ਅਖਿਲੇਸ਼ ਯਾਦਵ ਅਤੇ ਰਾਜਦ ਨੇਤਾ ਤੇਜਸਵੀ ਯਾਦਵ ਦੇ ਪੋਸਟਰ ਲਗਾਏ ਗਏ, ਜਿਨ੍ਹਾਂ ’ਤੇ ਲਿਖਿਆ ਸੀ : ‘ਭਾਰਤ ਕੀ ਆਖਰੀ ਆਸ਼ਾ-ਕਲਯੁੱਗ ਕੇ ਬ੍ਰਹਮਾ, ਵਿਸ਼ਨੂੰ, ਮਹੇਸ਼’। ਇਹ ਪੋਸਟਰ ਸਪਾ ਦੇ ਲੋਹੀਆ ਵਾਹਿਨੀ ਨੇਤਾ ਰਾਹੁਲ ਨਿਰਮਲ ਨੇ ਲਗਾਏ ਸਨ। ਉਨ੍ਹਾਂ ਨੇ ਤਿੰਨਾਂ ਨੂੰ ਕਲਯੁੱਗ ਦੇ ਅਵਤਾਰ ਦੱਸਿਆ।

ਐੱਨ. ਡੀ. ਏ. ਅਤੇ ਮਹਾਗੱਠਜੋੜ ਦੋਵਾਂ ਵਿਚ ਸੀਟਾਂ ਦੀ ਵੰਡ ਦੀ ਗੱਲਬਾਤ ਸ਼ੁਰੂ : ਜਿਵੇਂ-ਜਿਵੇਂ ਬਿਹਾਰ ਵਿਚ ਚੋਣ ਲੜਾਈ ਨੇੜੇ ਆ ਰਹੀ ਹੈ, ਐੱਨ. ਡੀ. ਏ. ਅਤੇ ਮਹਾਗੱਠਜੋੜ ਦੋਵਾਂ ਵਿਚ ਸੀਟਾਂ ਦੀ ਵੰਡ ਦੀ ਗੱਲਬਾਤ ਸ਼ੁਰੂ ਹੋ ਗਈ ਹੈ, ਜਦੋਂ ਕਿ ਚਿਰਾਗ ਪਾਸਵਾਨ, ਜੀਤਨ ਰਾਮ ਮਾਂਝੀ ਅਤੇ ਉਪੇਂਦਰ ਕੁਸ਼ਵਾਹਾ ਦੀਆਂ ਮੰਗਾਂ ਕਾਰਨ ਐੱਨ. ਡੀ. ਏ. ਵਿਚ ਗੱਲਬਾਤ ਚੁਣੌਤੀਪੂਰਨ ਹੋ ਗਈ ਹੈ। ਉੱਥੇ ਹੀ ਦੋ ਹੋਰ ਪਾਰਟੀਆਂ ਵਿਰੋਧੀ ਕੈਂਪ ਵਿਚ ਸ਼ਾਮਲ ਹੋ ਗਈਆਂ ਹਨ-ਹੇਮੰਤ ਸੋਰੇਨ ਦਾ ਝਾਰਖੰਡ ਮੁਕਤੀ ਮੋਰਚਾ ਅਤੇ ਪਸ਼ੂਪਤੀ ਪਾਰਸ ਦਾ ਲੋਜਪਾ ਗੁੱਟ। ਦੂਜੇ ਪਾਸੇ ਵੀ. ਆਈ. ਪੀ. ਮੁਖੀ ਮੁਕੇਸ਼ ਸਾਹਨੀ ਨੇ 30 ਤੋਂ 40 ਸੀਟਾਂ ਦੇ ਨਾਲ-ਨਾਲ ਉਪ ਮੁੱਖ ਮੰਤਰੀ ਦੇ ਅਹੁਦੇ ਦੀ ਮੰਗ ਕੀਤੀ ਹੈ ਜਦੋਂ ਕਿ ਭਾਕਪਾ-ਮਾਲੇ ਆਪਣੇ ਪਿਛਲੇ ਪ੍ਰਦਰਸ਼ਨ ਦਾ ਹਵਾਲਾ ਦਿੰਦੇ ਹੋਏ ਘੱਟੋ-ਘੱਟ 40 ਸੀਟਾਂ ਦੀ ਮੰਗ ਕਰ ਰਹੀ ਹੈ।

