ਮਹਿਲਾ ਵਿਸ਼ਵ ਕੱਪ : ਦੱਖਣੀ ਅਫਰੀਕਾ ਨੇ ਬੰਗਲਾਦੇਸ਼ ਨੂੰ 32 ਦੌੜਾਂ ਨਾਲ ਹਰਾਇਆ
Saturday, Mar 05, 2022 - 02:41 PM (IST)
ਡੁਨੇਡਿਨ- ਤੇਜ਼ ਗੇਂਦਬਾਜ਼ ਅਯਾਬੋਂਗਾ ਖਾਕਾ ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੀ ਮਦਦ ਨਾਲ ਦੱਖਣੀ ਅਫਰੀਕਾ ਨੇ ਆਈ. ਸੀ. ਸੀ. ਮਹਿਲਾ ਵਨ-ਡੇ ਵਿਸ਼ਵ ਕੱਪ ਦੇ ਆਪਣੇ ਪਹਿਲੇ ਮੈਚ 'ਚ ਸ਼ਨੀਵਾਰ ਨੂੰ ਇੱਥੇ ਬੰਗਲਾਦੇਸ਼ ਨੂੰ 32 ਦੌੜਾਂ ਨਾਲ ਹਰਾਇਆ।
ਬੰਗਲਾਦੇਸ਼ ਦੇ ਸਾਹਮਣੇ 208 ਦੌੜਾਂ ਦਾ ਟੀਚਾ ਸੀ ਪਰ ਖਾਕਾ (32 ਦੌੜਾਂ ਦੇ ਕੇ ਚਾਰ) ਤੇ ਮਸਾਬਾਤਾ ਕਲਾਸ (36 ਦੌੜਾਂ ਦੇ ਕੇ ਦੋ) ਦੀ ਖ਼ਤਰਨਾਕ ਗੇਂਦਬਾਜ਼ੀ ਦੇ ਸਾਹਮਣੇ ਉਸ ਦੀ ਪੂਰੀ ਟੀਮ 49.3 ਓਵਰ 'ਚ 175 ਦੌੜਾਂ 'ਤੇ ਆਲਆਊਟ ਹੋ ਗਈ। ਬੰਗਲਾਦੇਸ਼ ਦੀਆਂ ਪੰਜ ਬੱਲੇਬਾਜ਼ ਸ਼ਮੀਮਾ ਸੁਲਤਾਨਾ (27), ਸ਼ਰਮੀਨ ਅਖ਼ਤਰ (34), ਰੁਮਾਨਾ ਅਹਿਮਦ (21), ਕਪਤਾਨ ਨਿਗਾਰ ਸੁਲਤਾਨਾ (29) ਤੇ ਰਿਤੂ ਸੋਨੀ (27) ਹੀ ਦੋਹੜੇ ਅੰਕ 'ਚ ਪਹੁੰਚੀਆਂ।
ਇਸ ਤੋਂ ਪਹਿਲਾਂ ਦੱਖਣੀ ਅਫਰੀਕਾ ਨੇ ਪਹਿਲਾਂ ਬੱਲੇਬਾਜ਼ੀ ਲਈ ਸੱਦੇ ਜਾਣ 'ਤੇ 49.5 ਓਵਰ 'ਚ 207 ਦੌੜਾਂ ਬਣਾਈਆਂ। ਉਸ ਵਲੋਂ ਲਾਰਾ ਵੋਲਵਾਰਟ ਨੇ 41, ਕਪਤਾਨ ਸੁਨ ਲੁਸ ਨੇ 25, ਮਾਰੀਜਾਨ ਕੈਪ ਨੇ 42 ਤੇ ਚੋਲੇ ਟ੍ਰਾਇਨ ਨੇ 39 ਦੌੜਾਂ ਦਾ ਯੋਗਦਾਨ ਦਿੱਤਾ। ਬੰਗਲਾਦੇਸ਼ ਲਈ ਫਰੀਹਾ ਤ੍ਰਿਸ਼ਣਾ ਨੇ 35 ਦੌੜਾਂ ਦੇ ਕੇ 3 ਵਿਕਟਾਂ ਲਈਆਂ।
