IND vs AUS: ਆਸਟ੍ਰੇਲੀਆ ਖਿਲਾਫ ਕਿੱਥੇ ਹੋਈ ਗਲਤੀ, ਮੁੱਖ ਕੋਚ ਅਮੋਲ ਮਜੂਮਦਾਰ ਨੇ ਪਾਇਆ ਚਾਨਣ

ਮੁੰਬਈ— ਭਾਰਤੀ ਮਹਿਲਾ ਟੀਮ ਦੇ ਮੁੱਖ ਕੋਚ ਅਮੋਲ ਮਜੂਮਦਾਰ ਨੇ ਮੰਨਿਆ ਕਿ ਆਸਟ੍ਰੇਲੀਆ ਖਿਲਾਫ ਦੂਜੇ ਵਨਡੇ 'ਚ ਫੀਲਡਿੰਗ ਬਹੁਤ ਖਰਾਬ ਰਹੀ ਅਤੇ ਇਸ ਵਿਭਾਗ 'ਚ ਸੁਧਾਰ ਲਈ ਕੰਮ ਕੀਤਾ ਜਾ ਰਿਹਾ ਹੈ। ਇਸ ਕਾਰਨ ਭਾਰਤੀ ਮਹਿਲਾ ਟੀਮ ਨੂੰ ਆਸਟ੍ਰੇਲੀਆ ਖਿਲਾਫ ਲਗਾਤਾਰ ਨੌਵੀਂ ਸੀਰੀਜ਼ 'ਚ ਹਾਰ ਦਾ ਸਾਹਮਣਾ ਕਰਨਾ ਪਿਆ।

ਭਾਰਤ ਨੇ ਸ਼ਨੀਵਾਰ ਨੂੰ ਇੱਥੇ ਫੀਲਡਿੰਗ ਦੀਆਂ ਕਈ ਗਲਤੀਆਂ ਕੀਤੀਆਂ ਅਤੇ ਸੱਤ ਕੈਚ ਛੱਡੇ। ਇਸ ਤੋਂ ਬਾਅਦ ਬੱਲੇਬਾਜ਼ਾਂ ਦੇ ਸੰਘਰਸ਼ ਕਾਰਨ ਟੀਮ ਤਿੰਨ ਦੌੜਾਂ ਨਾਲ ਹਾਰ ਕੇ ਸੀਰੀਜ਼ ਗੁਆ ਬੈਠੀ। ਆਸਟ੍ਰੇਲੀਆ ਨੇ ਭਾਰਤ 'ਚ ਕਦੇ ਵੀ ਵਨਡੇ ਸੀਰੀਜ਼ ਨਹੀਂ ਹਾਰੀ ਹੈ। ਮਜੂਮਦਾਰ ਨੇ ਇੱਥੇ ਵਾਨਖੇੜੇ ਸਟੇਡੀਅਮ 'ਚ ਮੀਡੀਆ ਨੂੰ ਕਿਹਾ, 'ਅਸੀਂ ਫੀਲਡਿੰਗ ਨੂੰ ਮਜ਼ਬੂਤ ਕਰਨ ਦੀ ਪ੍ਰਕਿਰਿਆ 'ਚ ਹਾਂ। ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਸਾਡੀ ਫੀਲਡਿੰਗ ਚੰਗੀ ਨਹੀਂ ਸੀ।

ਉਸ ਨੇ ਕਿਹਾ, 'ਅਸੀਂ ਲਗਭਗ ਛੇ ਕੈਚ ਛੱਡੇ। ਖੇਡਾਂ ਵਿੱਚ ਅਜਿਹਾ ਹਰ ਸਮੇਂ ਹੁੰਦਾ ਹੈ, ਇੱਥੋਂ ਤੱਕ ਕਿ ਵਿਰੋਧੀ ਟੀਮ ਵੀ ਕੁਝ ਕੈਚ ਛੱਡਦੀ ਹੈ। ਪਰ ਅਸੀਂ ਅਜੇ ਵੀ ਇਸ 'ਤੇ ਕੰਮ ਕਰ ਰਹੇ ਹਾਂ। ਜੇਕਰ ਸਾਨੂੰ ਇਸ ਸੀਰੀਜ਼ ਤੋਂ ਬਾਅਦ ਸਮਾਂ ਮਿਲਦਾ ਹੈ ਤਾਂ ਅਸੀਂ ਫੀਲਡਿੰਗ ਅਤੇ ਫਿਟਨੈੱਸ ਨੂੰ ਸੁਧਾਰਨ 'ਚ ਕਾਫੀ ਸਮਾਂ ਬਤੀਤ ਕਰਾਂਗੇ।