IPL 2026: KKR ਦੇ ਨੌਜਵਾਨ ਬੱਲੇਬਾਜ਼ ਆਂਗਕ੍ਰਿਸ਼ ਰਘੂਵੰਸ਼ੀ ''ਤੇ ਲੱਗਾ ਜੁਰਮਾਨਾ; ਜਾਣੋ ਕੀ ਹੈ ਪੂਰਾ ਮਾਮਲਾ

ਸਪੋਰਟਸ ਡੈਸਕ : ਆਈ. ਪੀ. ਐੱਲ. 2026 ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ (KKR)ਦੇ ਨੌਜਵਾਨ ਬੱਲੇਬਾਜ਼ ਅੰਗਕ੍ਰਿਸ਼ ਰਘੂਵੰਸ਼ੀ ਨੂੰ ਲਖਨਊ ਸੁਪਰ ਜਾਇੰਟਸ (LSG) ਦੇ ਖਿਲਾਫ ਖੇਡੇ ਗਏ ਮੈਚ ਦੌਰਾਨ ਅਨੁਸ਼ਾਸਨਹੀਣ ਵਿਵਹਾਰ ਲਈ ਸਜ਼ਾ ਦਿੱਤੀ ਗਈ ਹੈ। ਆਈ.ਪੀ.ਐੱਲ. ਪ੍ਰਬੰਧਕਾਂ ਨੇ ਰਘੂਵੰਸ਼ੀ 'ਤੇ ਮੈਚ ਫੀਸ ਦਾ 20 ਫੀਸਦੀ ਜੁਰਮਾਨਾ ਲਗਾਇਆ ਹੈ ਅਤੇ ਉਸ ਦੇ ਖਾਤੇ ਵਿੱਚ ਇੱਕ ਡੈਮੇਰਿਟ ਪੁਆਇੰਟ ਵੀ ਜੋੜਿਆ ਗਿਆ ਹੈ।

ਕੀ ਹੈ ਪੂਰਾ ਮਾਮਲਾ?
ਆਈ.ਪੀ.ਐੱਲ. ਦੇ ਅਧਿਕਾਰਤ ਬਿਆਨ ਅਨੁਸਾਰ, ਰਘੂਵੰਸ਼ੀ ਨੂੰ ਕੋਡ ਆਫ ਕੰਡਕਟ ਦੇ ਲੈਵਲ-1 ਦੀ ਉਲੰਘਣਾ ਦਾ ਦੋਸ਼ੀ ਪਾਇਆ ਗਿਆ ਹੈ। ਇਹ ਮਾਮਲਾ ਆਈ.ਪੀ.ਐੱਲ. ਦੇ ਆਰਟੀਕਲ 2.2 ਦੇ ਤਹਿਤ ਮੈਚ ਦੌਰਾਨ ਕ੍ਰਿਕਟ ਦੇ ਸਾਜ਼ੋ-ਸਾਮਾਨ ਅਤੇ ਮੈਦਾਨੀ ਚੀਜ਼ਾਂ ਦੀ ਦੁਰਵਰਤੋਂ ਨਾਲ ਸਬੰਧਤ ਹੈ।

ਆਊਟ ਹੋਣ ਤੋਂ ਬਾਅਦ ਦਿਖਾਇਆ ਗੁੱਸਾ
ਇਹ ਘਟਨਾ KKR ਦੀ ਪਾਰੀ ਦੇ ਪੰਜਵੇਂ ਓਵਰ ਵਿੱਚ ਵਾਪਰੀ, ਜਦੋਂ ਰਘੂਵੰਸ਼ੀ ਨੂੰ 'ਔਬਸਟਰਕਟਿੰਗ ਦ ਫੀਲਡ' (ਮੈਦਾਨ ਵਿੱਚ ਰੁਕਾਵਟ ਪਾਉਣ) ਦੇ ਆਧਾਰ 'ਤੇ ਆਊਟ ਦਿੱਤਾ ਗਿਆ। ਆਊਟ ਹੋਣ ਤੋਂ ਬਾਅਦ ਉਸ ਨੇ ਆਪਣੀ ਨਾਰਾਜ਼ਗੀ ਜ਼ਾਹਰ ਕਰਦਿਆਂ ਬੱਲੇ ਨਾਲ ਬਾਊਂਡਰੀ ਕੁਸ਼ਨ 'ਤੇ ਵਾਰ ਕੀਤਾ ਅਤੇ ਫਿਰ ਆਪਣਾ ਹੈਲਮੇਟ ਡਗਆਊਟ ਵੱਲ ਸੁੱਟ ਦਿੱਤਾ। ਖਿਡਾਰੀ ਨੇ ਆਪਣੀ ਗਲਤੀ ਸਵੀਕਾਰ ਕਰ ਲਈ ਹੈ ਅਤੇ ਮੈਚ ਰੈਫਰੀ ਦੁਆਰਾ ਦਿੱਤੀ ਗਈ ਸਜ਼ਾ ਨੂੰ ਮੰਨ ਲਿਆ ਹੈ।

ਰੋਮਾਂਚਕ ਮੈਚ ਵਿੱਚ KKR ਦੀ ਸੁਪਰ ਓਵਰ ਜਿੱਤ
ਇਹ ਮੁਕਾਬਲਾ ਬੇਹੱਦ ਰੋਮਾਂਚਕ ਰਿਹਾ, ਜਿੱਥੇ ਕੋਲਕਾਤਾ ਨਾਈਟ ਰਾਈਡਰਜ਼ ਨੇ ਸੁਪਰ ਓਵਰ ਵਿੱਚ ਲਖਨਊ ਸੁਪਰ ਜਾਇੰਟਸ ਨੂੰ ਹਰਾ ਕੇ ਜਿੱਤ ਹਾਸਲ ਕੀਤੀ। KKR ਦੀ ਇਸ ਜਿੱਤ ਵਿੱਚ ਰਿੰਕੂ ਸਿੰਘ ਨੇ ਅਹਿਮ ਭੂਮਿਕਾ ਨਿਭਾਈ, ਜਿਨ੍ਹਾਂ ਨੇ 51 ਗੇਂਦਾਂ ਵਿੱਚ ਨਾਬਾਦ 83 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ, ਜਿਸ ਵਿੱਚ 7 ਚੌਕੇ ਅਤੇ 5 ਛੱਕੇ ਸ਼ਾਮਲ ਸਨ। ਉਨ੍ਹਾਂ ਨੂੰ ਇਸ ਸ਼ਾਨਦਾਰ ਪ੍ਰਦਰਸ਼ਨ ਲਈ 'ਪਲੇਅਰ ਆਫ ਦ ਮੈਚ' ਚੁਣਿਆ ਗਿਆ। ਦੂਜੇ ਪਾਸੇ ਲਖਨਊ ਲਈ ਮੋਹਸਿਨ ਖਾਨ ਨੇ 5 ਵਿਕਟਾਂ ਲੈ ਕੇ ਸ਼ਾਨਦਾਰ ਗੇਂਦਬਾਜ਼ੀ ਕੀਤੀ ਅਤੇ ਮੁਹੰਮਦ ਸ਼ੰਮੀ ਦੇ ਆਖਰੀ ਗੇਂਦ 'ਤੇ ਲਗਾਏ ਛੱਕੇ ਨੇ ਮੈਚ ਨੂੰ ਸੁਪਰ ਓਵਰ ਤੱਕ ਪਹੁੰਚਾਇਆ ਸੀ।