ਦਿਨੇਸ਼ ਕਾਰਤਿਕ ਦੀ ਸੱਟ ਬਾਰੇ ਅਪਡੇਟ, ਬੀਸੀਸੀਆਈ ਅਧਿਕਾਰੀ ਨੇ ਕਹੀ ਇਹ ਗੱਲ

ਐਡੀਲੇਡ : ਸੀਨੀਅਰ ਵਿਕਟਕੀਪਰ-ਬੱਲੇਬਾਜ਼ ਦਿਨੇਸ਼ ਕਾਰਤਿਕ ਦੀ ਕਮਰ ਦੀ ਜਕੜਨ ਦੀ ਸਮੱਸਿਆ ਕਾਰਨ ਬੁੱਧਵਾਰ ਨੂੰ ਬੰਗਲਾਦੇਸ਼ ਖ਼ਿਲਾਫ਼ ਭਾਰਤ ਦੇ ਅਗਲੇ ਟੀ-20 ਵਿਸ਼ਵ ਕੱਪ ਮੈਚ ਵਿੱਚ ਉਸ ਦਾ ਖੇਡਣਾ ਸ਼ੱਕੀ ਹੈ। ਦੱਖਣੀ ਅਫ਼ਰੀਕਾ ਖ਼ਿਲਾਫ਼ ਭਾਰਤ ਦੇ ਪਿਛਲੇ ਮੈਚ ਵਿੱਚ ਕਮਰ ਦੀ ਜਕੜਨ ਕਾਰਨ ਕਾਰਤਿਕ ਆਖ਼ਰੀ ਪੰਜ ਓਵਰਾਂ ਵਿੱਚ ਵਿਕਟਕੀਪਰ ਦੀ ਭੂਮਿਕਾ ਨਹੀਂ ਨਿਭਾ ਸਕੇ ਸਨ ਅਤੇ ਮੈਦਾਨ ਤੋਂ ਬਾਹਰ ਚਲੇ ਗਏ ਸਨ।

ਭਾਰਤੀ ਕ੍ਰਿਕਟ ਬੋਰਡ (ਬੀ.ਸੀ.ਸੀ.ਆਈ.) ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਆਪਣਾ ਨਾਂ ਗੁਪਤ ਰੱਖਣ ਦੀ ਸ਼ਰਤ 'ਤੇ ਕਿਹਾ, ''ਕਾਰਤਿਕ ਨੂੰ ਆਪਣੀ ਕਮਰ 'ਚ ਦਰਦ ਮਹਿਸੂਸ ਹੋਇਆ। ਸਾਨੂੰ ਉਸ ਦੀ ਕਮਰ ਦੀ ਜਕੜਨ ਦੀ ਗੰਭੀਰਤਾ ਦਾ ਪਤਾ ਨਹੀਂ ਹੈ। ਮੈਡੀਕਲ ਟੀਮ ਉਸ ਨੂੰ ਫਿੱਟ ਕਰਨ ਲਈ ਕੰਮ ਕਰ ਰਹੀ ਹੈ ਕਿਉਂਕਿ ਹੀਟ ਥੈਰੇਪੀ ਅਤੇ ਮਸਾਜ ਨਾਲ ਜਲਦੀ ਰਾਹਤ ਮਿਲਦੀ ਹੈ। ਇਸ ਲਈ ਉਸ ਨੂੰ ਮੁਕਾਬਲੇ ਤੋਂ ਬਾਹਰ ਨਾ ਸਮਝੋ।

