‘ਜਾਤ-ਪਾਤ ਦੇ ਵਿਰੁੱਧ’ ‘ਸ਼੍ਰੀ ਨਿਤਿਨ ਗਡਕਰੀ ਦੇ ਵਿਚਾਰ’

ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰੀ ਸ਼੍ਰੀ ਨਿਤਿਨ ਗਡਕਰੀ ਭਾਜਪਾ ਦੇ ਸਪੱਸ਼ਟਵਾਦੀ ਆਗੂਆਂ ’ਚੋਂ ਇਕ ਹਨ, ਜੋ ਆਪਣੇ ਕੰਮ ਦਾ ਪ੍ਰਚਾਰ ਕਰਨ ਦੀ ਥਾਂ ਚੁੱਪਚਾਪ ਕੰਮ ਕਰਨ ਅਤੇ ਸਪੱਸ਼ਟ ਗੱਲਾਂ ਕਹਿਣ ’ਚ ਵਿਸ਼ਵਾਸ ਰੱਖਦੇ ਹਨ। ਇਸੇ ਲਈ ਉਨ੍ਹਾਂ ਦੀ ਸਿਫਤ ਉਨ੍ਹਾਂ ਦੇ ਸਹਿਯੋਗੀ ਹੀ ਨਹੀਂ, ਵਿਰੋਧੀ ਪਾਰਟੀਆਂ ਦੇ ਆਗੂ ਵੀ ਕਰਦੇ ਹਨ।

ਆਪਣੇ ਸਪੱਸ਼ਟਵਾਦੀ ਬਿਆਨਾਂ ਦੀ ਲੜੀ ’ਚ ਹੀ 16 ਮਾਰਚ ਨੂੰ ‘ਨਿਤਿਨ ਗਡਕਰੀ’ ਨੇ ਨਾਗਪੁਰ ਸਥਿਤ ‘ਸੈਂਟਰਲ ਇੰਡੀਆ ਗਰੁੱਪ ਆਫ ਇੰਸਟੀਚਿਊਸ਼ਨਜ਼’ ’ਚ ਹੋਏ ਡਿਗਰੀ ਵੰਡ ਸਮਾਰੋਹ ’ਚ ਜਾਤ ਆਧਾਰਿਤ ਸਿਆਸਤ ਦੇ ਵਿਰੁੱਧ ਸਖਤ ਟਿੱਪਣੀ ਕਰਦੇ ਹੋਏ ਕਿਹਾ, ‘‘ਕਿਸੇ ਵੀ ਵਿਅਕਤੀ ਨਾਲ ਜਾਤ, ਧਰਮ, ਭਾਸ਼ਾ ਜਾਂ ਲਿੰਗ ਦੇ ਆਧਾਰ ’ਤੇ ਵਿਤਕਰਾ ਨਹੀਂ ਕੀਤਾ ਜਾਣਾ ਚਾਹੀਦਾ। ਜਿਹੜਾ ਜਾਤ ਦੀ ਗੱਲ ਕਰੇਗਾ, ਉਸ ਨੂੰ ਕੱਸ ਕੇ ਲੱਤ ਮਾਰਾਂਗਾ, ਚਾਹੇ ਮੇਰਾ ਮੰਤਰੀ ਦਾ ਅਹੁਦਾ ਖੁੱਸ ਜਾਵੇ।’’

ਸ਼੍ਰੀ ਗਡਕਰੀ ਨੇ ਕਿਹਾ, ‘‘ਮੇਰਾ ਮੰਨਣਾ ਹੈ ਕਿ ਕੋਈ ਵੀ ਵਿਅਕਤੀ ਆਪਣੀ ਜਾਤ, ਧਰਮ, ਭਾਸ਼ਾ ਜਾਂ ਪੰਥ ਕਾਰਨ ਵੱਡਾ ਨਹੀਂ ਹੁੰਦਾ ਸਗੋਂ ਉਹ ਆਪਣੇ ਗੁਣਾਂ ਕਾਰਨ ਵੱਡਾ ਹੁੰਦਾ ਹੈ। ਇਸ ਲਈ ਅਸੀਂ ਕਿਸੇ ਨਾਲ ਉਸ ਦੀ ਜਾਤ, ਧਰਮ, ਲਿੰਗ ਜਾਂ ਭਾਸ਼ਾ ਦੇ ਆਧਾਰ ’ਤੇ ਵਿਤਕਰਾ ਨਹੀਂ ਕਰਦੇ।’’