ਇਸ ਦੌਰਾਨ ਕਾਂਗਰਸ ਨੇ ਬੁੱਧਵਾਰ ਨੂੰ ਕਿਹਾ ਕਿ ਪਾਰਟੀਆਂ ਨੂੰ ਸੀਟਾਂ ਵੰਡਦੇ ਸਮੇਂ ਜਿੱਤਣ ਦੀ ਸੰਭਾਵਨਾ ਦੇ ਮਾਮਲੇ ਵਿਚ ਚੰਗੀਆਂ ਅਤੇ ਮਾੜੀਆਂ ਸੀਟਾਂ ਵਿਚਕਾਰ ਸੰਤੁਲਨ ਬਣਾਈ ਰੱਖਣਾ ਹੋਵੇਗਾ ਅਤੇ ਗੱਠਜੋੜ ਦੇ ਸਾਰੇ ਮੌਜੂਦਾ ਭਾਈਵਾਲਾਂ ਨੂੰ ਨਵੇਂ ਸਹਿਯੋਗੀਆਂ ਨੂੰ ਸ਼ਾਮਲ ਕਰਨ ਲਈ ਆਪਣੇ ਪੱਖ ਤੋਂ ਯੋਗਦਾਨ ਪਾਉਣਾ ਹੋਵੇਗਾ। ਸੂਤਰਾਂ ਅਨੁਸਾਰ ਰਾਜਦ 122-125 ਸੀਟਾਂ, ਕਾਂਗਰਸ 60-65, ਖੱਬੀਆਂ ਪਾਰਟੀਆਂ 30-33, ਵੀ. ਆਈ. ਪੀ. 10-15, ਰਾਲੋਸਪਾ 5-7 ਅਤੇ ਝਾਮੁਮੋ 2-3 ਸੀਟਾਂ ’ਤੇ ਚੋਣ ਲੜ ਸਕਦੀਅਾਂ ਹਨ। ਦੋਵੇਂ ਠਾਕਰੇ ਭਰਾਵਾਂ ਵਿਚਕਾਰ ਇਹ ਚੌਥੀ ਮੁਲਾਕਾਤ : ਮਹਾਰਾਸ਼ਟਰ ਦੇ ਰਾਜਨੀਤਿਕ ਦ੍ਰਿਸ਼ ਵਿਚ ਇਕ ਮਹੱਤਵਪੂਰਨ ਤਬਦੀਲੀ ਆ ਰਹੀ ਹੈ। ਸ਼ਿਵ ਸੈਨਾ (ਯੂ. ਬੀ. ਟੀ.) ਪ੍ਰਧਾਨ ਊਧਵ ਠਾਕਰੇ ਨੇ ਬੁੱਧਵਾਰ ਨੂੰ ਮਨਸੇ ਮੁਖੀ ਰਾਜ ਠਾਕਰੇ ਨਾਲ ਉਨ੍ਹਾਂ ਦੇ ਨਿਵਾਸ ਸਥਾਨ ’ਤੇ ਮੁਲਾਕਾਤ ਕੀਤੀ। ਲੋਕਲ ਬਾਡੀਜ਼ ਚੋਣਾਂ ਤੋਂ ਪਹਿਲਾਂ ਦੋਵਾਂ ਠਾਕਰੇ ਭਰਾਵਾਂ ਵਿਚਕਾਰ ਇਹ ਚੌਥੀ ਮੁਲਾਕਾਤ ਹੈ। ਇਸ ਮੁਲਾਕਾਤ ਨੇ ਇਕ ਵਾਰ ਫਿਰ ਦੋਵਾਂ ਚਚੇਰੇ ਭਰਾਵਾਂ ਵਿਚਕਾਰ ਵਧਦੀ ਨੇੜਤਾ ਨੂੰ ਉਜਾਗਰ ਕੀਤਾ, ਜਿਨ੍ਹਾਂ ਦੇ ਨਿੱਜੀ ਅਤੇ ਰਾਜਨੀਤਿਕ ਤੌਰ ’ਤੇ ਤਣਾਅਪੂਰਨ ਸਬੰਧਾਂ ਦਾ ਇਤਿਹਾਸ ਰਿਹਾ ਹੈ।

