T20 World Cup : ਹੋਪ ਦੀ ਧਮਾਕੇਦਾਰ ਪਾਰੀ, ਵੈਸਟਇੰਡੀਜ਼ ਦੀ ਅਮਰੀਕਾ 'ਤੇ ਵੱਡੀ ਜਿੱਤ

ਬ੍ਰਿਜਟਾਊਨ : ਰੋਸਟਨ ਚੇਜ਼ ਅਤੇ ਆਂਦਰੇ ਰਸੇਲ ਦੀ ਸ਼ਾਨਦਾਰ ਗੇਂਦਬਾਜ਼ੀ ਤੋਂ ਬਾਅਦ ਸਲਾਮੀ ਬੱਲੇਬਾਜ਼ ਸ਼ਾਈ ਹੋਪ ਦੀ ਧਮਾਕੇਦਾਰ ਪਾਰੀ ਦੀ ਮਦਦ ਨਾਲ ਵੈਸਟਇੰਡੀਜ਼ ਨੇ ਆਪਣੇ ਸਹਿ-ਮੇਜ਼ਬਾਨ ਅਮਰੀਕਾ ਨੂੰ 55 ਗੇਂਦਾਂ ਬਾਕੀ ਰਹਿੰਦਿਆਂ 9 ਵਿਕਟਾਂ ਨਾਲ ਹਰਾ ਕੇ ਟੀ-20 ਵਿਸ਼ਵ ਕੱਪ 'ਚ ਆਪਣੀਆਂ ਉਮੀਦਾਂ ਨੂੰ ਖੰਭ ਲਗਾਏ। ਵੈਸਟਇੰਡੀਜ਼ ਲਈ ਇਸ ਮੈਚ ਵਿੱਚ ਸਭ ਕੁਝ ਸਕਾਰਾਤਮਕ ਸੀ, ਜੋ ਸੁਪਰ 8 ਦੇ ਗਰੁੱਪ 2 ਦੇ ਆਪਣੇ ਪਹਿਲੇ ਮੈਚ ਵਿੱਚ ਇੰਗਲੈਂਡ ਤੋਂ ਹਾਰ ਗਈ ਸੀ। ਉਸ ਨੇ ਪਹਿਲਾਂ ਟਾਸ ਜਿੱਤ ਕੇ ਗੇਂਦਬਾਜ਼ੀ ਕੀਤੀ ਅਤੇ ਫਿਰ ਅਮਰੀਕਾ ਦੀ ਪੂਰੀ ਟੀਮ ਨੂੰ 19.5 ਓਵਰਾਂ 'ਚ 128 ਦੌੜਾਂ 'ਤੇ ਆਊਟ ਕਰ ਦਿੱਤਾ। ਵੈਸਟਇੰਡੀਜ਼ ਨੇ ਫਿਰ ਹੋਪ ਦੀਆਂ 39 ਗੇਂਦਾਂ 'ਤੇ ਅਜੇਤੂ 82 ਦੌੜਾਂ ਦੀ ਮਦਦ ਨਾਲ ਸਿਰਫ 10.5 ਓਵਰਾਂ 'ਚ ਇਕ ਵਿਕਟ 'ਤੇ 130 ਦੌੜਾਂ ਬਣਾ ਕੇ ਆਪਣੀ ਨੈੱਟ ਰਨ ਰੇਟ 'ਚ ਕਾਫੀ ਸੁਧਾਰ ਕੀਤਾ। ਹੋਪ ਨੇ ਆਪਣੀ ਪਾਰੀ ਵਿੱਚ ਚਾਰ ਚੌਕੇ ਅਤੇ ਅੱਠ ਛੱਕੇ ਜੜੇ।