‘‘ਮੈਂ ਸਿਆਸਤ ’ਚ ਹਾਂ ਅਤੇ ਬਹੁਤ ਸਾਰੀਆਂ ਗੱਲਾਂ ਹੁੰਦੀਆਂ ਰਹਿੰਦੀਆਂ ਹਨ ਪਰ ਮੈਂ ਆਪਣੇ ਤਰੀਕੇ ਨਾਲ ਚੱਲਦਾ ਹਾਂ। ਜੇ ਕੋਈ ਮੈਨੂੰ ਵੋਟ ਦੇਣੀ ਚਾਹੁੰਦਾ ਹੈ ਤਾਂ ਦੇ ਸਕਦਾ ਹੈ ਅਤੇ ਜੇ ਕੋਈ ਨਹੀਂ ਦੇਣੀ ਚਾਹੁੰਦਾ ਤਾਂ ਉਹ ਅਜਿਹਾ ਕਰਨ ਲਈ ਵੀ ਆਜ਼ਾਦ ਹੈ।’’

ਉਨ੍ਹਾਂ ਨੇ ਕਿਹਾ,‘‘ਮੇਰੇ ਦੋਸਤ ਮੈਨੂੰ ਪੁੱਛਦੇ ਹਨ ਕਿ ਤੁਸੀਂ ਅਜਿਹਾ ਕਿਉਂ ਕਿਹਾ ਜਾਂ ਅਜਿਹਾ ਰੁਖ ਕਿਉਂ ਅਪਣਾਇਆ? ਮੈਂ ਉਨ੍ਹਾਂ ਨੂੰ ਕਹਿੰਦਾ ਹਾਂ ਕਿ ਚੋਣਾਂ ਹਾਰਨ ਨਾਲ ਕੋਈ ਖਤਮ ਨਹੀਂ ਹੋ ਜਾਂਦਾ। ਮੈਂ ਆਪਣੇ ਸਿਧਾਂਤਾਂ ਨਾਲ ਸਮਝੌਤਾ ਨਹੀਂ ਕਰਾਂਗਾ ਅਤੇ ਨਿੱਜੀ ਜੀਵਨ ’ਚ ਉਨ੍ਹਾਂ ਦੀ ਪਾਲਣਾ ਕਰਦਾ ਰਹਾਂਗਾ।’’

ਸ਼੍ਰੀ ਨਿਤਿਨ ਗਡਕਰੀ ਨੇ ਆਪਣੇ ਉਕਤ ਬਿਆਨ ਨਾਲ ਅੱਜ ਆਜ਼ਾਦੀ ਦੇ 77 ਸਾਲ ਬਾਅਦ ਵੀ ਜਾਰੀ ਜਾਤ-ਪਾਤ ਦੀ ਬੁਰੀ ਪ੍ਰਥਾ ਵੱਲ ਧਿਆਨ ਦਿਵਾਇਆ ਹੈ। ਜੇ ਇਸੇ ਤਰ੍ਹਾਂ ਦੀ ਸੋਚ ਸਾਰੇ ਲੋਕ ਅਪਣਾ ਲੈਣ ਤਾਂ ਦੇਸ਼ ਨੂੰ ਜਾਤ-ਪਾਤ ਦੇ ਸਾਰੇ ਬੰਧਨ ਤੋੜ ਕੇ ਤਰੱਕੀ ਦੀ ਸਿਖਰ ’ਤੇ ਪੁੱਜਣ ’ਚ ਦੇਰ ਨਾ ਲੱਗੇ।

–ਵਿਜੇ ਕੁਮਾਰ

‘ਦਿਨ-ਪ੍ਰਤੀ-ਦਿਨ ਅਪਰਾਧੀਆਂ ਦੇ ਵਧਦੇ ਹੌਸਲੇ’, ‘ਹੁਣ ਕਰ ਰਹੇ ਪੁਲਸ ’ਤੇ ਵੀ ਹਮਲੇ’