ਇਨ੍ਹਾਂ ਮੁਲਾਕਾਤਾਂ ਨੇ ਸ਼ਿਵ ਸੈਨਾ (ਯੂ. ਬੀ. ਟੀ.) ਮਨਸੇ ਗੱਠਜੋੜ ਦੀਆਂ ਅਟਕਲਾਂ ਨੂੰ ਤੇਜ਼ ਕਰ ਦਿੱਤਾ ਹੈ। ਸੂਤਰਾਂ ਅਨੁਸਾਰ ਨੇਤਾਵਾਂ ਨੇ ਚੋਣ ਰਣਨੀਤੀ, ਮੁੱਖ ਮੁਹਿੰਮ ਮੁੱਦਿਆਂ ਅਤੇ ਸੰਭਾਵੀ ਗੱਠਜੋੜ ਦੇ ਐਲਾਨ ਦੇ ਸਮੇਂ ’ਤੇ ਵਿਸਥਾਰ ਨਾਲ ਚਰਚਾ ਕੀਤੀ। ਹਾਲਾਂਕਿ ਰਾਜ-ਊਧਵ ਦੀ ਮੁਲਾਕਾਤ ਅਜਿਹੇ ਸਮੇਂ ਹੋਈ ਹੈ ਜਦੋਂ ਕੁਝ ਦਿਨ ਪਹਿਲਾਂ ਹੀ ਇਕ ਕਾਂਗਰਸ ਵਫ਼ਦ ਨੇ ਮਹਾਰਾਸ਼ਟਰ ਵਿਧਾਨ ਸਭਾ ਦੇ ਦੋਵਾਂ ਸਦਨਾਂ ਵਿਚ ਵਿਰੋਧੀ ਧਿਰ ਦੇ ਨੇਤਾ ਦੇ ਖਾਲੀ ਅਹੁਦਿਆਂ ’ਤੇ ਚਰਚਾ ਕਰਨ ਲਈ ਮਾਤੋਸ਼੍ਰੀ ’ਚ ਊਧਵ ਨਾਲ ਮੁਲਾਕਾਤ ਕੀਤੀ ਸੀ।

ਏ. ਆਈ. ਏ. ਡੀ. ਐੱਮ. ਕੇ. ਅਤੇ ਭਾਜਪਾ ਵਿਚਾਲੇ ਫਿਰ ਤਣਾਅ : ਏ. ਆਈ. ਏ. ਡੀ. ਐੱਮ. ਕੇ. ਅਤੇ ਭਾਜਪਾ ਵਿਚਕਾਰ ਗੱਠਜੋੜ ਫਿਰ ਤਣਾਅ ਵਿਚ ਜਾਪਦਾ ਹੈ। ਏ. ਆਈ. ਏ. ਡੀ. ਐੱਮ. ਕੇ. ਨੇ ਪਾਰਟੀ ਦੇ ਜਨਰਲ ਸਕੱਤਰ ਏਡੱਪਾਦੀ ਕੇ. ਪਲਾਨੀਸਵਾਮੀ (ਈ. ਪੀ. ਐੱਸ.) ਦੀ ਅਗਵਾਈ ਵਿਚ ਵਧਦੀ ਦਖਲਅੰਦਾਜ਼ੀ ਦੀ ਸ਼ਿਕਾਇਤ ਕੀਤੀ ਹੈ। ਏ. ਆਈ. ਏ. ਡੀ. ਐੱਮ. ਕੇ. ਦੇ ਅੰਦਰੋਂ ਐੱਨ. ਡੀ. ਏ. ਤੋਂ ਬਾਹਰ ਨਿਕਲਣ ਦੀ ਮੰਗ ਕੀਤੀ ਜਾ ਰਹੀ ਹੈ। ਜਦੋਂ ਕਿ ਸੀਨੀਅਰ ਨੇਤਾ ਕੇ. ਏ. ਸੇਂਗੋਟਾਈਅਨ ਨੇ ਏਡੱਪਾਦੀ ਕੇ. ਪਲਾਨੀਸਵਾਮੀ ਦੇ ਅਧਿਕਾਰ ਨੂੰ ਖੁੱਲ੍ਹ ਕੇ ਚੁਣੌਤੀ ਦਿੱਤੀ ਹੈ ਅਤੇ ਪਾਰਟੀ ਦੀਆਂ ਕਮਜ਼ੋਰੀਆਂ ਨੂੰ ਉਜਾਗਰ ਕਰਨ ਦੀ ਧਮਕੀ ਦਿੱਤੀ ਹੈ। ਦਰ-ਕਿਨਾਰ ਕੀਤੇ ਗਏ ਨੇਤਾਵਾਂ ਨੂੰ ਬਹਾਲ ਕਰਨ ਲਈ ਉਨ੍ਹਾਂ ਦੇ 10 ਦਿਨਾਂ ਦੇ ਅਲਟੀਮੇਟਮ ਅਤੇ ਦਿੱਲੀ ਵਿਚ ਕੇਂਦਰੀ ਮੰਤਰੀ ਅਮਿਤ ਸ਼ਾਹ ਅਤੇ ਨਿਰਮਲਾ ਸੀਤਾਰਮਨ ਨਾਲ ਬਾਅਦ ਵਿਚ ਮੁਲਾਕਾਤਾਂ ਨੇ ਸੰਕਟ ਵਿਚ ਭਾਜਪਾ ਦੀ ਭੂਮਿਕਾ ਬਾਰੇ ਕਿਆਸਅਰਾਈਆਂ ਨੂੰ ਤੇਜ਼ ਕਰ ਦਿੱਤਾ ਹੈ। ਪਾਰਟੀ ਦੇ ਅੰਦਰੂਨੀ ਸੂਤਰਾਂ ਦਾ ਕਹਿਣਾ ਹੈ ਕਿ ਏ. ਆਈ. ਏ. ਡੀ. ਐੱਮ. ਕੇ. ਲੀਡਰਸ਼ਿਪ ਇਕ ਅਸੰਤੁਸ਼ਟ ਨੇਤਾ ਨੂੰ ਸ਼ਾਮਲ ਕਰਨ ਲਈ ਭਾਜਪਾ ਤੋਂ ਨਾਖੁਸ਼ ਹੈ ਅਤੇ ਇਸ ਨੂੰ ਸਹਿਯੋਗੀਆਂ ਵਿਚਕਾਰ ਵਿਸ਼ਵਾਸਘਾਤ ਮੰਨਦੀ ਹੈ। ਹਾਲਾਂਕਿ ਏਡੱਪਾਦੀ ਕੇ. ਪਲਾਨੀਸਵਾਮੀ ਨੇ ਸਾਬਕਾ ਮੰਤਰੀ ਸੇਂਗੋਟਾਈਅਨ ਨੂੰ ਏ. ਆਈ. ਏ. ਡੀ. ਐੱਮ. ਕੇ. ਵਿਚ ਸਾਰੇ ਅਹੁਦਿਆਂ ਤੋਂ ਮੁਕਤ ਕਰ ਦਿੱਤਾ। ਇਹ ਦਰਾਰਾਂ ਸਭ ਤੋਂ ਪਹਿਲਾਂ ਉਦੋਂ ਖੁੱਲ੍ਹ ਕੇ ਸਾਹਮਣੇ ਆਈਆਂ ਜਦੋਂ ਸਾਬਕਾ ਮੁੱਖ ਮੰਤਰੀ ਓ. ਪਨੀਰਸੇਲਵਮ ਨੇ 1 ਸਤੰਬਰ ਨੂੰ ਐੱਨ. ਡੀ. ਏ. ਛੱਡ ਦਿੱਤਾ। ਦੋ ਦਿਨ ਬਾਅਦ 3 ਸਤੰਬਰ ਨੂੰ ਟੀ. ਟੀ. ਵੀ. ਦਿਨਾਕਰਨ ਦੀ ਵਾਰੀ ਸੀ ਅਤੇ ਫਿਰ ਸੇਂਗੋਟਾਈਅਨ ਨੇ ਅੰਨਾਦ੍ਰਮੁਕ ਨੂੰ ਇਕਜੁੱਟ ਕਰਨ ਦਾ ਸੱਦਾ ਦਿੱਤਾ, ਜਿਸ ਕਾਰਨ 7 ਸਤੰਬਰ ਨੂੰ ਉਨ੍ਹਾਂ ਵਿਰੁੱਧ ਈ. ਪੀ. ਐੱਸ . ਨੇ ਕਾਰਵਾਈ ਕੀਤੀ।

