ਗਲਾਡਾ ''ਚ ਕਰੋੜਾਂ ਦੀ ਪ੍ਰਾਪਰਟੀ ਹੜੱਪਣ ਦੀ ਵੱਡੀ ਖੇਡ, ਜਾਅਲੀ ਦਸਤਾਵੇਜ਼ਾਂ ਨਾਲ ਅਲਾਟ ਕਰਵਾਇਆ ਮਕਾਨ

ਲੁਧਿਆਣਾ (ਰਾਜ) : ਗਲਾਡਾ ਵਿਚ ਜਾਅਲੀ ਦਸਤਾਵੇਜ਼ਾਂ ਦੇ ਸਹਾਰੇ ਸਰਕਾਰੀ ਜਾਇਦਾਦਾਂ ’ਤੇ ਕਬਜ਼ਾ ਕਰਨ ਦਾ ਇਕ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਸ਼ਾਤਰ ਜਾਅਲਸਾਜ਼ਾਂ ਨੇ ਦਫਤਰ ਦੇ ਰਿਕਾਰਡ ਵਿਚ ਹੇਰਾਫੇਰੀ ਕਰਕੇ ਨਾ ਸਿਰਫ ਫਰਜ਼ੀ ਅਲਾਟਮੈਂਟ ਲੈਟਰ ਤਿਆਰ ਕੀਤੇ, ਸਗੋਂ ਲੱਖਾਂ ਰੁਪਏ ਦੀਆਂ ਬੈਂਕ ਰਸੀਦਾਂ ਵੀ ਜਾਅਲੀ ਬਣਾ ਦਿੱਤੀਆਂ। ਇਸ ਧੋਖਾਦੇਹੀ ਦਾ ਖੁਲਾਸਾ ਹੋਣ ਤੋਂ ਬਾਅਦ ਗਲਾਡਾ ਦੇ ਅਫਸਰ ਦੀ ਸ਼ਿਕਾਇਤ ’ਤੇ ਥਾਣਾ ਸਰਾਭਾ ਨਗਰ ਦੀ ਪੁਲਸ ਨੇ ਅਣਪਛਾਤੇ ਮੁਲਜ਼ਮਾਂ ਖਿਲਾਫ ਕੇਸ ਦਰਜ ਕਰ ਕੇ ਤਫਤੀਸ਼ ਸ਼ੁਰੂ ਕਰ ਦਿੱਤੀ ਹੈ। ਜਾਣਕਾਰੀ ਮੁਤਾਬਕ ਮਾਮਲੇ ਦਾ ਖੁਲਾਸਾ ਉਦੋਂ ਹੋਇਆ ਜਦੋਂ ਗਲਾਡਾ ਦਫਤਰ ਨੂੰ ਸ਼ਿਕਾਇਤ ਨੰਬਰ 1080 (10 ਮਾਰਚ 2026) ਨੂੰ ਪ੍ਰਾਪਤ ਹੋਈ। ਜਾਂਚ ਵਿਚ ਪਾਇਆ ਗਿਆ ਕਿ ਅਣਪਛਾਤੇ ਵਿਅਕਤੀ ਨੇ ਮਕਾਨ ਨੰ. 273, ਐੱਮਆਈ.ਜੀ. ਫਲੈਟ, ਫੇਸ-3, ਦੁੱਗਰੀ ਨੂੰ ਮਹਿੰਦਰ ਸਿੰਘ ਦੇ ਨਾਮ ’ਤੇ ਅਲਾਟ ਦਿਖਾਉਣ ਲਈ ਇਕ ਫਰਜ਼ੀ ਪੱਤਰ (ਨੰਬਰ 7184, ਦਿਨ 20/11/1998) ਤਿਆਰ ਕੀਤਾ ਗਿਆ ਸੀ।

ਇਹ ਵੀ ਪੜ੍ਹੋ : ਹਲਵਾਰਾ ਹਵਾਈ ਅੱਡੇ ਤੋਂ ਉਡਾਣਾਂ ਲਈ ਰਾਹ ਪੱਧਰਾ, ਏਅਰ ਇੰਡੀਆ ਵੱਲੋਂ ਹਫ਼ਤੇ 'ਚ 14 ਉਡਾਣਾਂ ਦਾ ਪ੍ਰਸਤਾਵ

