ਵਨਡੇ ਕ੍ਰਿਕਟ ''ਚ ਬਦਲ ਜਾਵੇਗਾ ਇਹ ਵੱਡਾ ਨਿਯਮ! ਐਕਸ਼ਨ ''ਚ ICC

ਨਵੀਂ ਦਿੱਲੀ (ਬਿਊਰੋ)- ਵਨਡੇ ਕ੍ਰਿਕਟ 'ਚ ਬੱਲੇਬਾਜ਼ਾਂ ਦੇ ਦਬਦਬੇ ਨੂੰ ਲੈ ਕੇ ਚੱਲ ਰਹੀਆਂ ਚਿੰਤਾਵਾਂ ਦੇ ਮੱਦੇਨਜ਼ਰ, ਅੰਤਰਰਾਸ਼ਟਰੀ ਕ੍ਰਿਕਟ ਪ੍ਰੀਸ਼ਦ (ਆਈ ਸੀ ਸੀ) 50 ਓਵਰਾਂ ਦੇ ਫਾਰਮੈਟ 'ਚ ਦੋ ਗੇਂਦਾਂ ਦੀ ਵਰਤੋਂ ਦੇ ਨਿਯਮ ਨੂੰ ਬਦਲ ਸਕਦੀ ਹੈ। ਸਾਬਕਾ ਭਾਰਤੀ ਕਪਤਾਨ ਸੌਰਵ ਗਾਂਗੁਲੀ ਦੀ ਅਗਵਾਈ ਵਾਲੀ ਆਈਸੀਸੀ ਕ੍ਰਿਕਟ ਕਮੇਟੀ ਨੇ ਵਨਡੇ ਮੈਚਾਂ 'ਚ ਇੱਕ ਗੇਂਦ ਦੀ ਵਰਤੋਂ ਦੀ ਸਿਫਾਰਸ਼ ਕੀਤੀ ਹੈ। ਦੋ ਨਵੇਂ ਗੇਂਦਾਂ ਦਾ ਨਿਯਮ ਇੱਕ ਦਹਾਕੇ ਤੋਂ ਵੱਧ ਸਮੇਂ ਤੋਂ ਲਾਗੂ ਹੈ। ਇਸ ਸਿਫ਼ਾਰਸ਼ ਨੂੰ ਆਈਸੀਸੀ ਦੇ ਨਿਰਦੇਸ਼ਕ ਬੋਰਡ ਦੁਆਰਾ ਮਨਜ਼ੂਰੀ ਦੇਣੀ ਪਵੇਗੀ ਜਿਸ ਤੋਂ ਬਾਅਦ ਇਸਨੂੰ ਸੋਧੀਆਂ ਹੋਈਆਂ ਖੇਡ ਸ਼ਰਤਾਂ 'ਚ ਸ਼ਾਮਲ ਕੀਤਾ ਜਾਵੇਗਾ। ਆਈਸੀਸੀ ਬੋਰਡ ਐਤਵਾਰ ਨੂੰ ਹਰਾਰੇ 'ਚ ਇਸ ਮੁੱਦੇ 'ਤੇ ਚਰਚਾ ਕਰੇਗਾ। ਇਸ ਵੇਲੇ ਵਨਡੇ ਮੈਚਾਂ 'ਚ ਦੋ ਨਵੀਆਂ ਚਿੱਟੀਆਂ ਕੂਕਾਬੁਰਾ ਗੇਂਦਾਂ ਵਰਤੀਆਂ ਜਾਂਦੀਆਂ ਹਨ। ਗੇਂਦਬਾਜ਼ਾਂ ਵੱਲੋਂ ਹਰੇਕ ਸਿਰੇ ਤੋਂ ਵੱਖ-ਵੱਖ ਨਵੀਆਂ ਗੇਂਦਾਂ ਦੀ ਵਰਤੋਂ ਕਰਨ ਕਾਰਨ, ਗੇਂਦ ਸਖ਼ਤ ਰਹਿੰਦੀ ਹੈ, ਜਿਸ ਨਾਲ ਬੱਲੇਬਾਜ਼ਾਂ ਨੂੰ ਖੁੱਲ੍ਹ ਕੇ ਸਕੋਰ ਕਰਨ ਦਾ ਫਾਇਦਾ ਮਿਲਦਾ ਹੈ।
ਫੀਲਡਿੰਗ ਪਾਬੰਦੀਆਂ (30-ਗਜ਼ ਦੇ ਘੇਰੇ ਤੋਂ ਬਾਹਰ ਸਿਰਫ਼ ਚਾਰ ਫੀਲਡਰ) ਬੱਲੇਬਾਜ਼ਾਂ ਨੂੰ ਗੇਂਦਬਾਜ਼ਾਂ 'ਤੇ ਇੱਕ ਅਨੁਚਿਤ ਫਾਇਦਾ ਦਿੰਦੀਆਂ ਹਨ। ਮਹਾਨ ਸਚਿਨ ਤੇਂਦੁਲਕਰ ਨੇ ਵੀ ਅਕਸਰ ਦੋ ਨਵੀਆਂ ਗੇਂਦਾਂ ਦੇ ਦੌੜਾਂ ਬਣਾਉਣ 'ਤੇ ਪੈਣ ਵਾਲੇ ਪ੍ਰਭਾਵ ਬਾਰੇ ਗੱਲ ਕੀਤੀ ਹੈ। ਆਈਸੀਸੀ ਬੋਰਡ ਦੇ ਇੱਕ ਮੈਂਬਰ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ 'ਤੇ ਪੀਟੀਆਈ ਨੂੰ ਦੱਸਿਆ, "ਆਈਸੀਸੀ ਕ੍ਰਿਕਟ ਕਮੇਟੀ ਨੇ ਤਿੰਨ ਨਿਯਮਾਂ 'ਚ ਬਦਲਾਅ ਦੀ ਸਿਫ਼ਾਰਸ਼ ਕੀਤੀ ਹੈ। ਇੱਕ ਰੋਜ਼ਾ ਕ੍ਰਿਕਟ 'ਚ ਚਿੱਟੀ ਗੇਂਦ ਦੀ ਵਰਤੋਂ, ਟੈਸਟ ਮੈਚਾਂ 'ਚ ਓਵਰ ਰੇਟਾਂ ਦੀ ਜਾਂਚ ਲਈ 'ਕਲਾਕ ਟਾਈਮਰ' ਦੀ ਵਰਤੋਂ ਅਤੇ ਅੰਡਰ-19 ਪੁਰਸ਼ ਵਿਸ਼ਵ ਕੱਪ ਨੂੰ 50 ਓਵਰਾਂ ਤੋਂ ਟੀ-20 'ਚ ਬਦਲਣਾ।" "ਇਸ ਗੱਲ ਦੀ ਸੰਭਾਵਨਾ ਹੈ ਕਿ 25ਵੇਂ ਓਵਰ ਤੱਕ ਦੋ ਗੇਂਦਾਂ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ ਅਤੇ ਉਸ ਤੋਂ ਬਾਅਦ ਗੇਂਦਬਾਜ਼ੀ ਟੀਮ ਨੂੰ ਮੈਚ ਪੂਰਾ ਕਰਨ ਲਈ ਦੋ ਗੇਂਦਾਂ 'ਚੋਂ ਇੱਕ ਰੱਖਣ ਦਾ ਵਿਕਲਪ ਦਿੱਤਾ ਜਾਵੇਗਾ।"
'ਟਾਈਮਰ ਕਲਾਕ' ਦੇ ਮਾਮਲੇ 'ਚ ਓਵਰਾਂ ਵਿਚਕਾਰ 60 ਸਕਿੰਟ ਦਾ ਅੰਤਰ ਦੇਣ ਅਤੇ ਵਨਡੇ 'ਚ 90 ਓਵਰ ਪੂਰੇ ਕਰਨ ਲਈ ਸਮਾਂ ਸੀਮਾ ਨਿਰਧਾਰਤ ਕਰਨ ਦੀ ਸਿਫਾਰਸ਼ ਕੀਤੀ ਜਾਂਦੀ ਹੈ। ਟੀ-20 ਲਈ ਸਲੋਅ ਓਵਰ-ਰੇਟ ਨਿਯਮ ਪਹਿਲਾਂ ਹੀ ਲਾਗੂ ਹੈ ਕਿਉਂਕਿ 19ਵੇਂ ਓਵਰ ਦੇ ਅੰਤ ਤੋਂ ਬਾਅਦ ਟੀਮ ਨੂੰ ਸਰਕਲ ਦੇ ਅੰਦਰ ਇੱਕ ਵਾਧੂ ਫੀਲਡਰ ਲਿਆਉਣ ਦੀ ਲੋੜ ਹੁੰਦੀ ਹੈ। ਆਈਸੀਸੀ ਇਸ ਗੱਲ 'ਤੇ ਵੀ ਵਿਚਾਰ ਕਰੇਗਾ ਕਿ ਕੀ ਅੰਡਰ-19 ਪੁਰਸ਼ ਵਿਸ਼ਵ ਕੱਪ ਨੂੰ ਮੌਜੂਦਾ 50 ਓਵਰਾਂ ਦੇ ਫਾਰਮੈਟ ਦੀ ਬਜਾਏ ਟੀ-20 ਫਾਰਮੈਟ 'ਚ ਕਰਵਾਉਣ ਦੀ ਲੋੜ ਹੈ। ਆਈਸੀਸੀ ਟੂਰਨਾਮੈਂਟਾਂ ਨੂੰ ਛੱਡ ਕੇ, 50 ਓਵਰਾਂ ਦੀਆਂ ਦੁਵੱਲੀਆਂ ਸੀਰੀਜ਼ ਖਤਮ ਹੋਣ ਵਾਲੀਆਂ ਹਨ। ਉਮਰ ਵਰਗ ਪੱਧਰ 'ਤੇ ਟੀ-20 ਵਿਸ਼ਵ ਕੱਪ ਦਾ ਮਤਲਬ ਹੈ ਕਿ ਹੁਣ ਉਨ੍ਹਾਂ ਸਾਰੇ ਦੇਸ਼ਾਂ ਲਈ ਇੱਕ ਵੱਡਾ 'ਟੈਲੇਂਟ ਪੂਲ' ਉਪਲਬਧ ਹੈ ਜਿਨ੍ਹਾਂ ਕੋਲ ਹੁਣ ਫ੍ਰੈਂਚਾਇਜ਼ੀ ਲੀਗ ਹਨ। ਅਗਲਾ ਅੰਡਰ-19 ਵਿਸ਼ਵ ਕੱਪ ਜ਼ਿੰਬਾਬਵੇ ਵਿੱਚ ਹੋਵੇਗਾ।