IPL 2026: ਭੁਵਨੇਸ਼ਵਰ ਕੁਮਾਰ ਨੇ ਦੱਸਿਆ ਆਪਣੀ ਸਫਲਤਾ ਦਾ ਰਾਜ਼; ਕੋਹਲੀ ਦੀ ਸਲਾਹ ਨੇ ਬਦਲੀ ਖੇਡ

ਸਪੋਰਟਸ ਡੈਸਕ : ਦਿੱਲੀ ਕੈਪੀਟਲਸ ਦੇ ਖਿਲਾਫ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਤੋਂ ਬਾਅਦ ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਦੇ ਤੇਜ਼ ਗੇਂਦਬਾਜ਼ ਭੁਵਨੇਸ਼ਵਰ ਕੁਮਾਰ ਨੇ ਟੀਮ ਵਿੱਚ ਵਿਰਾਟ ਕੋਹਲੀ ਦੀ ਭੂਮਿਕਾ ਨੂੰ ਬੇਹੱਦ ਅਹਿਮ ਦੱਸਿਆ ਹੈ। ਭੁਵਨੇਸ਼ਵਰ ਨੇ ਖੁਲਾਸਾ ਕੀਤਾ ਕਿ ਭਾਵੇਂ ਕੋਹਲੀ ਅਧਿਕਾਰਤ ਤੌਰ 'ਤੇ ਅਗਵਾਈ ਦੀ ਭੂਮਿਕਾ ਵਿੱਚ ਨਹੀਂ ਹਨ, ਪਰ ਉਨ੍ਹਾਂ ਦਾ ਅਨੁਭਵ ਅਤੇ ਗੱਲਾਂ ਟੀਮ ਲਈ ਬਹੁਤ ਵੱਡਾ ਫਰਕ ਪੈਦਾ ਕਰਦੀਆਂ ਹਨ।

ਕੋਹਲੀ ਦੀ ਸਲਾਹ ਨਾਲ ਮਿਲਦੀ ਹੈ ਦਿਸ਼ਾ
ਭੁਵਨੇਸ਼ਵਰ ਕੁਮਾਰ ਅਨੁਸਾਰ, ਕੋਹਲੀ ਵਰਗੇ ਤਜਰਬੇਕਾਰ ਖਿਡਾਰੀ ਦੀ ਮੌਜੂਦਗੀ ਟੀਮ ਲਈ ਬਹੁਤ ਫਾਇਦੇਮੰਦ ਸਾਬਤ ਹੁੰਦੀ ਹੈ। ਉਨ੍ਹਾਂ ਕਿਹਾ, "ਇਹ ਮਾਇਨੇ ਨਹੀਂ ਰੱਖਦਾ ਕਿ ਉਨ੍ਹਾਂ ਨੇ ਕੀ ਹਾਸਲ ਕੀਤਾ ਹੈ, ਬਲਕਿ ਇਹ ਜ਼ਰੂਰੀ ਹੈ ਕਿ ਉਹ ਕਿਵੇਂ ਸੰਚਾਰ (communicate) ਕਰਦੇ ਹਨ। ਉਨ੍ਹਾਂ ਦਾ ਬੱਲੇਬਾਜ਼ੀ ਦਾ ਅਨੁਭਵ ਸਾਨੂੰ (ਗੇਂਦਬਾਜ਼ਾਂ ਨੂੰ) ਕਾਫੀ ਮਦਦ ਕਰਦਾ ਹੈ"। ਭੁਵਨੇਸ਼ਵਰ ਨੇ ਕ੍ਰਿਕਟ ਨੂੰ ਇੱਕ ਟੀਮ ਗੇਮ ਦੱਸਦਿਆਂ ਕਿਹਾ ਕਿ ਵਿਅਕਤੀਗਤ ਪ੍ਰਦਰਸ਼ਨ ਉਦੋਂ ਹੀ ਮਾਇਨੇ ਰੱਖਦਾ ਹੈ ਜਦੋਂ ਪੂਰੀ ਟੀਮ ਮਿਲ ਕੇ ਚੰਗਾ ਖੇਡੇ।

