NZ vs SL, 2nd Test : ਨਿਊਜ਼ੀਲੈਂਡ ਨੇ ਸ਼੍ਰੀਲੰਕਾ ਨੂੰ ਹਰਾ ਕੇ ਸੀਰੀਜ਼ ''ਚ ਕੀਤਾ ਕਲੀਨ ਸਵੀਪ
03/20/2023 5:59:07 PM
ਸਪੋਰਟਸ ਡੈਸਕ- ਨਿਊਜ਼ੀਲੈਂਡ ਨੇ ਦੂਜੇ ਟੈਸਟ ਮੈਚ 'ਚ ਸ਼੍ਰੀਲੰਕਾ ਨੂੰ ਹਰਾ ਕੇ ਦੋ ਟੈਸਟਾਂ ਦੀ ਸੀਰੀਜ਼ 2-0 ਨਾਲ ਜਿੱਤ ਲਈ ਹੈ। ਇਹ ਟੈਸਟ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦੇ ਤਹਿਤ ਖੇਡੇ ਜਾ ਰਹੇ ਸਨ। ਨਿਊਜ਼ੀਲੈਂਡ ਨੇ ਦੂਜੇ ਟੈਸਟ 'ਚ ਸੋਮਵਾਰ ਨੂੰ ਸ਼੍ਰੀਲੰਕਾ ਨੂੰ ਪਾਰੀ ਅਤੇ 58 ਦੌੜਾਂ ਨਾਲ ਹਰਾਇਆ। ਨਿਊਜ਼ੀਲੈਂਡ ਨੇ ਪਹਿਲੀ ਪਾਰੀ 'ਚ 580 ਦੌੜਾਂ ਬਣਾਈਆਂ ਸਨ। ਮੈਚ ਵਿੱਚ ਦੋ ਖਿਡਾਰੀਆਂ ਨੇ ਦੋਹਰੇ ਸੈਂਕੜੇ ਲਗਾਏ। ਕੇਨ ਵਿਲੀਅਮਸਨ ਨੇ 215 ਦੌੜਾਂ ਦੀ ਪਾਰੀ ਖੇਡੀ। ਜਦਕਿ ਹੈਨਰੀ ਨਿਕੋਲਸ ਨੇ 200 ਦੌੜਾਂ ਬਣਾਈਆਂ। ਨਿਊਜ਼ੀਲੈਂਡ ਦੇ 580 ਦੌੜਾਂ ਦੇ ਜਵਾਬ 'ਚ ਸ਼੍ਰੀਲੰਕਾ ਦੀ ਟੀਮ ਪਹਿਲੀ ਪਾਰੀ 'ਚ 164 ਦੌੜਾਂ 'ਤੇ ਹੀ ਢੇਰ ਹੋ ਗਈ।
ਫਾਲੋਆਨ ਖੇਡਣ ਉਤਰੀ ਸ਼੍ਰੀਲੰਕਾ ਦੀ ਟੀਮ ਦੂਜੀ ਪਾਰੀ ਵਿਚ ਵੀ ਨਿਊਜ਼ੀਲੈਂਡ ਦੇ ਗੇਂਦਬਾਜ਼ਾਂ ਦਾ ਸਾਹਮਣਾ ਨਹੀਂ ਕਰ ਸਕੀ। ਸ਼੍ਰੀਲੰਕਾ ਦੀ ਪੂਰੀ ਟੀਮ 358 ਦੌੜਾਂ 'ਤੇ ਸਿਮਟ ਗਈ। ਸ਼੍ਰੀਲੰਕਾ ਦੇ ਕਪਤਾਨ ਦਿਮੁਥ ਕਰੁਣਾਰਤਨੇ ਨੇ ਪਹਿਲੀ ਪਾਰੀ ਵਿੱਚ ਸਭ ਤੋਂ ਵੱਧ 89 ਦੌੜਾਂ ਬਣਾਈਆਂ। ਸ੍ਰੀਲੰਕਾ ਦੇ ਚਾਰ ਖਿਡਾਰੀ ਬਿਨਾਂ ਖਾਤਾ ਖੋਲ੍ਹੇ ਹੀ ਪੈਵੇਲੀਅਨ ਪਰਤ ਗਏ। ਧਨੰਜੈ ਡੀ ਸਿਲਵਾ ਨੇ ਦੂਜੀ ਪਾਰੀ ਵਿੱਚ 98 ਦੌੜਾਂ ਬਣਾਈਆਂ। ਇਸ ਦੇ ਨਾਲ ਹੀ ਦਿਨੇਸ਼ ਚਾਂਦੀਮਲ ਨੇ ਵੀ 62 ਦੌੜਾਂ ਦੀ ਪਾਰੀ ਖੇਡੀ। ਦਿਮੁਥ ਨੇ ਦੂਜੀ ਪਾਰੀ ਵਿੱਚ 51 ਦੌੜਾਂ ਬਣਾਈਆਂ। ਕੁਸਲ ਮੈਂਡਿਸ ਨੇ ਵੀ 50 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ।
ਨਿਊਜ਼ੀਲੈਂਡ ਕ੍ਰਾਈਸਟਚਰਚ ਵਿੱਚ ਪਹਿਲੇ ਟੈਸਟ ਵਿੱਚ ਇੱਕ ਰੋਮਾਂਚਕ ਮੈਚ ਵਿੱਚ ਦੋ ਵਿਕਟਾਂ ਨਾਲ ਜਿੱਤਿਆ। ਇਹ ਮੈਚ ਆਈਸੀਸੀ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ 2021-23 ਦੇ ਤਹਿਤ ਖੇਡਿਆ ਗਿਆ ਸੀ। ਇਹ ਮੈਚ ਵਨਡੇ ਵਾਂਗ ਹੀ ਰੋਮਾਂਚਕ ਸੀ। ਨਿਊਜ਼ੀਲੈਂਡ ਨੂੰ ਆਖਰੀ ਓਵਰ ਵਿੱਚ ਅੱਠ ਦੌੜਾਂ ਦੀ ਲੋੜ ਸੀ। ਕੇਨ ਵਿਲੀਅਮਸਨ ਅਤੇ ਅਸਿਥਾ ਫਰਨਾਂਡੋ ਮੈਦਾਨ 'ਤੇ ਸਨ।
ਓਵਰ ਦੀ ਪਹਿਲੀ ਅਤੇ ਦੂਜੀ ਗੇਂਦ 'ਤੇ ਇਕ-ਇਕ ਦੌੜ। ਤੀਜੀ ਗੇਂਦ 'ਤੇ ਇਕ ਦੌੜਾਂ ਬਣਾਈਆਂ ਗਈਆਂ ਅਤੇ ਇਕ ਰਨ ਆਊਟ ਹੋਇਆ। ਚੌਥੀ ਗੇਂਦ 'ਤੇ ਚੌਕਾ ਲੱਗਾ। ਪੰਜਵੀਂ ਗੇਂਦ ਡਾਟ ਸੀ। ਨਿਊਜ਼ੀਲੈਂਡ ਨੇ ਛੇਵੀਂ ਗੇਂਦ 'ਤੇ ਬਾਈ ਦੀ ਦੌੜ ਨਾਲ ਮੈਚ ਜਿੱਤ ਲਿਆ।ਪਹਿਲੇ ਟੈਸਟ ਵਿੱਚ ਪਹਿਲੀ ਪਾਰੀ ਵਿੱਚ ਨਿਊਜ਼ੀਲੈਂਡ ਦੇ ਮਾਈਕਲ ਬ੍ਰੇਸਵੈਲ ਅਤੇ ਮੈਟ ਹੈਨਰੀ ਨੇ ਤਿੰਨ-ਤਿੰਨ ਵਿਕਟਾਂ ਲਈਆਂ। ਮੈਟ ਹੈਨਰੀ ਨੇ 20 ਓਵਰਾਂ ਵਿੱਚ 44 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਲਈਆਂ। ਹੈਨਰੀ ਨੇ 6 ਮੇਡਨ ਓਵਰ ਸੁੱਟੇ ਅਤੇ ਮਾਈਕਲ ਬ੍ਰੇਸਵੇਲ ਨੇ 12 ਓਵਰਾਂ ਵਿੱਚ 50 ਦੌੜਾਂ ਦੇ ਕੇ ਤਿੰਨ ਵਿਕਟਾਂ ਲਈਆਂ। ਬ੍ਰੇਸਵੈੱਲ ਨੇ ਮੇਡਨ ਓਵਰ ਸੁੱਟਿਆ।