ਇਹ ਵੀ ਪੜ੍ਹੋ : T20 WC 2022 : ਆਸਟ੍ਰੇਲੀਆ ਨੇ ਆਇਰਲੈਂਡ ਨੂੰ 42 ਦੌੜਾਂ ਨਾਲ ਹਰਾਇਆ

ਜੇਕਰ ਕਾਰਤਿਕ ਬੰਗਲਾਦੇਸ਼ ਖਿਲਾਫ ਨਹੀਂ ਖੇਡਦੇ ਹਨ ਤਾਂ ਟੀਮ 'ਚ ਸ਼ਾਮਲ ਇਕ ਹੋਰ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ ਨੂੰ ਪਲੇਇੰਗ ਇਲੈਵਨ 'ਚ ਜਗ੍ਹਾ ਮਿਲ ਸਕਦੀ ਹੈ। ਐਤਵਾਰ ਨੂੰ ਕਾਰਤਿਕ ਦੇ ਦਰਦ ਕਾਰਨ ਮੈਦਾਨ ਛੱਡਣ ਤੋਂ ਬਾਅਦ ਪੰਤ ਨੇ ਦੱਖਣੀ ਅਫਰੀਕਾ ਖਿਲਾਫ 16ਵੇਂ ਓਵਰ ਤੋਂ ਲੈ ਕੇ ਮੈਚ ਦੇ ਅੰਤ ਤੱਕ ਵਿਕਟਕੀਪਰ ਦੀ ਭੂਮਿਕਾ ਨਿਭਾਈ। ਕਾਰਤਿਕ ਦੀ ਕਮਰ ਵਿੱਚ ਜਕੜਨ ਦਾ ਕਾਰਨ ਬੇਹੱਦ ਠੰਡਾ ਮੌਸਮ ਵੀ ਹੋ ਸਕਦਾ ਹੈ। ਇਹ ਪਤਾ ਨਹੀਂ ਹੈ ਕਿ ਕਾਰਤਿਕ ਦੀ ਕਮਰ ਦੀ ਜਕੜਨ ਕਿੰਨੀ ਗੰਭੀਰ ਹੈ, ਪਰ ਆਮ ਤੌਰ 'ਤੇ ਹਲਕੇ ਦਰਦ ਤੋਂ ਵੀ ਠੀਕ ਹੋਣ ਲਈ ਤਿੰਨ ਤੋਂ ਪੰਜ ਦਿਨ ਲੱਗ ਜਾਂਦੇ ਹਨ।

ਕਾਰਤਿਕ ਲਈ ਟੂਰਨਾਮੈਂਟ ਹੁਣ ਤੱਕ ਨਿਰਾਸ਼ਾਜਨਕ ਰਿਹਾ ਹੈ। ਉਸ ਨੇ ਪਾਕਿਸਤਾਨ ਵਿਰੁੱਧ ਇਕ ਦੌੜਾਂ ਅਤੇ ਦੱਖਣੀ ਅਫਰੀਕਾ ਵਿਰੁੱਧ 15 ਗੇਂਦਾਂ 'ਤੇ ਛੇ ਦੌੜਾਂ ਬਣਾਈਆਂ। ਕਾਰਤਿਕ ਨੂੰ ਟੀਮ ਵਿੱਚ ਫਿਨਿਸ਼ਰ ਦੀ ਭੂਮਿਕਾ ਦਿੱਤੀ ਗਈ ਹੈ ਪਰ ਉਹ ਪਰਥ ਦੇ ਆਪਟਸ ਸਟੇਡੀਅਮ ਵਿੱਚ ਪਿੱਚ ਦੀ ਗਤੀ ਅਤੇ ਉਛਾਲ ਨਾਲ ਨਜਿੱਠਣ ਵਿੱਚ ਅਸਫਲ ਰਿਹਾ। ਸੂਰਯਕੁਮਾਰ ਯਾਦਵ ਦੇ ਨਾਲ 52 ਦੌੜਾਂ ਦੀ ਸਾਂਝੇਦਾਰੀ ਵਿੱਚ ਵੱਧ ਯੋਗਦਾਨ ਨਾ ਪਾਉਣ ਲਈ ਉਸ ਦੀ ਆਲੋਚਨਾ ਹੋਈ। ਪੰਤ ਵਰਗੇ ਹਮਲਾਵਰ ਖਿਡਾਰੀ ਨੂੰ ਟੀਮ ਤੋਂ ਬਾਹਰ ਰੱਖਣ ਲਈ ਭਾਰਤੀ ਕੋਚਿੰਗ ਸਟਾਫ ਨੂੰ ਵੀ ਕੁਝ ਆਲੋਚਨਾਵਾਂ ਦਾ ਸਾਹਮਣਾ ਕਰਨਾ ਪਿਆ ਹੈ। ਪੰਤ ਨੂੰ ਟੈਸਟ ਮੈਚਾਂ 'ਚ ਆਸਟ੍ਰੇਲੀਆ 'ਚ ਵੱਡੀ ਸਫਲਤਾ ਮਿਲੀ ਸੀ।

ਨੋਟ : ਇਸ ਖ਼ਬਰ ਬਾਰੇ ਕੀ ਹੈ ਤੁਹਾਡੀ ਰਾਏ। ਕੁਮੈਂਟ ਕਰਕੇ ਦਿਓ ਜਵਾਬ।