IPL 2026: ''ਮੈਂ ਗੇਂਦ ਨੂੰ ਖੇਡਦਾ ਹਾਂ, ਗੇਂਦਬਾਜ਼ ਨੂੰ ਨਹੀਂ'' : ਵੈਭਵ ਸੂਰਿਆਵੰਸ਼ੀ

ਸਪੋਰਟਸ ਡੈਸਕ : ਗੁਹਾਟੀ ਵਿੱਚ ਖੇਡੇ ਗਏ ਆਈਪੀਐਲ 2026 ਦੇ ਇੱਕ ਅਹਿਮ ਮੁਕਾਬਲੇ ਵਿੱਚ ਰਾਜਸਥਾਨ ਰਾਇਲਜ਼ (RR) ਨੇ ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਨੂੰ 6 ਵਿਕਟਾਂ ਨਾਲ ਹਰਾ ਕੇ ਇੱਕ ਸ਼ਾਨਦਾਰ ਜਿੱਤ ਦਰਜ ਕੀਤੀ ਹੈ 202 ਦੌੜਾਂ ਦੇ ਵੱਡੇ ਟੀਚੇ ਦਾ ਪਿੱਛਾ ਕਰਦਿਆਂ ਰਾਜਸਥਾਨ ਨੇ ਮਹਿਜ਼ 18 ਓਵਰਾਂ ਵਿੱਚ 4 ਵਿਕਟਾਂ ਗੁਆ ਕੇ ਇਹ ਮੈਚ ਆਪਣੇ ਨਾਮ ਕਰ ਲਿਆ।ਇਸ ਜਿੱਤ ਦੇ ਨਾਲ ਰਾਜਸਥਾਨ ਰਾਇਲਜ਼ ਹੁਣ ਅੰਕ ਸੂਚੀ ਵਿੱਚ ਪਹਿਲੇ ਨੰਬਰ 'ਤੇ ਪਹੁੰਚ ਗਈ ਹੈ।

ਸੂਰਿਆਵੰਸ਼ੀ ਦਾ ਤੂਫਾਨੀ ਪ੍ਰਦਰਸ਼ਨ 
ਰਾਜਸਥਾਨ ਦੀ ਇਸ ਜਿੱਤ ਦੇ ਅਸਲੀ ਹੀਰੋ ਨੌਜਵਾਨ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਰਹੇ, ਜਿਨ੍ਹਾਂ ਨੇ ਮੈਦਾਨ ਦੇ ਚਾਰੇ ਪਾਸੇ ਚੌਕਿਆਂ-ਛੱਕਿਆਂ ਦੀ ਬਾਰਿਸ਼ ਕਰਦਿਆਂ ਮਹਿਜ਼ 26 ਗੇਂਦਾਂ ਵਿੱਚ 78 ਦੌੜਾਂ ਦੀ ਤੂਫਾਨੀ ਪਾਰੀ ਖੇਡੀ। ਉਨ੍ਹਾਂ ਦੀ ਇਸ ਪਾਰੀ ਦੀ ਖਾਸ ਗੱਲ ਇਹ ਰਹੀ ਕਿ 15 ਗੇਂਦਾਂ ਵਿੱਚ ਸਿਰਫ਼ ਬਾਊਂਡਰੀਆਂ ਹੀ ਆਈਆਂ, ਜਿਸ ਕਾਰਨ ਪਾਵਰਪਲੇਅ ਵਿੱਚ ਹੀ ਮੈਚ ਪੂਰੀ ਤਰ੍ਹਾਂ ਰਾਜਸਥਾਨ ਦੇ ਹੱਕ ਵਿੱਚ ਮੁੜ ਗਿਆ।

'ਮੈਂ ਗੇਂਦ ਨੂੰ ਖੇਡਦਾ ਹਾਂ, ਗੇਂਦਬਾਜ਼ ਨੂੰ ਨਹੀਂ' 
ਮੈਚ ਤੋਂ ਬਾਅਦ ਸੂਰਿਆਵੰਸ਼ੀ ਨੇ ਆਪਣੀ ਬੱਲੇਬਾਜ਼ੀ ਨੂੰ ਲੈ ਕੇ ਇੱਕ ਵੱਡਾ ਬਿਆਨ ਦਿੱਤਾ। ਉਨ੍ਹਾਂ ਕਿਹਾ, "ਮੈਂ ਬੱਸ ਆਪਣੀ ਤਾਕਤ 'ਤੇ ਭਰੋਸਾ ਕਰਦਾ ਹਾਂ ਅਤੇ ਉਹੀ ਕਰਦਾ ਹਾਂ ਜੋ ਮੈਂ ਪ੍ਰੈਕਟਿਸ ਵਿੱਚ ਕੀਤਾ ਹੈ। ਦਿਮਾਗ ਵਿੱਚ ਜ਼ਰੂਰ ਰਹਿੰਦਾ ਹੈ ਕਿ ਸਾਹਮਣੇ ਕੌਣ ਗੇਂਦਬਾਜ਼ ਹੈ, ਪਰ ਮੈਂ ਗੇਂਦ ਨੂੰ ਖੇਡਦਾ ਹਾਂ, ਗੇਂਦਬਾਜ਼ ਨੂੰ ਨਹੀਂ"।