ਗੇਂਦਬਾਜ਼ਾਂ ਦਾ ਕਹਿਰ, 75 'ਤੇ ਢੇਰ ਹੋਈ ਦਿੱਲੀ
ਇਸ ਮੁਕਾਬਲੇ ਵਿੱਚ RCB ਦੇ ਗੇਂਦਬਾਜ਼ਾਂ ਨੇ ਘਾਤਕ ਗੇਂਦਬਾਜ਼ੀ ਕਰਦਿਆਂ ਦਿੱਲੀ ਕੈਪੀਟਲਸ ਨੂੰ ਮਹਿਜ਼ 75 ਦੌੜਾਂ 'ਤੇ ਸਮੇਟ ਦਿੱਤਾ। ਭੁਵਨੇਸ਼ਵਰ ਕੁਮਾਰ ਨੇ ਸ਼ਾਨਦਾਰ ਸਪੈੱਲ ਪਾਉਂਦੇ ਹੋਏ 3 ਵਿਕਟਾਂ ਮਹਿਜ਼ 5 ਦੌੜਾਂ ਦੇ ਕੇ ਲਈਆਂ, ਜਦਕਿ ਜੋਸ਼ ਹੇਜ਼ਲਵੁੱਡ ਨੇ 12 ਦੌੜਾਂ ਦੇ ਕੇ 4 ਵਿਕਟਾਂ ਝਟਕਾਈਆਂ। RCB ਨੇ ਇਸ ਨਾਮਾਤਰ ਟੀਚੇ ਨੂੰ 9 ਵਿਕਟਾਂ ਨਾਲ ਬੇਹੱਦ ਆਸਾਨੀ ਨਾਲ ਹਾਸਲ ਕਰ ਲਿਆ ਅਤੇ ਮੈਚ ਵਿੱਚ 81 ਗੇਂਦਾਂ ਬਾਕੀ ਰਹਿੰਦਿਆਂ ਜਿੱਤ ਦਰਜ ਕੀਤੀ।

ਵਿਰਾਟ ਕੋਹਲੀ ਨੇ ਰਚਿਆ ਇਤਿਹਾਸ
ਇਸੇ ਮੈਚ ਦੌਰਾਨ ਵਿਰਾਟ ਕੋਹਲੀ ਨੇ ਆਈ.ਪੀ.ਐੱਲ. ਵਿੱਚ 9000 ਦੌੜਾਂ ਪੂਰੀਆਂ ਕਰਕੇ ਇੱਕ ਵੱਡਾ ਕੀਰਤੀਮਾਨ ਆਪਣੇ ਨਾਂ ਕੀਤਾ। ਉਨ੍ਹਾਂ ਨੇ ਪਾਵਰਪਲੇਅ ਦੀ ਆਖਰੀ ਗੇਂਦ 'ਤੇ ਸਿੰਗਲ ਲੈ ਕੇ ਇਹ ਇਤਿਹਾਸਕ ਉਪਲਬਧੀ ਹਾਸਲ ਕੀਤੀ।

ਅੰਕ ਸੂਚੀ ਵਿੱਚ RCB ਸਿਖਰ 'ਤੇ
ਇਸ ਧਮਾਕੇਦਾਰ ਜਿੱਤ ਦੇ ਨਾਲ ਹੀ RCB 7 ਮੈਚਾਂ ਵਿੱਚ 13 ਅੰਕ ਲੈ ਕੇ ਅੰਕ ਸੂਚੀ ਵਿੱਚ ਪਹਿਲੇ (ਸਿਖਰ) ਸਥਾਨ 'ਤੇ ਪਹੁੰਚ ਗਈ ਹੈ। ਟੀਮ ਦਾ ਅਗਲਾ ਮੁਕਾਬਲਾ 30 ਅਪ੍ਰੈਲ ਨੂੰ ਗੁਜਰਾਤ ਟਾਈਟਨਸ ਦੇ ਖਿਲਾਫ ਹੋਵੇਗਾ।