ਦੇਸ਼ ’ਚ ਅਪਰਾਧੀਆਂ ਦੇ ਹੌਸਲੇ ਦਿਨ-ਪ੍ਰਤੀ-ਦਿਨ ਵਧਦੇ ਜਾ ਰਹੇ ਹਨ ਅਤੇ ਹੁਣ ਤਾਂ ਅਪਰਾਧੀ ਤੱਤਾਂ ਨੇ ਦਿਨ-ਦਿਹਾੜੇ ਡਿਊਟੀ ਦੇ ਰਹੇ ਪੁਲਸ ਮੁਲਾਜ਼ਮਾਂ ’ਤੇ ਵੀ ਹਮਲੇ ਕਰਨੇ ਸ਼ੁਰੂ ਕਰ ਦਿੱਤੇ ਹਨ ਜਿਸ ਦੀਆਂ ਪਿਛਲੇ ਸਿਰਫ 5 ਦਿਨਾਂ ਦੀ ਮਿਸਾਲਾਂ ਹੇਠਾਂ ਦਰਜ ਹਨ :

* 12 ਮਾਰਚ ਨੂੰ ‘ਅਰਰੀਆ’ (ਬਿਹਾਰ) ’ਚ ਇਕ ਅਪਰਾਧੀ ਨੂੰ ਪੁਲਸ ਟੀਮ ਨਾਲ ਫੜਨ ਗਏ ਏ. ਐੱਸ. ਆਈ. ’ਤੇ ਗੁੱਸੇ ’ਚ ਆਏ ਪਿੰਡ ਵਾਲਿਆਂ ਨੇ ਹਮਲਾ ਕਰ ਕੇ ਉਸ ਦੀ ਜਾਨ ਲੈ ਲਈ।

* 15 ਮਾਰਚ ਨੂੰ ‘ਮੁੰਗੇਰ’ (ਬਿਹਾਰ) ਦੇ ‘ਨੰਦਨਪੁਰ’ ਪਿੰਡ ’ਚ 2 ਧੜਿਆਂ ’ਚ ਹੱਥੋਪਾਈ ਦੇ ਮਾਮਲੇ ਦੀ ਜਾਂਚ ਕਰਨ ਪੁੱਜੇ ਏ. ਐੱਸ. ਆਈ. ‘ਸੰਤੋਸ਼ ਕੁਮਾਰ ਸਿੰਘ’ ’ਤੇ ਇਕ ਧਿਰ ਦੇ ਲੋਕਾਂ ਨੇ ਲੋਹੇ ਦੀ ਰਾਡ ਨਾਲ ਹਮਲਾ ਕਰ ਦਿੱਤਾ ਅਤੇ ਜ਼ਖਮੀ ਹਾਲਤ ’ਚ ਉਸ ਨੂੰ ਘਟਨਾ ਸਥਾਨ ਤੋਂ ਲਗਭਗ 40 ਮੀਟਰ ਤੱਕ ਘਸੀਟ ਕੇ ਕਿਸੇ ਦੂਜੇ ਦੇ ਦਰਵਾਜ਼ੇ ਅੱਗੇ ਸੁੱਟ ਕੇ ਫਰਾਰ ਹੋ ਗਏ ਜਿਸ ਦੇ ਨਤੀਜੇ ਵਜੋਂ ਉਸ ਦੀ ਮੌਤ ਹੋ ਗਈ।

* 15 ਮਾਰਚ ਨੂੰ ਹੀ ‘ਜਹਾਨਾਬਾਦ’ (ਬਿਹਾਰ) ’ਚ ‘ਮਟਕਾ ਤੋੜਨ’ ਨੂੰ ਲੈ ਕੇ ਹੋਏ ਝਗੜੇ ’ਚ ਕੁਝ ਲੋਕਾਂ ਨੇ ਪੁਲਸ ’ਤੇ ਇੱਟਾਂ ਅਤੇ ਪੱਥਰਾਂ ਨਾਲ ਹਮਲਾ ਕਰ ਦਿੱਤਾ ਜਿਸ ਨਾਲ ਇਕ ਪੁਲਸ ਮੁਲਾਜ਼ਮ ਦਾ ਸਿਰ ਫਟ ਗਿਆ ਅਤੇ ਕਈ ਹੋਰ ਜ਼ਖਮੀ ਹੋ ਗਏ।

