ਥਾਈਲੈਂਡ ਓਪਨ ਬੈਡਮਿੰਟਨ: ਸਾਤਵਿਕ-ਚਿਰਾਗ ਦੀ ਜੋੜੀ ਦਾ ਜੇਤੂ ਆਗਾਜ਼

ਬੈਂਕਾਕ : ਥਾਈਲੈਂਡ ਓਪਨ ਸੁਪਰ 500 ਟੂਰਨਾਮੈਂਟ ਵਿੱਚ ਭਾਰਤ ਦੀ ਚੋਟੀ ਦੀ ਦਰਜਾ ਪ੍ਰਾਪਤ ਜੋੜੀ ਸਾਤਵਿਕਸਾਈਰਾਜ ਰੰਕੀਰੈੱਡੀ ਅਤੇ ਚਿਰਾਗ ਸ਼ੈੱਟੀ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਪੁਰਸ਼ ਡਬਲਜ਼ ਦੇ ਅਗਲੇ ਦੌਰ ਵਿੱਚ ਜਗ੍ਹਾ ਬਣਾ ਲਈ ਹੈ। ਮੰਗਲਵਾਰ ਨੂੰ ਖੇਡੇ ਗਏ ਪਹਿਲੇ ਦੌਰ ਦੇ ਮੁਕਾਬਲੇ ਵਿੱਚ ਭਾਰਤੀ ਜੋੜੀ ਨੇ ਇੰਡੋਨੇਸ਼ੀਆ ਦੇ ਮੋਹ ਪੁਤਰਾ ਏਰਵਿਆਨਸਿਆ ਅਤੇ ਬਾਗਾਸ ਮੌਲਾਨਾ ਨੂੰ ਇੱਕ ਰੋਮਾਂਚਕ ਮੈਚ ਵਿੱਚ ਸ਼ਿਕਸਤ ਦਿੱਤੀ।

64 ਮਿੰਟ ਚੱਲਿਆ ਸੰਘਰਸ਼ 
ਵਿਸ਼ਵ ਰੈਂਕਿੰਗ ਵਿੱਚ ਚੌਥੇ ਨੰਬਰ 'ਤੇ ਕਾਬਜ਼ ਸਾਤਵਿਕ ਅਤੇ ਚਿਰਾਗ ਨੂੰ ਇਸ ਜਿੱਤ ਲਈ 64 ਮਿੰਟ ਤੱਕ ਸਖ਼ਤ ਮਿਹਨਤ ਕਰਨੀ ਪਈ। ਉਨ੍ਹਾਂ ਨੇ ਇਹ ਮੁਕਾਬਲਾ 21-19, 21-23, 21-10 ਨਾਲ ਆਪਣੇ ਨਾਮ ਕੀਤਾ। ਪਹਿਲਾ ਗੇਮ ਵਿਚ ਭਾਰਤੀ ਜੋੜੀ ਇੱਕ ਸਮੇਂ 11-16 ਨਾਲ ਪਿੱਛੇ ਚੱਲ ਰਹੀ ਸੀ, ਪਰ ਉਨ੍ਹਾਂ ਨੇ ਲਗਾਤਾਰ ਸੱਤ ਅੰਕ ਜਿੱਤ ਕੇ ਜ਼ਬਰਦਸਤ ਵਾਪਸੀ ਕੀਤੀ ਅਤੇ ਪਹਿਲਾ ਗੇਮ 21-19 ਨਾਲ ਜਿੱਤ ਲਿਆ
। ਦੂਜਾ ਗੇਮ ਬਹੁਤ ਹੀ ਕਰੀਬੀ ਰਿਹਾ, ਜਿਸ ਵਿੱਚ ਦੋਵਾਂ ਜੋੜੀਆਂ ਵਿਚਕਾਰ ਲੰਬੀਆਂ ਰੈਲੀਆਂ ਦੇਖਣ ਨੂੰ ਮਿਲੀਆਂ। ਹਾਲਾਂਕਿ, ਭਾਰਤੀ ਖਿਡਾਰੀ ਇਹ ਗੇਮ ਮਾਮੂਲੀ ਫਰਕ ਨਾਲ ਹਾਰ ਗਏ। ਤੀਜੇ ਤੇ ਫੈਸਲਾਕੁੰਨ ਗੇਮ ਵਿੱਚ ਸਾਤਵਿਕ ਅਤੇ ਚਿਰਾਗ ਪੂਰੀ ਤਰ੍ਹਾਂ ਹਾਵੀ ਨਜ਼ਰ ਆਏ। ਉਨ੍ਹਾਂ ਨੇ ਸ਼ੁਰੂਆਤ ਤੋਂ ਹੀ ਬੜ੍ਹਤ ਬਣਾਈ ਅਤੇ 21-10 ਨਾਲ ਆਸਾਨੀ ਨਾਲ ਜਿੱਤ ਦਰਜ ਕੀਤੀ।

ਹੁਣ ਅਗਲੇ ਦੌਰ ਵਿੱਚ ਭਾਰਤੀ ਜੋੜੀ ਦਾ ਸਾਹਮਣਾ ਮਲੇਸ਼ੀਆ ਦੇ ਬ੍ਰਾਇਨ ਜੇਰੇਮੀ ਗੁੰਟਿੰਗ ਅਤੇ ਮੁਹੰਮਦ ਹੈਕਲ ਨਾਲ ਹੋਵੇਗਾ।