RCB vs MI : ਕੋਹਲੀ ਦਾ ਫਲਾਪ ਸ਼ੋਅ ਜਾਰੀ, ਤਿੰਨ ਮੈਚਾਂ ''ਚ ਬਣਾਈਆਂ 18 ਦੌੜਾਂ
09/28/2020 9:46:23 PM
ਦੁਬਈ- ਇੰਡੀਅਨ ਪ੍ਰੀਮੀਅਰ ਲੀਗ ਦੇ 13ਵੇਂ ਸੀਜ਼ਨ 'ਚ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਦੇ ਕਪਤਾਨ ਵਿਰਾਟ ਕੋਹਲੀ ਦਾ ਫਲਾਪ ਸ਼ੋਅ ਜਾਰੀ ਹੈ। ਅੱਜ ਮੁੰਬਈ ਇੰਡੀਅਨਜ਼ ਵਿਰੁੱਧ ਖੇਡੇ ਜਾ ਰਹੇ ਮੈਚ 'ਚ ਵੀ ਉਹ ਸਿਰਫ 11 ਗੇਂਦਾਂ 'ਚ ਤਿੰਨ ਦੌੜਾਂ ਹੀ ਬਣਾ ਸਕੇ। ਇਸ ਦੌਰਾਨ ਉਸਦਾ ਸਟ੍ਰਾਈਕ ਰੇਟ ਵੀ ਸਿਰਫ 27.27 ਦਾ ਰਿਹਾ। ਇਸ ਸੀਜ਼ਨ 'ਚ ਕੋਹਲੀ ਹੁਣ ਤੱਕ ਤਿੰਨ ਮੈਚਾਂ 'ਚ ਸਿਰਫ 18 ਦੌੜਾਂ ਹੀ ਬਣਾ ਸਕਿਆ ਹੈ। ਇਸ ਤੋਂ ਪਹਿਲਾਂ ਦੋ ਮੈਚਾਂ 'ਚ ਵੀ ਕੋਹਲੀ ਦਾ ਬੱਲਾ ਖਾਮੋਸ਼ ਰਿਹਾ ਸੀ। ਇਸ ਸੀਜ਼ਨ ਦੇ ਆਪਣੇ ਪਹਿਲੇ ਮੈਚ 'ਚ ਹੈਦਰਾਬਾਦ ਵਿਰੁੱਧ ਉਹ ਸਿਰਫ 14 ਦੌੜਾਂ ਹੀ ਬਣਾ ਸਕੇ ਸਨ। ਇਸ ਤੋਂ ਬਾਅਦ ਕਿੰਗਜ਼ ਇਲੈਵਨ ਪੰਜਾਬ ਵਿਰੁੱਧ ਮੈਚ 'ਚ ਵੀ ਉਹ ਸਿਰਫ ਇਕ ਦੌੜ ਬਣਾ ਕੇ ਪਵੇਲੀਅਨ ਵਾਪਸ ਚੱਲ ਗਏ ਸਨ। ਇਸ ਤਰ੍ਹਾਂ ਕੋਹਲੀ ਨੇ ਆਈ. ਪੀ. ਐੱਲ. 'ਚ ਹੁਣ ਤੱਕ ਤਿੰਨ ਮੈਚਾਂ 'ਚ 29 ਗੇਂਦਾਂ 'ਚ 18 ਦੌੜਾਂ ਬਣਾਈਆਂ ਹਨ।
ਹਾਲਾਂਕਿ, ਮੁੰਬਈ ਵਿਰੁੱਧ ਮੈਚ 'ਚ ਕੋਹਲੀ ਦੇ ਖਰਾਬ ਪ੍ਰਦਰਸ਼ਨ ਦੇ ਬਾਵਜੂਦ ਉਸਦੀ ਟੀਮ ਆਰ. ਸੀ. ਬੀ. ਮਜ਼ਬੂਤ ਸਥਿਤੀ 'ਚ ਹੈ। ਬੈਂਗਲੁਰੂ ਦੇ ਲਈ ਇਸ ਮੈਚ 'ਚ ਉਸ ਦੇ ਦੋਵੇਂ ਸਲਾਮੀ ਬੱਲੇਬਾਜ਼ਾਂ ਨੇ ਅਰਧ ਸੈਂਕੜੇ ਲਗਾਏ। ਆਰੋਨ ਫਿੰਚ ਨੇ ਜਿੱਥੇ 35 ਗੇਂਦਾਂ 'ਚ 52 ਦੌੜਾਂ ਦੀ ਪਾਰੀ ਖੇਡੀ, ਉੱਥੇ ਹੀ ਦੇਵਦੱਤ ਨੇ 40 ਗੇਂਦਾਂ 'ਚ 54 ਦੌੜਾਂ ਬਣਾਈਆਂ।