ਦਿੱਗਜ ਗੇਂਦਬਾਜ਼ਾਂ ਦੀ ਕੀਤੀ ਜੰਮ ਕੇ ਧੁਨਾਈ 
ਸੂਰਿਆਵੰਸ਼ੀ ਨੇ ਭੁਵਨੇਸ਼ਵਰ ਕੁਮਾਰ, ਜੋਸ਼ ਹੇਜ਼ਲਵੁੱਡ ਅਤੇ ਜਸਪ੍ਰੀਤ ਬੁਮਰਾਹ ਵਰਗੇ ਦੁਨੀਆ ਦੇ ਮੰਨੇ-ਪ੍ਰਮੰਨੇ ਗੇਂਦਬਾਜ਼ਾਂ ਵਿਰੁੱਧ ਵੀ ਬੇਖੌਫ਼ ਬੱਲੇਬਾਜ਼ੀ ਕੀਤੀ। ਉਨ੍ਹਾਂ ਨੇ ਭੁਵਨੇਸ਼ਵਰ ਦੇ ਓਵਰ ਵਿੱਚ ਲਗਾਤਾਰ ਚੌਕੇ ਜੜੇ ਅਤੇ ਹੇਜ਼ਲਵੁੱਡ ਦੇ ਇੱਕੋ ਓਵਰ ਵਿੱਚ 19 ਦੌੜਾਂ ਬਣਾ ਕੇ ਆਰਸੀਬੀ 'ਤੇ ਪੂਰੀ ਤਰ੍ਹਾਂ ਦਬਾਅ ਬਣਾ ਦਿੱਤਾ।

ਪਰਿਵਾਰ ਦਾ ਸਹਿਯੋਗ ਅਤੇ ਆਊਟ ਹੋਣ ਦਾ ਮਲਾਲ 
ਆਪਣੀ ਇਸ ਸਫਲਤਾ ਦਾ ਸਿਹਰਾ ਵੈਭਵ ਨੇ ਆਪਣੇ ਪਿਤਾ ਅਤੇ ਕੋਚ ਰੋਮੀ ਸਰ ਨੂੰ ਦਿੱਤਾ ਹੈ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦੇ ਪਿਤਾ ਉਨ੍ਹਾਂ ਨੂੰ ਲਗਾਤਾਰ ਗਾਈਡ ਕਰਦੇ ਰਹਿੰਦੇ ਹਨ। ਹਾਲਾਂਕਿ, 78 ਦੌੜਾਂ 'ਤੇ ਆਊਟ ਹੋਣ ਤੋਂ ਬਾਅਦ ਉਹ ਥੋੜ੍ਹੇ ਨਿਰਾਸ਼ ਵੀ ਨਜ਼ਰ ਆਏ। ਉਨ੍ਹਾਂ ਕਿਹਾ ਕਿ ਜੇਕਰ ਉਹ ਕ੍ਰੀਜ਼ 'ਤੇ ਟਿਕੇ ਰਹਿੰਦੇ ਤਾਂ ਮੈਚ ਇੱਕ-ਦੋ ਓਵਰ ਪਹਿਲਾਂ ਖਤਮ ਹੋ ਸਕਦਾ ਸੀ ਅਤੇ ਅਜਿਹੇ ਢੀਲੇ ਸ਼ਾਟ ਖੇਡ ਕੇ ਆਊਟ ਹੋਣਾ ਉਨ੍ਹਾਂ ਨੂੰ ਪਰੇਸ਼ਾਨ ਕਰਦਾ ਹੈ।

ਧਰੁਵ ਜੁਰੇਲ ਨੇ ਦਿੱਤਾ ਫਿਨਿਸ਼ਿੰਗ ਟੱਚ 
ਸੂਰਿਆਵੰਸ਼ੀ ਦੇ ਆਊਟ ਹੋਣ ਤੋਂ ਬਾਅਦ ਧਰੁਵ ਜੁਰੇਲ ਨੇ ਜ਼ਿੰਮੇਵਾਰੀ ਸੰਭਾਲੀ ਅਤੇ ਨਾਬਾਦ 81 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡ ਕੇ ਟੀਮ ਨੂੰ ਆਸਾਨੀ ਨਾਲ ਜਿੱਤ ਦਿਵਾਈ।