ਭਾਰਤ ''ਚ  FIFA WC 2026 ਦਾ ਪ੍ਰਸਾਰਣ ਕਰੇਗਾ  Zee

ਮੁੰਬਈ/ਨਵੀਂ ਦਿੱਲੀ : ਭਾਰਤੀ ਫੁੱਟਬਾਲ ਪ੍ਰੇਮੀਆਂ ਲਈ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਜ਼ੀ ਐਂਟਰਟੇਨਮੈਂਟ ਐਂਟਰਪ੍ਰਾਈਜ਼ਿਜ਼ (Zee Entertainment Enterprises) ਨੇ ਭਾਰਤ ਵਿੱਚ ਫੀਫਾ (FIFA) ਦੇ ਵੱਡੇ ਟੂਰਨਾਮੈਂਟਾਂ ਦੇ ਪ੍ਰਸਾਰਣ ਲਈ ਇੱਕ ਇਤਿਹਾਸਕ ਸੌਦਾ ਕੀਤਾ ਹੈ। ਕੰਪਨੀ ਨੇ ਸਾਲ 2034 ਤੱਕ ਦੇ ਸਾਰੇ ਫੀਫਾ ਈਵੈਂਟਾਂ ਦੇ ਮੀਡੀਆ ਅਧਿਕਾਰ ਹਾਸਲ ਕਰ ਲਏ ਹਨ, ਜਿਸ ਵਿੱਚ ਫੀਫਾ ਵਿਸ਼ਵ ਕੱਪ 2026, 2030 ਅਤੇ ਫੀਫਾ ਮਹਿਲਾ ਵਿਸ਼ਵ ਕੱਪ 2027 ਵਰਗੇ ਵੱਕਾਰੀ ਟੂਰਨਾਮੈਂਟ ਸ਼ਾਮਲ ਹਨ।

39 ਗਲੋਬਲ ਫੁੱਟਬਾਲ ਈਵੈਂਟਾਂ ਦਾ ਹੋਵੇਗਾ ਪ੍ਰਸਾਰਣ 
ਇਸ ਭਾਈਵਾਲੀ ਤਹਿਤ ਜ਼ੀ ਅਗਲੇ ਅੱਠ ਸਾਲਾਂ ਵਿੱਚ 39 ਗਲੋਬਲ ਫੁੱਟਬਾਲ ਮੁਕਾਬਲਿਆਂ ਨੂੰ ਭਾਰਤੀ ਦਰਸ਼ਕਾਂ ਤੱਕ ਪਹੁੰਚਾਏਗਾ। ਇਨ੍ਹਾਂ ਵਿੱਚ ਫੀਫਾ ਪੁਰਸ਼ ਅਤੇ ਮਹਿਲਾ ਅੰਡਰ-17 ਅਤੇ ਅੰਡਰ-20 ਵਿਸ਼ਵ ਕੱਪ, ਫੀਫਾ ਫੁਟਸਲ (Futsal) ਵਿਸ਼ਵ ਕੱਪ ਅਤੇ ਫੀਫਾ ਇੰਟਰਕੌਂਟੀਨੈਂਟਲ ਕੱਪ ਵਰਗੇ ਅਹਿਮ ਟੂਰਨਾਮੈਂਟ ਸ਼ਾਮਲ ਹੋਣਗੇ। ਇਸ ਤੋਂ ਇਲਾਵਾ, ਇਨ੍ਹਾਂ ਟੂਰਨਾਮੈਂਟਾਂ ਨਾਲ ਸਬੰਧਤ ਡਾਕੂਮੈਂਟਰੀ ਕੰਟੈਂਟ ਵੀ ਪ੍ਰਸਾਰਿਤ ਕੀਤਾ ਜਾਵੇਗਾ।

ਕਿੱਥੇ ਅਤੇ ਕਦੋਂ ਦੇਖ ਸਕੋਗੇ ਮੈਚ? 
ਫੁੱਟਬਾਲ ਦੇ ਇਸ ਸਫ਼ਰ ਦੀ ਸ਼ੁਰੂਆਤ 11 ਜੂਨ, 2026 ਨੂੰ ਫੀਫਾ ਵਿਸ਼ਵ ਕੱਪ 2026 ਨਾਲ ਹੋਵੇਗੀ।

ਟੈਲੀਵਿਜ਼ਨ : ਮੈਚਾਂ ਦਾ ਪ੍ਰਸਾਰਣ ਜ਼ੀ ਦੇ ਨਵੇਂ ਲਾਂਚ ਕੀਤੇ ਗਏ ਸਪੋਰਟਸ ਨੈੱਟਵਰਕ—Unite8 Sports 1, Unite8 Sports 1 HD, Unite8 Sports 2 ਅਤੇ Unite8 Sports 2 HD—'ਤੇ ਕੀਤਾ ਜਾਵੇਗਾ।

