ਪੌਲ ਅਤੇ ਮਿਨੌਰ ਦਰਮਿਆਨ ਹੋਵੇਗਾ ਮੈਕਸੀਕੋ ਓਪਨ ਦਾ ਖ਼ਿਤਾਬੀ ਮੁਕਾਬਲਾ

ਅਕਾਪੁਲਕੋ : ਟੌਮੀ ਪਾਲ ਨੇ ਆਪਣੇ ਹਮਵਤਨ ਅਤੇ ਲੰਬੇ ਸਮੇਂ ਤੋਂ ਵਿਰੋਧੀ ਟੇਲਰ ਫਰਿਟਜ਼ ਨੂੰ ਸਾਢੇ ਤਿੰਨ ਘੰਟੇ ਚੱਲੇ ਮੈਰਾਥਨ ਮੁਕਾਬਲੇ ਵਿੱਚ 6-3, 6-7 (2), 7-6 (2) ਨਾਲ ਹਰਾ ਕੇ ਮੈਕਸੀਕੋ ਓਪਨ ਦੇ ਫਾਈਨਲ ਵਿੱਚ ਥਾਂ ਬਣਾਈ। ਇਹ ਦੋਵੇਂ ਖਿਡਾਰੀ 25 ਸਾਲ ਦੇ ਹਨ ਅਤੇ ਨਾਬਾਲਗ ਉਮਰ ਤੋਂ ਹੀ ਇਕ-ਦੂਜੇ ਦਾ ਸਾਹਮਣਾ ਕਰ ਰਹੇ ਹਨ। ਉਨ੍ਹਾਂ ਦਾ ਪਹਿਲਾ ਮੈਚ 2011 ਵਿੱਚ ਯੂਐਸ ਅੰਡਰ-14 ਨੈਸ਼ਨਲ ਚੈਂਪੀਅਨਸ਼ਿਪ ਵਿੱਚ ਸੀ।

ਪੌਲ ਨੂੰ ਸ਼ੁੱਕਰਵਾਰ ਨੂੰ ਖੇਡੇ ਗਏ ਸੈਮੀਫਾਈਨਲ ਮੈਚ 'ਚ ਫਰਿਟਜ਼ 'ਤੇ ਜਿੱਤ ਦਰਜ ਕਰਨ ਲਈ ਸਾਢੇ ਤਿੰਨ ਘੰਟੇ ਸੰਘਰਸ਼ ਕਰਨਾ ਪਿਆ। ਪੌਲ ਇਸ ਟੂਰਨਾਮੈਂਟ ਦੇ ਫਾਈਨਲ ਵਿੱਚ ਪਹੁੰਚਣ ਵਾਲੇ ਤੀਜੇ ਅਮਰੀਕੀ ਖਿਡਾਰੀ ਹਨ। ਫਾਈਨਲ 'ਚ ਉਸ ਦਾ ਸਾਹਮਣਾ ਆਸਟ੍ਰੇਲੀਆ ਦੇ ਅਲੈਕਸ ਡੀ ਮਿਨੌਰ ਨਾਲ ਹੋਵੇਗਾ, ਜਿਸ ਨੇ ਡੈਨਮਾਰਕ ਦੇ ਹੁਲਗਰ ਰੂਨ ਨੂੰ 3-6, 7-5, 6-2 ਨਾਲ ਹਰਾਇਆ।