ਯਾਦਵ ਭਰਾਵਾਂ ਵਿਚਕਾਰ ਝਗੜੇ ਨੇ ਇਕ ਬਦਸੂਰਤ ਮੋੜ ਲੈ ਲਿਆ : ਜਿਵੇਂ-ਜਿਵੇਂ ਬਿਹਾਰ ਲਈ ਉੱਚ-ਦਾਅ ਵਾਲੀ ਲੜਾਈ ਨੇੜੇ ਆ ਰਹੀ ਹੈ, ਯਾਦਵ ਭਰਾਵਾਂ ਵਿਚਕਾਰ ਝਗੜੇ ਨੇ ਇਕ ਬਦਸੂਰਤ ਮੋੜ ਲੈ ਲਿਆ ਹੈ। ਰਾਸ਼ਟਰੀ ਜਨਤਾ ਦਲ (ਰਾਜਦ) ਦੇ ਮੁਖੀ ਲਾਲੂ ਪ੍ਰਸਾਦ ਯਾਦਵ ਦੇ ਵੱਖ ਹੋਏ ਪੁੱਤਰ ਤੇਜ ਪ੍ਰਤਾਪ ਯਾਦਵ ਨੇ ਆਪਣੇ ਛੋਟੇ ਭਰਾ ਤੇਜਸਵੀ ਯਾਦਵ ’ਤੇ ਵੈਸ਼ਾਲੀ ਜ਼ਿਲੇ ਦੇ ਰਾਘੋਪੁਰ ਦੇ ਦੌਰੇ ਦੌਰਾਨ ਹਮਲਾ ਕੀਤਾ ਜੋ ਵੱਡੇ ਪੱਧਰ ’ਤੇ ਹੜ੍ਹ ਨਾਲ ਜੂਝ ਰਿਹਾ ਹੈ। ਤੇਜ ਪ੍ਰਤਾਪ ਨੇ ਪੀੜਤਾਂ ਵਿਚਾਲੇ ਸੁੱਕਾ ਰਾਸ਼ਨ, ਦਵਾਈਆਂ ਅਤੇ ਜ਼ਰੂਰੀ ਚੀਜ਼ਾਂ ਵੰਡੀਆਂ।

ਸੋਸ਼ਲ ਮੀਡੀਆ ’ਤੇ ਇਕ ਵੀਡੀਓ ਵੀ ਸਾਹਮਣੇ ਆਈ ਹੈ ਜਿਸ ਵਿਚ ਤੇਜ ਪ੍ਰਤਾਪ ਯਾਦਵ ਆਪਣੇ ਭਰਾ ਤੇਜਸਵੀ ਯਾਦਵ ’ਤੇ ਤੰਜ਼ ਕੱਸਦੇ ਹੋਏ ਕਹਿੰਦੇ ਹੋਏ ਦਿਖਾਈ ਦੇ ਰਹੇ ਹਨ ਕਿ ਵਿਧਾਇਕ ਅਸਫਲ ਹੋ ਗਿਆ ਹੈ ਅਤੇ ਗਾਉਣ ਅਤੇ ਨੱਚਣ ਵਿਚ ਰੁੱਝਿਆ ਹੋਇਆ ਹੈ। ਦੱਖਣੀ ਬਿਹਾਰ ਦਾ ਰਾਘੋਪੁਰ ਇਕ ਵੀ. ਆਈ. ਪੀ. ਹਲਕਾ ਅਤੇ ਇਕ ਪਰਿਵਾਰਕ ਗੜ੍ਹ ਹੈ। ਤੇਜਸਵੀ ਯਾਦਵ ਤੋਂ ਪਹਿਲਾਂ ਵਿਧਾਨ ਸਭਾ ਵਿਚ ਇਸ ਹਲਕੇ ਦੀ ਨੁਮਾਇੰਦਗੀ ਉਨ੍ਹਾਂ ਦੇ ਮਾਤਾ-ਪਿਤਾ ਲਾਲੂ ਯਾਦਵ ਅਤੇ ਰਾਬੜੀ ਦੇਵੀ ਦੋਵੇਂ ਕਰਦੇ ਸਨ।

ਰਾਹਿਲ ਨੌਰਾ ਚੋਪੜਾ