ਡਿਜੀਟਲ ਸਟ੍ਰੀਮਿੰਗ : ਦਰਸ਼ਕ Zee5 ਐਪ 'ਤੇ ਇਨ੍ਹਾਂ ਮੈਚਾਂ ਦੀ ਲਾਈਵ ਸਟ੍ਰੀਮਿੰਗ ਦਾ ਆਨੰਦ ਮਾਣ ਸਕਣਗੇ।

ਸੌਦੇ ਦੀ ਕੀਮਤ ਅਤੇ ਚੁਣੌਤੀਆਂ 
ਰਿਪੋਰਟਾਂ ਅਨੁਸਾਰ, ਫੀਫਾ ਨੇ ਸ਼ੁਰੂ ਵਿੱਚ 2026 ਅਤੇ 2030 ਦੇ ਵਿਸ਼ਵ ਕੱਪਾਂ ਦੇ ਭਾਰਤੀ ਅਧਿਕਾਰਾਂ ਲਈ ਲਗਭਗ 100 ਮਿਲੀਅਨ ਡਾਲਰ ਦੀ ਮੰਗ ਕੀਤੀ ਸੀ, ਪਰ ਲੰਬੀ ਬੋਲੀ ਪ੍ਰਕਿਰਿਆ ਤੋਂ ਬਾਅਦ ਇਸ ਨੂੰ ਘਟਾ ਕੇ ਲਗਭਗ 60 ਮਿਲੀਅਨ ਡਾਲਰ ਕਰ ਦਿੱਤਾ ਗਿਆ। 2026 ਦਾ ਵਿਸ਼ਵ ਕੱਪ ਇਤਿਹਾਸ ਦਾ ਸਭ ਤੋਂ ਵੱਡਾ ਟੂਰਨਾਮੈਂਟ ਹੋਵੇਗਾ, ਜਿਸ ਵਿੱਚ ਪਹਿਲੀ ਵਾਰ 48 ਟੀਮਾਂ ਹਿੱਸਾ ਲੈਣਗੀਆਂ ਅਤੇ ਕੁੱਲ 104 ਮੈਚ ਖੇਡੇ ਜਾਣਗੇ। ਭਾਰਤੀ ਪ੍ਰਸਾਰਕਾਂ ਲਈ ਸਭ ਤੋਂ ਵੱਡੀ ਚੁਣੌਤੀ ਮੈਚਾਂ ਦਾ ਸਮਾਂ ਹੋਵੇਗੀ, ਕਿਉਂਕਿ ਜ਼ਿਆਦਾਤਰ ਮੁਕਾਬਲੇ ਭਾਰਤੀ ਸਮੇਂ ਅਨੁਸਾਰ ਅੱਧੀ ਰਾਤ ਤੋਂ ਸਵੇਰੇ 6 ਵਜੇ ਦੇ ਵਿਚਕਾਰ ਖੇਡੇ ਜਾਣਗੇ।

ਜ਼ੀ ਦਾ ਖੇਡਾਂ ਵੱਲ ਵਧਦਾ ਕਦਮ 
ਜ਼ੀ ਦੇ ਸੀਈਓ ਪੁਨੀਤ ਗੋਇਨਕਾ ਨੇ ਇਸ ਨਿਵੇਸ਼ 'ਤੇ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਫੁੱਟਬਾਲ ਭਾਰਤ ਵਿੱਚ ਤੇਜ਼ੀ ਨਾਲ ਵਧ ਰਿਹਾ ਖੇਡ ਹੈ ਅਤੇ ਇਹ ਸੌਦਾ ਕੰਪਨੀ ਦੇ ਸਪੋਰਟਸ ਪੋਰਟਫੋਲੀਓ ਨੂੰ ਮਜ਼ਬੂਤ ਕਰੇਗਾ। ਫੀਫਾ ਦੇ ਚੀਫ਼ ਬਿਜ਼ਨਸ ਅਫਸਰ ਰੋਮੀ ਗਾਈ ਨੇ ਵੀ ਮੰਨਿਆ ਕਿ ਭਾਰਤ ਫੀਫਾ ਲਈ ਇੱਕ ਰਣਨੀਤਕ ਤੌਰ 'ਤੇ ਮਹੱਤਵਪੂਰਨ ਬਾਜ਼ਾਰ ਹੈ।