ਜਦੋਂ ਅਰਿਜੀਤ ਨੇ ਇਸ ਮਹਿਲਾ ਕ੍ਰਿਕਟਰ ਲਈ ਫੋਨ 'ਤੇ ਗਾਇਆ ਗਾਣਾ (ਦੇਖੋ ਵੀਡੀਓ)

ਨਵੀਂ ਦਿੱਲੀ— 'ਕੌਣ ਬਣੇਗਾ ਕਰੋੜਪਤੀ' ਟੀ.ਵੀ. ਸ਼ੋਅ ਦੀ ਲੋਕਪ੍ਰਿਯਤਾ ਹਰ ਸੀਜ਼ਨ ਦੀ ਤਰ੍ਹਾਂ ਇਸ ਸੀਜ਼ਨ 'ਚ ਵੀ ਕਾਫੀ ਹੈ। ਇਸ ਸ਼ੋਅ 'ਚ ਕਈ ਦਿੱਗਜ ਸਟਾਰ ਸ਼ਿਰਕਤ ਕਰਦੇ ਹਨ। ਜਦਕਿ ਇਸ ਵਾਰ ਮਹਿਲਾ ਕ੍ਰਿਕਟ ਟੀਮ ਨੇ ਇਸ ਸ਼ੋਅ 'ਚ ਆ ਕੇ ਚਾਰ ਚੰਨ ਲਾ ਦਿੱਤੇ। ਹਾਂਜੀ, ਇਸ ਖਾਸ ਐਪੀਸੋਡ 'ਚ ਝੂਲਨ ਗੋਸਵਾਮੀ, ਹਰਮਨਪ੍ਰੀਤ ਕੌਰ, ਸਮ੍ਰਿਤੀ ਮੰਧਾਨਾ, ਮਿਤਾਲੀ ਰਾਜ, ਪੂਨਮ ਰਾਵਤ, ਵੇਦਾ ਕ੍ਰਿਸ਼ਨਮੂਰਤੀ ਨੂੰ ਸ਼ੋਅ ਦੇ ਸੈੱਟ 'ਤੇ ਬਤੌਰ ਗੈਸਟ ਟੀਮ ਬੁਲਾਇਆ ਗਿਆ ਸੀ।
 

ਅਮਿਤਾਭ ਨੇ ਇੱਛਾ ਕੀਤੀ ਪੂਰੀ
ਸ਼ੋਅ ਦੇ ਹੋਸਟ ਅਮਿਤਾਭ ਬੱਚਨ ਨੇ ਬਹੁਤ ਹੀ ਚੰਗੇ ਅੰਦਾਜ਼ 'ਚ ਇਸ ਟੀਮ ਦਾ ਸਵਾਗਤ ਕੀਤਾ ਅਤੇ ਕਈ ਸਵਾਲ ਪੁੱਛਦੇ ਹੋਏ ਟੀਮ ਦਾ ਮਨੋਰੰਜਨ ਵੀ ਕੀਤਾ। ਇਸ ਸ਼ੋਅ 'ਚ ਖਾਸ ਗੱਲ ਇਹ ਰਹੀ ਜਦੋਂ ਬਿਗ ਬੀ ਨੇ ਸਮ੍ਰਿਤੀ ਤੋਂ ਪੁੱਛਿਆ ਕਿ ਤੁਹਾਡਾ ਮਨਪਸੰਦ ਗਾਣਾ ਕਿਹੜਾ ਹੈ ਤਾਂ ਸਮ੍ਰਿਤੀ ਨੇ ਝਟ ਕਹਿ ਦਿੱਤਾ ਕਿ 'ਚੰਨਾ ਮੇਰਿਆ-ਮੇਰਿਆ, ਚੰਨਾ ਮੇਰਿਆ...' ਅਤੇ ਬਿਗ ਬੀ ਨੇ ਉਨ੍ਹਾਂ ਦੀ ਇੱਛਾ ਪੂਰੀ ਕਰਦੇ ਹੋਏ ਅਰਿਜੀਤ ਸਿੰਘ ਨੂੰ ਫੋਨ ਲਗਾਇਆ ਅਤੇ ਗਾਣਾ ਗਾਉਣ ਦੀ ਫਰਮਾਇਸ਼ ਕਰ ਦਿੱਤੀ।

ਇੱਛਾ ਪੂਰੀ ਹੁੰਦੀ ਦੇਖ ਕੇ ਭਾਵੁਕ ਹੋ ਗਈ ਸਮ੍ਰਿਤੀ
ਅਰਿਜੀਤ ਨੇ ਆਪਣੀ ਖੁਸ਼ੀ ਜ਼ਾਹਰ ਕਰਦੇ ਹੋਏ ਤੁਰੰਤ ਹੀ ਗਾਣਾ ਗਾ ਦਿੱਤਾ। ਅਜਿਹਾ ਦੇਖ ਕੇ ਸਮ੍ਰਿਤੀ ਦੀਆਂ ਅੱਖਾਂ 'ਚ ਹੰਝੂ ਆ ਗਏ। ਸ਼ਾਇਦ ਉਨ੍ਹਾਂ ਨੂੰ ਇਸ ਦੀ ਉਮੀਦ ਨਹੀਂ ਸੀ। ਜ਼ਿਕਰਯੋਗ ਹੈ ਕਿ ਮਹਿਲਾ ਕ੍ਰਿਕਟ ਟੀਮ ਨੇ ਮਿਲ ਕੇ 6 ਲੱਖ 40 ਹਜ਼ਾਰ ਰੁਪਏ ਜਿੱਤੇ। ਇਹ ਰਕਮ ਟੀਮ ਇਕ ਗੈਰ ਸਰਕਾਰੀ ਸੰਗਠਨ 'ਪ੍ਰਯਾਸ' ਨੂੰ ਦੇਵੇਗੀ।