ਯਾਰਕਰ ਮੇਰੀ ਖਾਸ ਗੇਂਦ, ਹਾਰਦਿਕ ਭਰਾ ਦੀ ਹੱਲਾਸ਼ੇਰੀ ਨਾਲ ਮਿਲਿਆ ਫਾਇਦਾ : ਪ੍ਰਫੁੱਲ ਹਿੰਗੇ

ਹੈਦਰਾਬਾਦ : ਆਈ.ਪੀ.ਐੱਲ. 2026 ਵਿੱਚ ਆਪਣੇ ਡੈਬਿਊ ਮੈਚ ਵਿੱਚ ਹੀ ਇਤਿਹਾਸ ਰਚਣ ਵਾਲੇ ਸਨਰਾਈਜ਼ਰਜ਼ ਹੈਦਰਾਬਾਦ ਦੇ ਤੇਜ਼ ਗੇਂਦਬਾਜ਼ ਪ੍ਰਫੁੱਲ ਹਿੰਗੇ ਨੇ ਆਪਣੀ ਸਫਲਤਾ ਦਾ ਸਿਹਰਾ ਸਖ਼ਤ ਮਿਹਨਤ ਅਤੇ ਭਾਰਤੀ ਦਿੱਗਜ ਹਾਰਦਿਕ ਪੰਡਯਾ ਤੋਂ ਮਿਲੇ ਪ੍ਰੋਤਸਾਹਨ ਨੂੰ ਦਿੱਤਾ ਹੈ। ਹਿੰਗੇ ਨੇ ਮੰਗਲਵਾਰ ਨੂੰ ਕਿਹਾ ਕਿ ਯਾਰਕਰ ਉਨ੍ਹਾਂ ਦੀ ਸਿਗਨੇਚਰ ਗੇਂਦ ਹੈ ਅਤੇ ਇਸ ਵਿੱਚ ਮੁਹਾਰਤ ਹਾਸਲ ਕਰਨ ਲਈ ਉਨ੍ਹਾਂ ਨੇ ਦਿਨ-ਰਾਤ ਇੱਕ ਕੀਤਾ ਹੈ।

ਹਾਰਦਿਕ ਪੰਡਯਾ ਨਾਲ ਖਾਸ ਮੁਲਾਕਾਤ 
ਪ੍ਰਫੁੱਲ ਹਿੰਗੇ ਨੇ ਦੱਸਿਆ ਕਿ ਵਿਜੇ ਹਜ਼ਾਰੇ ਟਰਾਫੀ ਦੌਰਾਨ ਜਦੋਂ ਉਹ ਹਾਰਦਿਕ ਪੰਡਯਾ ਵਿਰੁੱਧ ਗੇਂਦਬਾਜ਼ੀ ਕਰ ਰਹੇ ਸਨ, ਤਾਂ ਉਹ ਕਾਫੀ ਘਬਰਾਏ ਹੋਏ ਸਨ। ਉਨ੍ਹਾਂ ਨੇ ਕਿਹਾ, "ਮੈਂ ਹਾਰਦਿਕ ਭਾਈ ਨੂੰ ਕੁਝ ਚੰਗੀਆਂ ਯਾਰਕਰਾਂ ਅਤੇ ਬਾਊਂਸਰ ਪਾਏ। ਇੱਕ ਰਨ ਲੈਣ ਤੋਂ ਬਾਅਦ ਉਹ ਮੇਰੇ ਕੋਲ ਆਏ ਅਤੇ ਕਿਹਾ, 'ਪ੍ਰਫੁੱਲ ਭਾਈ, ਸ਼ਾਨਦਾਰ ਗੇਂਦਬਾਜ਼ੀ'"। ਹਾਰਦਿਕ ਦੇ ਇਨ੍ਹਾਂ ਸ਼ਬਦਾਂ ਨੇ ਹਿੰਗੇ ਦਾ ਮਨੋਬਲ ਇੰਨਾ ਵਧਾਇਆ ਕਿ ਉਨ੍ਹਾਂ ਨੂੰ ਆਪਣੇ ਆਪ 'ਤੇ ਭਰੋਸਾ ਹੋ ਗਿਆ ਕਿ ਉਹ ਵੱਡੇ ਮੰਚ 'ਤੇ ਪ੍ਰਦਰਸ਼ਨ ਕਰ ਸਕਦੇ ਹਨ। ਪੰਡਯਾ ਨੇ ਉਸ ਸਮੇਂ ਇਹ ਵੀ ਭਵਿੱਖਬਾਣੀ ਕੀਤੀ ਸੀ ਕਿ ਉਹ ਹਿੰਗੇ ਨੂੰ ਆਈ.ਪੀ.ਐੱਲ. ਵਿੱਚ ਮਿਲਣਗੇ।

ਡੈਬਿਊ ਮੈਚ 'ਚ ਬਣਾਇਆ ਵਿਸ਼ਵ ਰਿਕਾਰਡ 
ਰਾਜਸਥਾਨ ਰਾਇਲਜ਼ ਵਿਰੁੱਧ ਖੇਡੇ ਗਏ ਮੈਚ ਵਿੱਚ ਪ੍ਰਫੁੱਲ ਹਿੰਗੇ ਨੇ 34 ਦੌੜਾਂ ਦੇ ਕੇ 4 ਮਹੱਤਵਪੂਰਨ ਵਿਕਟਾਂ ਝਟਕਾਈਆਂ ਅਤੇ ਆਪਣੀ ਟੀਮ ਦੀ 57 ਦੌੜਾਂ ਨਾਲ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਇਸ ਪ੍ਰਦਰਸ਼ਨ ਦੌਰਾਨ ਉਨ੍ਹਾਂ ਨੇ ਪਾਰੀ ਦੇ ਪਹਿਲੇ ਹੀ ਓਵਰ ਵਿੱਚ 3 ਵਿਕਟਾਂ ਲੈ ਕੇ ਆਈ.ਪੀ.ਐੱਲ. ਇਤਿਹਾਸ ਵਿੱਚ ਇੱਕ ਨਵਾਂ ਰਿਕਾਰਡ ਸਥਾਪਿਤ ਕੀਤਾ ਹੈ। ਉਹ ਅਜਿਹਾ ਕਰਨ ਵਾਲੇ ਦੁਨੀਆ ਦੇ ਪਹਿਲੇ ਗੇਂਦਬਾਜ਼ ਬਣ ਗਏ ਹਨ।