* 15 ਮਾਰਚ ਨੂੰ ਹੀ ਦਰਜਨਾਂ ਮੋਟਰਸਾਈਕਲਾਂ ’ਤੇ ਆਏ ਨੌਜਵਾਨਾਂ ਨੇ ‘ਊਨਾ’ (ਹਿਮਾਚਲ) ’ਚ ਟ੍ਰੈਫਿਕ ਡਿਊਟੀ ’ਤੇ ਤਾਇਨਾਤ ਹੋਮਗਾਰਡ ਜਵਾਨ ਨਾਲ ਮਾਰਕੁੱਟ ਕੀਤੀ।

* 16 ਮਾਰਚ ਨੂੰ ‘ਭਾਗਲਪੁਰ’ (ਬਿਹਾਰ) ਦੇ ‘ਅੰਤੀਚੱਕ’ ਪਿੰਡ ’ਚ 2 ਧੜਿਆਂ ਦਰਮਿਆਨ ਝਗੜਾ ਖਤਮ ਕਰਨ ਗਈ ਪੁਲਸ ਪਾਰਟੀ ’ਤੇ ਭੀੜ ਦੇ ਹਮਲੇ ’ਚ 5 ਪੁਲਸ ਮੁਲਾਜ਼ਮ ਗੰਭੀਰ ਜ਼ਖਮੀ ਹੋ ਗਏ।

* 16 ਮਾਰਚ ਨੂੰ ਹੀ ‘ਮਊਗੰਜ’ (ਮੱਧ ਪ੍ਰਦੇਸ਼) ’ਚ ਇਕ ਅਗਵਾ ਵਿਅਕਤੀ ਨੂੰ ਛੁਡਵਾਉਣ ਪੁੱਜੀ ਪੁਲਸ ਟੀਮ ’ਤੇ ਇਕ ਸਮੂਹ ਨੇ ਲਾਠੀਆਂ-ਡੰਡਿਆਂ ਅਤੇ ਪੱਥਰਾਂ ਨਾਲ ਹਮਲਾ ਕਰ ਦਿੱਤਾ ਜਿਸ ਨਾਲ ਇਕ ਏ. ਐੱਸ. ਆਈ. ਰਾਮਚਰਨ ਗੌਤਮ ਦੀ ਮੌਤ ਹੋ ਗਈ।

ਡਿਊਟੀ ਨਿਭਾਅ ਰਹੇ ਪੁਲਸ ਮੁਲਾਜ਼ਮਾਂ ’ਤੇ ਹਮਲਿਆਂ ਦੀਆਂ ਉਪਰੋਕਤ ਘਟਨਾਵਾਂ ਤੋਂ ਸਪੱਸ਼ਟ ਹੈ ਕਿ ਅਪਰਾਧੀਆਂ ਦੇ ਹੌਸਲੇ ਕਿੰਨੇ ਵਧਦੇ ਜਾ ਰਹੇ ਹਨ। ਇਨ੍ਹਾਂ ਨੂੰ ਨੱਥ ਪਾਉਣ ਲਈ ਅਜਿਹੇ ਮਾਮਲਿਆਂ ਦੀ ਜਾਂਚ ਤੇਜ਼ ਕਰਨ ਅਤੇ ਅਪਰਾਧੀਆਂ ਨੂੰ ਤੁਰੰਤ ਸਖਤ ਤੋਂ ਸਖਤ ਸਜ਼ਾ ਦੇਣ ਦੀ ਲੋੜ ਹੈ ਤਾਂ ਕਿ ਇਸ ਗਲਤ ਰੁਝਾਨ ’ਤੇ ਰੋਕ ਲੱਗ ਸਕੇ, ਨਹੀਂ ਤਾਂ ਪੁਲਸ ਛੋਟੇ-ਮੋਟੇ ਮਾਮਲਿਆਂ ’ਚ ਦਖਲ ਦੇਣਾ ਹੀ ਬੰਦ ਕਰ ਦੇਵੇਗੀ ਜਿਸ ਨਾਲ ਲੋਕਾਂ ਦੀ ਹੀ ਹਾਨੀ ਹੋਵੇਗੀ।

–ਵਿਜੇ ਕੁਮਾਰ