WPL 2024: ਮੁੰਬਈ ਦੀ ਕਪਤਾਨ ਹਰਮਨਪ੍ਰੀਤ ਕੌਰ RCB ਖਿਲਾਫ ਕਰੇਗੀ ਵਾਪਸੀ

ਬੈਂਗਲੁਰੂ : ਮੁੰਬਈ ਇੰਡੀਅਨਜ਼ ਦੀ ਮੁੱਖ ਕੋਚ ਚਾਰਲੋਟ ਐਡਵਰਡਸ ਨੇ ਕਿਹਾ ਕਿ ਕਪਤਾਨ ਹਰਮਨਪ੍ਰੀਤ ਕੌਰ ਸ਼ਨੀਵਾਰ ਨੂੰ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਦੇ ਖਿਲਾਫ ਅਗਲੇ ਡਬਲਯੂ.ਪੀ.ਐੱਲ. ਮੈਚ ਲਈ ਉਪਲਬਧ ਹੋਵੇਗੀ। ਫਾਰਮ 'ਚ ਚੱਲ ਰਹੀ ਹਰਮਨਪ੍ਰੀਤ ਸੱਟ ਕਾਰਨ ਬੁੱਧਵਾਰ ਨੂੰ ਯੂ. ਪੀ. ਵਾਰੀਅਰਜ਼ ਖਿਲਾਫ ਨਹੀਂ ਖੇਡ ਸਕੀ। ਮੁੰਬਈ ਨੂੰ ਸੱਤ ਵਿਕਟਾਂ ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ।

ਐਡਵਰਡਸ ਨੇ ਮੈਚ ਤੋਂ ਬਾਅਦ ਪ੍ਰੈੱਸ ਕਾਨਫਰੰਸ 'ਚ ਕਿਹਾ, 'ਹਰਮਨ ਅੱਜ ਚੋਣ ਲਈ ਉਪਲਬਧ ਨਹੀਂ ਸੀ ਪਰ ਸ਼ਨੀਵਾਰ ਨੂੰ ਆਰ. ਸੀ. ਬੀ. ਖਿਲਾਫ ਖੇਡੇਗੀ। ਮੈਨੂੰ ਇਸ ਦਾ ਯਕੀਨ ਹੈ। ਹਰਮਨਪ੍ਰੀਤ ਨੇ ਇਸ WPL ਵਿੱਚ ਦੋ ਮੈਚਾਂ ਵਿੱਚ 101 ਦੌੜਾਂ ਬਣਾਈਆਂ ਹਨ। ਮੁੰਬਈ ਨੂੰ ਤਜਰਬੇਕਾਰ ਤੇਜ਼ ਗੇਂਦਬਾਜ਼ ਸ਼ਬਨਮ ਇਸਮਾਈਲ ਦੀ ਵੀ ਕਮੀ ਮਹਿਸੂਸ ਹੋਈ ਹੈ ਜੋ ਜ਼ਖਮੀ ਹੈ। ਐਡਵਰਡਸ ਨੇ ਕਿਹਾ ਕਿ ਉਸ ਦੀ ਫਿਟਨੈੱਸ 'ਤੇ ਨਜ਼ਰ ਰੱਖੀ ਜਾ ਰਹੀ ਹੈ ਪਰ ਉਸ ਲਈ ਆਰ. ਸੀ. ਬੀ. ਖਿਲਾਫ ਖੇਡਣਾ ਮੁਸ਼ਕਲ ਹੈ।

ਉਸ ਨੇ ਕਿਹਾ, 'ਅਸੀਂ ਉਸ ਦੀ ਉਡੀਕ ਕਰ ਰਹੇ ਹਾਂ। ਇਸ ਵਿੱਚ ਜ਼ਿਆਦਾ ਸਮਾਂ ਨਹੀਂ ਲੱਗਣਾ ਚਾਹੀਦਾ ਪਰ ਅਸੀਂ ਕੋਈ ਜੋਖਮ ਨਹੀਂ ਲੈਣਾ ਚਾਹੁੰਦੇ। ਯੂਪੀ ਵਾਰੀਅਰਜ਼ ਦੀ ਵਰਿੰਦਾ ਦਿਨੇਸ਼ ਨੂੰ ਵੀ ਫੀਲਡਿੰਗ ਕਰਦੇ ਸਮੇਂ ਮੋਢੇ 'ਤੇ ਸੱਟ ਲੱਗ ਗਈ ਸੀ ਅਤੇ ਉਸ ਦਾ ਸਕੈਨ ਕੀਤਾ ਗਿਆ ਹੈ, ਜਿਸ ਦੀ ਰਿਪੋਰਟ ਦੀ ਉਡੀਕ ਹੈ।