IPL 2023: ਲਖਨਊ ਦੇ ਘਰੇਲੂ ਮੈਦਾਨ ’ਤੇ ਦਿਸਿਆ ‘ਪੀਲਾ ਸਮੁੰਦਰ’, ਪ੍ਰਸ਼ੰਸਕਾਂ ਵੱਲੋਂ ਧੋਨੀ ਨੂੰ ਮਿਲਿਆ ਰੱਝਵਾਂ ਪਿਆਰ
Thursday, May 04, 2023 - 12:49 PM (IST)
ਲਖਨਊ (ਵਾਰਤਾ)- ਇਕਾਨਾ ਸਟੇਡੀਅਮ ਵੈਸੇ ਤਾਂ ਲਖਨਊ ਸੁਪਰ ਜਾਇੰਟਸ ਦਾ ਘਰੇਲੂ ਮੈਦਾਨ ਹੈ ਤੇ ਇਸੇ ਨਾਤੇ ਕਿਸੇ ਵੀ ਵਿਰੋਧੀ ਟੀਮ ਵਿਰੁੱਧ ਉਸ ਨੂੰ ਸਮਰਥਨ ਮਿਲਣਾ ਬਣਦਾ ਹੈ ਪਰ ਜਦੋਂ ਮੈਦਾਨ ’ਤੇ ਮਹਿੰਦਰ ਸਿੰਘ ਧੋਨੀ ਹੋਵੇ ਤਾਂ ਕ੍ਰਿਕਟ ਦੇ ਦੀਵਾਨੇ ਹਰ ਹੱਦ ਟੱਪ ਕੇ ਆਪਣੇ ਚਹੇਤੇ ਕ੍ਰਿਕਟਰ ਲਈ ਸਭ ਕੁਝ ਭੁੱਲਣ ਨੂੰ ਤਿਆਰ ਰਹਿੰਦੇ ਹਨ। ਅਜਿਹਾ ਹੀ ਨਜ਼ਾਰਾ ਬੁੱਧਵਾਰ ਨੂੰ ਅਦਬ ਦੇ ਸ਼ਹਿਰ ਲਖਨਊ ਵਿਚ ਚੇਨਈ ਸੁਪਰ ਕਿੰਗਜ਼ ਤੇ ਲਖਨਊ ਸੁਪਰ ਜਾਇੰਟਸ ਵਿਚਾਲੇ ਮੈਚ ਦੌਰਾਨ ਦੇਖਣ ਨੂੰ ਮਿਲਿਆ।
ਹਜ਼ਾਰਾਂ ਪ੍ਰਸ਼ੰਸਕ ਧੋਨੀ ਨੂੰ ਜੀਅ ਭਰ ਕੇ ਦੇਖਣ ਦੀ ਆਸ ਲਏ ਸਟੇਡੀਅਮ ਵੱਲ ਖਿੱਚੇ ਚੱਲੇ ਆ ਰਹੇ ਸਨ। ਧੋਨੀ ਦੀ 7 ਨੰਬਰ ਦੀ ਜਰਸੀ ਲਈ ਵਿਕ੍ਰੇਤਾਵਾਂ ਨੂੰ ਮੂੰਹ ਮੰਗੇ ਪੈਸੇ ਮਿਲੇ। ਏਕਾਨਾ ਸਟੇਡੀਅਮ ਬੁੱਧਵਾਰ ਨੂੰ ਚੇਨਈ ਸੁਪਰ ਕਿੰਗਜ਼ ਦੇ ਕਪਤਾਨ ਧੋਨੀ ਦੀ 7 ਨੰਬਰ ਦੀ ਜਰਸੀ ਪਹਿਨੇ ਪ੍ਰਸ਼ੰਸਕਾਂ ਨਾਲ ਖਚਾਖਚ ਭਰਿਆ ਹੋਇਆ ਸੀ। ਕ੍ਰਿਕਟ ਦੇ ਦੀਵਾਨੇ ਧੋਨੀ ਨੂੰ ਦੇਖ ਕੇ ਇਹ ਭੁੱਲ ਚੁੱਕੇ ਸਨ ਕਿ ਉਨ੍ਹਾਂ ਨੂੰ ਆਪਣੀ ਟੀਮ ਲਖਨਊ ਨੂੰ ਸਪੋਰਟ ਕਰਨਾ ਹੈ। ਲਖਨਊ ਦੀ ਵਿਕਟ ਡਿੱਗਣ ’ਤੇ ਮੈਦਾਨ ’ਤੇ ਸੰਨਾਟਾ ਨਹੀਂ ਸਗੋਂ ਰੌਲਾ-ਰੱਪਾ ਪੈ ਰਿਹਾ ਸੀ, ਜਿਵੇਂ ਚੇਨਈ ਹੀ ਲਖਨਊ ਦੀ ਘਰੇਲੂ ਟੀਮ ਹੋਵੇ। ਧੋਨੀ ਦੇ ਸਮਰਥਨ ਵਿਚ ਦਰਸ਼ਕ ਵੱਡੇ-ਵੱਡੇ ਪੋਸਟਰ ਤੇ ਬੈਨਰ ਮੈਦਾਨ ’ਤੇ ਲੈ ਕੇ ਆਏ ਸਨ, ਜਿਸ ਨਾਲ ਸਟੇਡੀਅਮ ਪੀਲੇ ਸਮੁੰਦਰ ਵਿਚ ਤਬਦੀਲ ਹੁੰਦਾ ਦਿਸਿਆ। ਇਕਾਨਾ ਦੇ ਮੈਦਾਨ 'ਤੇ ਹਾਲਾਂਕਿ ਮੀਂਹ ਵਿਲਨ ਬਣ ਕੇ ਵਾਰ-ਵਾਰ ਆਇਆ। ਮੀਂਹ ਕਾਰਨ ਮੈਦਾਨ ਗਿੱਲਾ ਹੋਣ ਕਾਰਨ ਮੈਚ ਦੀ ਸ਼ੁਰੂਆਤ ਨਿਰਧਾਰਤ ਸਮੇਂ ਤੋਂ 15 ਮਿੰਟ ਦੇਰੀ ਨਾਲ ਹੋਏ, ਜਦੋਂ ਕਿ ਲਖਨਊ ਸੁਪਰ ਜਾਇੰਟਸ ਦੀ ਪਾਰੀ ਦੇ ਆਖਰੀ ਓਵਰ ਵਿੱਚ ਮੀਂਹ ਨੇ ਫਿਰ ਖਲਲ ਪਾ ਦਿੱਤਾ ਪਰ ਇਸ ਨਾਲ ਪ੍ਰਸ਼ੰਸਕਾਂ ਦਾ ਉਤਸ਼ਾਹ ਘੱਟ ਨਹੀਂ ਹੋਇਆ ਅਤੇ ਉਹ ਪੂਰੇ ਜੋਸ਼ ਨਾਲ ਮੈਦਾਨ 'ਤੇ ਡਟੇ ਰਹੇ।
ਨੋਟ : ਇਸ ਖ਼ਬਰ ਬਾਰੇ ਕੀ ਹੈ ਤੁਹਾਡੀ ਰਾਏ, ਕੁਮੈਂਟ ਕਰਕੇ ਦਿਓ ਜਵਾਬ।
