ਸੁਪਰਬੇਟ ਕਲਾਸਿਕ ਸ਼ਤਰੰਜ ਦੇ ਆਖਰੀ ਚਾਰ ਦੌਰ ''ਚ ਪ੍ਰਗਨਾਨੰਦਾ ਤੇ ਗੁਕੇਸ਼ ਲਗਾਉਣਗੇ ਸਿਖਰ ''ਤੇ ਪਹੁੰਚਣ ਦਾ ਜ਼ੋਰ

ਬੁਕਾਰੇਸਟ (ਰੋਮਾਨੀਆ)- ਜਦੋਂ ਗ੍ਰੈਂਡਮਾਸਟਰ ਆਰ ਪ੍ਰਗਿਆਨੰਦਾ ਅਤੇ ਡੀ ਗੁਕੇਸ਼ ਸੁਪਰਬੇਟ ਕਲਾਸਿਕ ਸ਼ਤਰੰਜ ਟੂਰਨਾਮੈਂਟ ਵਿਚ ਇਕ ਦਿਨ ਦੇ ਆਰਾਮ ਤੋਂ ਬਾਅਦ ਆਪੋ-ਆਪਣੇ ਛੇਵੇਂ ਦੌਰ ਦੇ ਮੈਚਾਂ ਵਿਚ ਪ੍ਰਵੇਸ਼ ਕਰਨਗੇ ਤਾਂ ਉਨ੍ਹਾਂ ਨੂੰ ਸਿਖਰ 'ਤੇ ਪਹੁੰਚਣ ਲਈ ਆਖਰੀ ਚਾਰ ਦੌਰ ਵਿਚ ਆਪਣੀ ਖੇਡ ਦੇ ਪੱਧਰ ਹੋਰ ਉੱਚਾ ਚੁੱਕਣਾ ਹੋਵੇਗਾ। ਨੌਂ ਗੇੜ ਦੇ ਟੂਰਨਾਮੈਂਟ ਵਿੱਚ ਪੰਜ ਰਾਊਂਡ ਤੋਂ ਬਾਅਦ ਦੋਵੇਂ ਭਾਰਤੀ ਤਿੰਨ-ਤਿੰਨ ਅੰਕਾਂ ਨਾਲ ਸਾਂਝੇ ਦੂਜੇ ਸਥਾਨ ’ਤੇ ਹਨ। ਅਮਰੀਕਾ ਦਾ ਫੈਬੀਆਨੋ ਕਾਰੂਆਨਾ ਉਸ ਤੋਂ ਅੱਧਾ ਅੰਕ ਅੱਗੇ ਸਿਖਰ 'ਤੇ ਹੈ।
ਫਰਾਂਸ ਦੇ ਅਲੀਰੇਜ਼ਾ ਫਿਰੋਜ਼ਾ ਅਤੇ ਮੈਕਸਿਮ ਵਾਚੀਅਰ-ਲਾਗਰੇਵ, ਰੂਸ ਦੇ ਇਆਨ ਨੇਪੋਮਨੀਆਚਚੀ ਅਤੇ ਅਮਰੀਕਾ ਦੇ ਵੇਸਲੇ ਸੋ 2.5 ਅੰਕਾਂ ਨਾਲ ਚੌਥੇ ਸਥਾਨ 'ਤੇ ਹਨ। ਇਹ ਚਾਰੇ ਖਿਡਾਰੀ ਨੀਦਰਲੈਂਡ ਦੇ ਅਨੀਸ਼ ਗਿਰੀ ਅਤੇ ਉਜ਼ਬੇਕਿਸਤਾਨ ਦੇ ਨੋਦਿਰਬੇਕ ਅਬਦੁਸਾਤੋਰੋਵ ਤੋਂ ਅੱਧਾ ਅੰਕ ਅੱਗੇ ਹਨ।
ਸਥਾਨਕ ਖਿਡਾਰੀ ਡੀਕ ਬੋਗਦਾਨ-ਡੈਨੀਏਲ 1.5 ਅੰਕਾਂ ਨਾਲ ਟੇਬਲ 'ਚ ਸਭ ਤੋਂ ਹੇਠਾਂ ਹਨ।
ਪ੍ਰਗਨਾਨੰਦਾ ਟੂਰਨਾਮੈਂਟ 'ਚ ਹੁਣ ਤੱਕ ਆਪਣਾ ਸਰਵਸ੍ਰੇਸ਼ਠ ਪ੍ਰਦਰਸ਼ਨ ਦੇਣ 'ਚ ਨਾਕਾਮ ਰਹੇ ਹਨ ਅਤੇ ਬਿਹਤਰ ਲੈਅ 'ਚ ਹੋਣ ਦੇ ਬਾਵਜੂਦ ਉਨ੍ਹਾਂ ਨੇ ਕੁਝ ਮੈਚ ਡਰਾਅ ਕੀਤੇ ਹਨ। ਛੇਵੇਂ ਦੌਰ 'ਚ ਉਸ ਨੂੰ ਰੋਮਾਨੀਆ ਦੇ ਬੋਗਦਾਨ-ਡੈਨੀਏਲ ਦੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪਵੇਗਾ। ਪ੍ਰਗਨਾਨੰਦਾ ਨੂੰ ਇਹ ਮੈਚ ਜਿੱਤਣ ਦਾ ਦਾਅਵੇਦਾਰ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਉਹ ਸਫੈਦ ਮੋਹਰਿਆਂ ਨਾਲ ਖੇਡੇਗਾ। ਵਿਸ਼ਵ ਚੈਂਪੀਅਨਸ਼ਿਪ ਦੇ ਚੈਲੰਜਰ ਗੁਕੇਸ਼ ਨੂੰ ਛੇਵੇਂ ਗੇੜ ਵਿੱਚ ਵੈਚੀਅਰ-ਲਾਗਰੇਵ ਦੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪਵੇਗਾ। ਇਸ ਦੌਰ 'ਚ ਗੁਕੇਸ਼ ਕਾਲੇ ਮੋਹਰਿਆਂ ਨਾਲ ਖੇਡਣਗੇ।