ਜਦੋਂ ਵਿਭਾਗ ਨੇ ਆਪਣੇ ਰਿਕਾਰਡ ਦੀ ਗਹਿਰਾਈ ਨਾਲ ਪੜਤਾਲ ਕੀਤੀ ਤਾਂ ਪਤਾ ਲੱਗਾ ਕਿ ਇਸ ਪ੍ਰਾਪਰਟੀ ਨਾਲ ਸਬੰਧਤ ਕੋਈ ਵੀ ਰਕਮ ਗਲਾਡਾ ਦੇ ਖਾਤੇ ਵਿਚ ਜਮ੍ਹਾ ਹੀ ਨਹੀਂ ਹੋਈ ਸੀ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਜਾਅਲਸਾਜ਼ਾਂ ਨੇ ਵਿਭਾਗ ਦੀਆਂ ਅੱਖਾਂ ਵਿਚ ਧੂੜ ਝੋਕਣ ਲਈ ਰਸੀਦ ਬੁਕ ਨੰਬਰ 1305 ਅਤੇ ਰਸੀਦ ਨੰਬਰ 60 (ਦਿਨ 01//12/1998) ਦੀਆਂ ਜਾਲੀ ਕਾਪੀਆਂ ਫਾਇਲ ਵਿਚ ਲਗਾ ਦਿੱਤੀਆਂ ਸਨ। ਇਨ੍ਹਾਂ ਵਿਚ 300000 ਰੁਪਏ ਤੇ 1,34,000 ਰੁਪਏ (ਕੁਲ 4.34 ਲੱਖ ਰੁਪਏ) ਦੇ ਡ੍ਰਾਫਟ ਜਮ੍ਹਾ ਹੋਣ ਦਾ ਦਾਅਵਾ ਕੀਤਾ ਗਿਆ ਸੀ। ਅਕਾਊਂਟ ਸ਼ਾਖਾ ਦੀ ਰਿਪੋਰਟ ਵਿਚ ਸਾਫ ਹੋਇਆ ਕਿ ਗਲਾਡਾ ਦੇ ਬੈਂਕ ਖਾਤੇ ਵਿਚ ਅਜਿਹੀ ਕੋਈ ਰਾਸ਼ੀ ਕਦੇ ਆਈ ਹੀ ਨਹੀਂ। ਇੰਨਾ ਹੀ ਨਹੀਂ ਮਕਾਨ ਦੇ ਕਬਜ਼ੇ ਨਾਲ ਜੁੜੇ ਦਸਤਾਵੇਜ਼ ਵੀ ਪੂਰੀ ਤਰ੍ਹਾਂ ਫਰਜ਼ੀ ਪਾਏ ਗਏ। ਹਾਲ ਦੀ ਘੜੀ ਗਲਾਡਾ ਅਧਿਕਾਰੀਆਂ ਦੀ ਸ਼ਿਕਾਇਤ ’ਤੇ ਪੁਲਸ ਨੇ ਅਣਪਛਾਤੇ ਦੋਸ਼ੀਆਂ ਖਿਲਾਫ ਕੇਸ ਦਰਜ ਕਰ ਲਿਆ ਹੈ। 

ਪੁਲਸ ਨੂੰ ਸ਼ੱਕ ਹੈ ਕਿ ਇਸ ਵੱਡੀ ਖੇਡ ਵਿਚ ਵਿਭਾਗ ਦੇ ਹੀ ਕਿਸੇ ਅੰਦਰੂਨੀ ਅਧਿਕਾਰੀ ਜਾਂ ਪੁਰਾਣੇ ਮੁਲਾਜ਼ਮ ਦਾ ਹੱਥ ਹੋ ਸਕਦਾ ਹੈ ਜਿਸ ਨੇ ਦਹਾਕਿਆਂ ਪੁਰਾਣੇ ਰਿਕਾਰਡ ਵਿਚ ਸੰਨ੍ਹ ਲਾਈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜਾਂਚ ਦੌਰਾਨ ਕਈ ਹੋਰ ਵੱਡੇ ਨਾਵਾਂ ਦਾ ਖੁਲਾਸਾ ਹੋ ਸਕਦਾ ਹੈ ਜਿਨ੍ਹਾਂ ਨੇ ਜਾਅਲੀ ਕਾਗਜ਼ਾਂ ਦੇ ਜ਼ੋਰ ’ਤੇ ਬੇਸ਼ਕੀਮਤੀ ਜਾਇਦਾਦਾਂ ’ਤੇ ਕੁੰਡਲੀ ਮਾਰ ਰੱਖੀ ਹੈ।

ਇਹ ਵੀ ਪੜ੍ਹੋ : ਜੰਗ ਦਾ ਅਸਰ: ਜੈੱਟ ਫਿਊਲ ਦੀਆਂ ਕੀਮਤਾਂ 'ਚ ਰਿਕਾਰਡ 58% ਦਾ ਉਛਾਲ, ਹਵਾਈ ਸਫ਼ਰ ਹੋਵੇਗਾ ਹੋਰ ਮਹਿੰਗਾ

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8