ਵੈਸਟਇੰਡੀਜ਼ ਨੂੰ ਹੁਣ ਸੈਮੀਫਾਈਨਲ 'ਚ ਜਗ੍ਹਾ ਬਣਾਉਣ ਲਈ ਦੱਖਣੀ ਅਫਰੀਕਾ ਨੂੰ ਹਰਾਉਣਾ ਹੋਵੇਗਾ। ਜੇਕਰ ਇੰਗਲੈਂਡ ਆਪਣੇ ਅਗਲੇ ਮੈਚ ਵਿੱਚ ਅਮਰੀਕਾ ਨੂੰ ਹਰਾਉਂਦਾ ਹੈ ਤਾਂ ਵੀ ਵੈਸਟਇੰਡੀਜ਼ ਅੱਗੇ ਵਧ ਸਕਦਾ ਹੈ ਕਿਉਂਕਿ ਮੌਜੂਦਾ ਸਮੇਂ ਵਿੱਚ ਉਸਦੀ ਨੈੱਟ ਰਨ ਰੇਟ ਦੱਖਣੀ ਅਫਰੀਕਾ ਅਤੇ ਇੰਗਲੈਂਡ ਨਾਲੋਂ ਬਿਹਤਰ ਹੈ। ਜਾਨਸਨ ਚਾਰਲਸ 14 ਗੇਂਦਾਂ 'ਤੇ 15 ਦੌੜਾਂ ਬਣਾ ਕੇ ਆਊਟ ਹੋ ਗਏ ਪਰ ਹੋਪ ਅਤੇ ਨਿਕੋਲਸ ਪੂਰਨ ਨੇ ਦੂਜੀ ਵਿਕਟ ਲਈ ਸਿਰਫ 23 ਗੇਂਦਾਂ 'ਤੇ 63 ਦੌੜਾਂ ਜੋੜ ਕੇ ਟੀਮ ਨੂੰ ਵੱਡੀ ਜਿੱਤ ਦਿਵਾਈ।
ਪੂਰਨ ਨੇ 12 ਗੇਂਦਾਂ 'ਤੇ ਨਾਬਾਦ 27 ਦੌੜਾਂ ਬਣਾਈਆਂ ਜਿਸ 'ਚ ਤਿੰਨ ਛੱਕੇ ਅਤੇ ਇਕ ਚੌਕਾ ਸ਼ਾਮਲ ਸੀ। ਉਹ ਇਸ ਟੂਰਨਾਮੈਂਟ 'ਚ ਹੁਣ ਤੱਕ 17 ਛੱਕੇ ਲਗਾ ਚੁੱਕੇ ਹਨ, ਜੋ ਕਿ ਕਿਸੇ ਵੀ ਟੀ-20 ਵਿਸ਼ਵ ਕੱਪ 'ਚ ਨਵਾਂ ਰਿਕਾਰਡ ਹੈ। ਪੂਰਨ ਨੇ ਵੈਸਟਇੰਡੀਜ਼ ਦੇ ਆਪਣੇ ਸਾਬਕਾ ਸਾਥੀ ਕ੍ਰਿਸ ਗੇਲ ਦਾ ਰਿਕਾਰਡ ਤੋੜਿਆ, ਜਿਸ ਨੇ 2012 'ਚ 16 ਛੱਕੇ ਲਗਾਏ ਸਨ। ਹੋਪ ਨੇ ਸ਼ੁਰੂ ਤੋਂ ਹੀ ਹਮਲਾਵਰ ਰੁਖ ਅਪਣਾਇਆ ਅਤੇ ਚਾਰਲਸ ਨਾਲ ਪਹਿਲੀ ਵਿਕਟ ਲਈ 67 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਉਸਨੇ ਖੁੱਲ ਕੇ ਛੱਕੇ ਮਾਰਨ ਦੇ ਆਪਣੇ ਹੁਨਰ ਦਾ ਪ੍ਰਦਰਸ਼ਨ ਕੀਤਾ ਅਤੇ ਆਪਣੀ ਪਾਰੀ ਦੌਰਾਨ ਮਿਲਿੰਦ ਕੁਮਾਰ 'ਤੇ ਲਗਾਤਾਰ ਤਿੰਨ ਛੱਕੇ ਵੀ ਲਗਾਏ।
