IPL ''ਚ ਖੇਡ ਰਹੇ ਖਿਡਾਰੀ ''ਤੇ ਲੱਗਾ ਬੈਨ!

ਸਪੋਰਟਸ ਡੈਸਕ- ਪਾਕਿਸਤਾਨ ਕ੍ਰਿਕਟ ਬੋਰਡ  ਨੇ ਇੱਕ ਵੱਡਾ ਅਤੇ ਸਖ਼ਤ ਕਦਮ ਚੁੱਕਦੇ ਹੋਏ ਜ਼ਿੰਬਾਬਵੇ ਦੇ ਤੇਜ਼ ਗੇਂਦਬਾਜ਼ ਬਲੇਸਿੰਗ ਮੁਜ਼ਾਰਬਾਨੀ 'ਤੇ ਦੋ ਸਾਲ ਦੀ ਪਾਬੰਦੀ ਲਗਾ ਦਿੱਤੀ ਹੈ। ਇਹ ਕਾਰਵਾਈ ਮੁਜ਼ਾਰਬਾਨੀ ਵੱਲੋਂ ਪਾਕਿਸਤਾਨ ਸੁਪਰ ਲੀਗ ਦੇ ਕਰਾਰ ਨੂੰ ਤੋੜ ਕੇ ਇੰਡੀਅਨ ਪ੍ਰੀਮੀਅਰ ਲੀਗ ਵਿੱਚ ਖੇਡਣ ਦੇ ਫੈਸਲੇ ਤੋਂ ਬਾਅਦ ਕੀਤੀ ਗਈ ਹੈ।

ਕੀ ਹੈ ਪੂਰਾ ਮਾਮਲਾ? 

ਜਾਣਕਾਰੀ ਅਨੁਸਾਰ, ਮੁਜ਼ਾਰਬਾਨੀ ਨੇ ਪਹਿਲਾਂ ਪੀਐੱਸਐੱਲ ਦੀ ਫਰੈਂਚਾਈਜ਼ੀ ਇਸਲਾਮਾਬਾਦ ਯੂਨਾਈਟਿਡ ਨਾਲ ਖੇਡਣ ਦਾ ਕਰਾਰ ਕੀਤਾ ਸੀ। ਪਰ ਬਾਅਦ ਵਿੱਚ ਜਦੋਂ ਉਨ੍ਹਾਂ ਨੂੰ ਆਈਪੀਐਲ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ ਵੱਲੋਂ ਮੁਸਤਾਫਿਜ਼ੁਰ ਰਹਿਮਾਨ ਦੇ ਰਿਪਲੇਸਮੈਂਟ (ਬਦਲਵੇਂ ਖਿਡਾਰੀ) ਵਜੋਂ ਪੇਸ਼ਕਸ਼ ਮਿਲੀ, ਤਾਂ ਉਨ੍ਹਾਂ ਨੇ ਕੇਕੇਆਰ ਵਿੱਚ ਸ਼ਾਮਲ ਹੋਣ ਦਾ ਫੈਸਲਾ ਕੀਤਾ। ਪੀਸੀਬੀ ਨੇ ਇਸ ਨੂੰ ਪੇਸ਼ੇਵਰ ਮਾਪਦੰਡਾਂ ਦੀ 'ਗੰਭੀਰ ਉਲੰਘਣਾ' ਮੰਨਿਆ ਹੈ।

ਪੀਸੀਬੀ ਦੇ ਚੇਅਰਮੈਨ ਮੋਹਸਿਨ ਨਕਵੀ ਨੇ ਪਹਿਲਾਂ ਹੀ ਸੰਕੇਤ ਦਿੱਤੇ ਸਨ ਕਿ ਆਈਪੀਐੱਲ ਲਈ ਪੀਐੱਸਐੱਲ ਛੱਡਣ ਵਾਲੇ ਖਿਡਾਰੀਆਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ। ਬੋਰਡ ਦਾ ਕਹਿਣਾ ਹੈ ਕਿ ਲੀਗ ਦੀ ਪਾਰਦਰਸ਼ਤਾ ਅਤੇ ਖਿਡਾਰੀਆਂ ਦੀ ਵਚਨਬੱਧਤਾ ਨੂੰ ਕਾਇਮ ਰੱਖਣ ਲਈ ਅਜਿਹੀ ਪਾਬੰਦੀ ਜ਼ਰੂਰੀ ਹੈ ਤਾਂ ਜੋ ਭਵਿੱਖ ਵਿੱਚ ਕੋਈ ਹੋਰ ਖਿਡਾਰੀ ਅਜਿਹਾ ਨਾ ਕਰੇ।

