ਵੈਭਵ ਸੂਰਿਆਵੰਸ਼ੀ ਨੂੰ ਨਹੀਂ ਮਿਲੀ ਟੀਮ ਇੰਡੀਆ ''ਚ ਜਗ੍ਹਾ, ਆਯੁਸ਼ ਮਹਾਤਰੇ ਵੀ ਬਾਹਰ

ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ ਦੇ ਅਗਲੇ ਸੁਪਰਸਟਾਰ ਮੰਨੇ ਜਾਣ ਵਾਲੇ ਵੈਭਵ ਸੂਰਿਆਵੰਸ਼ੀ ਅਤੇ ਆਯੁਸ਼ ਮਹਾਤਰੇ ਨੂੰ ਲੈ ਕੇ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਇਨ੍ਹਾਂ ਦੋਵਾਂ ਧਾਕੜ ਬੱਲੇਬਾਜ਼ਾਂ ਨੂੰ ਭਾਰਤ ਦੀ ਅੰਡਰ-25 ਟੀਮ ਵਿੱਚ ਜਗ੍ਹਾ ਨਹੀਂ ਮਿਲੀ ਹੈ। ਦੱਸ ਦੇਈਏ ਕਿ ਆਈ. ਪੀ. ਐੱਲ. 2026 ਤੋਂ ਬਾਅਦ ਬੀ. ਸੀ. ਸੀ. ਆਈ. ਬੈਂਗਲੁਰੂ ਦੇ ਸੈਂਟਰ ਆਫ ਐਕਸੀਲੈਂਸ (COE) ਵਿੱਚ ਇੱਕ ਟੂਰਨਾਮੈਂਟ ਕਰਵਾਉਣ ਜਾ ਰਿਹਾ ਹੈ, ਜਿਸ ਦਾ ਮਕਸਦ ਅਗਲੀ ਪੀੜ੍ਹੀ ਦੇ ਟੈਸਟ ਸਿਤਾਰਿਆਂ ਦੀ ਪਛਾਣ ਕਰਨਾ ਹੈ।

ਕਿਉਂ ਬਾਹਰ ਹੋਏ ਸੂਰਿਆਵੰਸ਼ੀ ਅਤੇ ਮਹਾਤਰੇ?
ਪ੍ਰਸ਼ੰਸਕਾਂ ਨੂੰ ਚਿੰਤਾ ਕਰਨ ਦੀ ਲੋੜ ਨਹੀਂ ਹੈ, ਕਿਉਂਕਿ ਇਨ੍ਹਾਂ ਦੋਵਾਂ ਖਿਡਾਰੀਆਂ ਦੇ ਬਾਹਰ ਹੋਣ ਦਾ ਇੱਕ ਖਾਸ ਕਾਰਨ ਹੈ। ਬੀ. ਸੀ. ਸੀ. ਆਈ. ਵੱਲੋਂ ਚੁਣੇ ਜਾਣ ਵਾਲੇ 64 ਖਿਡਾਰੀਆਂ ਵਿੱਚੋਂ 25 ਖਿਡਾਰੀ ਸੀ. ਕੇ. ਨਾਇਡੂ ਅਤੇ ਅੰਡਰ-23 ਟੀਮਾਂ ਵਿੱਚੋਂ ਹੋਣਗੇ, ਜਦਕਿ 25 ਖਿਡਾਰੀ ਰਣਜੀ ਟਰਾਫੀ ਅਤੇ ਹੋਰ ਘਰੇਲੂ ਟੂਰਨਾਮੈਂਟਾਂ ਤੋਂ ਲਏ ਜਾਣਗੇ। ਬਾਕੀ ਬਚੇ 14 ਖਿਡਾਰੀ ਆਈ. ਪੀ. ਐੱਲ. ਵਿੱਚੋਂ ਚੁਣੇ ਜਾਣੇ ਹਨ। ਕਿਉਂਕਿ ਆਯੁਸ਼ ਮਹਾਤਰੇ (ਚੇਨਈ ਸੁਪਰ ਕਿੰਗਜ਼) ਅਤੇ ਵੈਭਵ ਸੂਰਿਆਵੰਸ਼ੀ (ਰਾਜਸਥਾਨ ਰਾਇਲਜ਼) ਇਸ ਸਮੇਂ ਆਈ. ਪੀ. ਐੱਲ. ਖੇਡ ਰਹੇ ਹਨ, ਇਸ ਲਈ ਉਨ੍ਹਾਂ ਦਾ ਨਾਮ ਉਸ 14 ਮੈਂਬਰੀ ਸੂਚੀ ਵਿੱਚ ਸ਼ਾਮਲ ਹੋਣਾ ਲਗਭਗ ਤੈਅ ਹੈ।

ਇਨ੍ਹਾਂ ਖਿਡਾਰੀਆਂ ਨੂੰ ਮਿਲੀ ਜਗ੍ਹਾ
ਬੀ. ਸੀ. ਸੀ. ਆਈ. ਦੀ ਅੰਡਰ-25 ਟੀਮ ਲਈ ਜਿਨ੍ਹਾਂ 25 ਖਿਡਾਰੀਆਂ ਦੀ ਚੋਣ ਕੀਤੀ ਗਈ ਹੈ, ਉਨ੍ਹਾਂ ਵਿੱਚ ਯਸ਼ ਢੁੱਲ, ਆਯੁਸ਼ ਦੋਸੇਜਾ, ਮਯੰਕ ਵਰਮਾ, ਰਾਜ ਲਿੰਭਾਨੀ, ਅਤੇ ਸਿਧਾਰਥ ਦੇਸਾਈ ਵਰਗੇ ਨਾਮ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਆਕਿਬ ਖਾਨ, ਕਾਰਤਿਕ ਯਾਦਵ ਅਤੇ ਹਿਮਾਂਸ਼ੂ ਸਿੰਘ ਨੂੰ ਵੀ ਟੀਮ ਵਿੱਚ ਥਾਂ ਮਿਲੀ ਹੈ। ਇਹ ਟੂਰਨਾਮੈਂਟ ਭਾਰਤੀ ਕ੍ਰਿਕਟ ਦੇ ਭਵਿੱਖ ਲਈ ਬੇਹੱਦ ਅਹਿਮ ਮੰਨਿਆ ਜਾ ਰਿਹਾ ਹੈ, ਜਿੱਥੇ ਚੋਣਕਾਰਾਂ ਦੀ ਨਜ਼ਰ ਨਵੇਂ ਟੈਸਟ ਖਿਡਾਰੀਆਂ ਨੂੰ ਤਿਆਰ ਕਰਨ 'ਤੇ ਹੋਵੇਗੀ।