ਹੋਪ ਨੇ ਜੇਤੂ ਛੱਕਾ ਲਗਾ ਕੇ ਵੈਸਟਇੰਡੀਜ਼ ਨੂੰ ਟੀਚੇ ਤੱਕ ਪਹੁੰਚਾਇਆ। ਇਸ ਤੋਂ ਪਹਿਲਾਂ ਬੱਲੇਬਾਜ਼ੀ ਦਾ ਸੱਦਾ ਮਿਲਣ 'ਤੇ ਅਮਰੀਕਾ ਨੇ ਸਟੀਵਨ ਟੇਲਰ (02) ਦਾ ਵਿਕਟ ਜਲਦੀ ਗੁਆ ਦਿੱਤਾ ਪਰ ਇਸ ਤੋਂ ਬਾਅਦ ਐਂਡਰੀਆਸ ਗੌਸ (29) ਅਤੇ ਨਿਤੀਸ਼ ਕੁਮਾਰ (20) ਨੇ ਦੂਜੀ ਵਿਕਟ ਲਈ 48 ਦੌੜਾਂ ਜੋੜ ਕੇ ਟੀਮ ਨੂੰ ਸ਼ੁਰੂਆਤੀ ਝਟਕੇ ਤੋਂ ਉਭਾਰਿਆ। ਚੇਜ਼ (19 ਦੌੜਾਂ 'ਤੇ 3 ਵਿਕਟਾਂ) ਨੇ ਮੱਧ ਓਵਰਾਂ 'ਚ ਸ਼ਾਨਦਾਰ ਗੇਂਦਬਾਜ਼ੀ ਕੀਤੀ ਅਤੇ ਅਮਰੀਕਾ ਦੀ ਪਾਰੀ 37 ਦੌੜਾਂ 'ਤੇ ਪੰਜ ਵਿਕਟਾਂ ਗੁਆ ਬੈਠੀ।
ਚੇਜ਼ ਨੇ ਵੀ ਆਪਣੇ ਕਰੀਅਰ ਦਾ ਸਰਵੋਤਮ ਪ੍ਰਦਰਸ਼ਨ ਦਿੱਤਾ। ਰਸਲ ਨੇ 31 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਲਈਆਂ ਅਤੇ ਟੀ-20 ਵਿਸ਼ਵ ਕੱਪ ਵਿੱਚ ਵੈਸਟਇੰਡੀਜ਼ ਲਈ ਸਭ ਤੋਂ ਵੱਧ ਵਿਕਟਾਂ (27) ਲੈਣ ਦੇ ਡਵੇਨ ਬ੍ਰਾਵੋ ਦੇ ਰਿਕਾਰਡ ਦੀ ਬਰਾਬਰੀ ਕੀਤੀ। ਮਿਲਿੰਦ ਕੁਮਾਰ (19) ਅਤੇ ਸ਼ੈਡਲੇ ਵੈਨ ਸ਼ਾਲਕਵਿਕ (18) ਨੇ ਅਮਰੀਕਾ ਲਈ ਕੁਝ ਸਮਾਂ ਸੰਘਰਸ਼ ਕੀਤਾ ਜਦੋਂ ਕਿ ਅਲੀ ਖਾਨ (ਅਜੇਤੂ 14) ਨੇ ਅੰਤ ਵਿੱਚ ਇੱਕ ਚੌਕਾ ਅਤੇ ਇੱਕ ਛੱਕਾ ਲਗਾਇਆ ਪਰ ਉਹ ਵੈਸਟਇੰਡੀਜ਼ ਨੂੰ ਵੱਡਾ ਟੀਚਾ ਨਹੀਂ ਦੇ ਸਕੇ। ਵੈਸਟਇੰਡੀਜ਼ ਲਈ ਚੇਜ਼ ਅਤੇ ਰਸਲ ਤੋਂ ਇਲਾਵਾ ਅਲਜ਼ਾਰੀ ਜੋਸੇਫ ਨੇ 31 ਦੌੜਾਂ ਦੇ ਕੇ ਦੋ ਵਿਕਟਾਂ ਅਤੇ ਗੁਦਾਕੇਸ਼ ਮੋਤੀ ਨੇ 14 ਦੌੜਾਂ ਦੇ ਕੇ ਇਕ ਵਿਕਟ ਲਈ।