ਮੁਜ਼ਾਰਬਾਨੀ ਇਕੱਲੇ ਅਜਿਹੇ ਖਿਡਾਰੀ ਨਹੀਂ ਹਨ ਜਿਨ੍ਹਾਂ ਨੇ ਪੀਐੱਸਐੱਲ ਨੂੰ ਛੱਡ ਕੇ ਆਈਪੀਐੱਲ ਨੂੰ ਚੁਣਿਆ ਹੈ। ਰਿਪੋਰਟਾਂ ਅਨੁਸਾਰ, ਸ਼੍ਰੀਲੰਕਾ ਦੇ ਦਾਸੁਨ ਸ਼ਨਾਕਾ (ਰਾਜਸਥਾਨ ਰਾਇਲਜ਼) ਅਤੇ ਆਸਟ੍ਰੇਲੀਆ ਦੇ ਸਪੈਂਸਰ ਜੌਨਸਨ (ਚੇਨਈ ਸੁਪਰ ਕਿੰਗਜ਼) ਨੇ ਵੀ ਪੀਐੱਸਐੱਲ ਦੀਆਂ ਆਪਣੀਆਂ ਫਰੈਂਚਾਈਜ਼ੀਆਂ ਨਾਲੋਂ ਨਾਤਾ ਤੋੜ ਕੇ ਆਈਪੀਐਲ ਦਾ ਰੁਖ ਕੀਤਾ ਹੈ। ਪੀਸੀਬੀ ਵੱਲੋਂ ਇਨ੍ਹਾਂ ਖਿਡਾਰੀਆਂ 'ਤੇ ਵੀ ਜਲਦੀ ਹੀ ਕੋਈ ਵੱਡਾ ਫੈਸਲਾ ਲਿਆ ਜਾ ਸਕਦਾ ਹੈ। ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ ਕੋਰਬਿਨ ਬੋਸ਼ 'ਤੇ ਵੀ ਮੁੰਬਈ ਇੰਡੀਅਨਜ਼ ਜੁਆਇਨ ਕਰਨ ਕਾਰਨ ਇਕ ਸਾਲ ਦੀ ਪਾਬੰਦੀ ਲਗਾਈ ਗਈ ਸੀ।

ਬਲੇਸਿੰਗ ਮੁਜ਼ਾਰਬਾਨੀ ਨੇ 29 ਮਾਰਚ ਨੂੰ ਮੁੰਬਈ ਇੰਡੀਅਨਜ਼ ਵਿਰੁੱਧ ਆਪਣਾ ਆਈਪੀਐੱਲ ਡੈਬਿਊ ਕੀਤਾ ਸੀ। ਉਨ੍ਹਾਂ ਨੇ ਸਨਰਾਈਜ਼ਰਜ਼ ਹੈਦਰਾਬਾਦ ਵਿਰੁੱਧ ਖੇਡੇ ਗਏ ਮੈਚ ਵਿੱਚ ਚਾਰ ਵਿਕਟਾਂ ਲੈ ਕੇ ਸਭ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਸੀ। ਦਿਲਚਸਪ ਗੱਲ ਇਹ ਹੈ ਕਿ ਪੀਸੀਬੀ ਨੇ ਇਸ ਪਾਬੰਦੀ ਦਾ ਐਲਾਨ ਕੇਕੇਆਰ ਅਤੇ ਸੀਐੱਸਕੇ ਦੇ ਅਹਿਮ ਮੁਕਾਬਲੇ ਤੋਂ ਠੀਕ ਪਹਿਲਾਂ ਕੀਤਾ ਹੈ।