ਅੰਤਰਰਾਸ਼ਟਰੀ ਮੁੱਕੇਬਾਜ਼ੀ ਟੂਰਨਾਮੈਂਟ : ਸ਼ਿਵ ਥਾਪਾ ਅਤੇ ਹੁਸਾਮੁਦੀਨ ਨੇ ਜਿੱਤ ਨਾਲ ਕੀਤੀ  ਸ਼ੁਰੂਆਤ

ਸੋਫੀਆ- ਤਜਰਬੇਕਾਰ ਭਾਰਤੀ ਮੁੱਕੇਬਾਜ਼ ਸ਼ਿਵ ਥਾਪਾ ਅਤੇ ਹੁਸਾਮੁਦੀਨ ਨੇ ਮੰਗਲਵਾਰ ਨੂੰ ਇੱਥੇ 74ਵੇਂ ਸਟ੍ਰੈਂਡਜਾ ਮੈਮੋਰੀਅਲ ਅੰਤਰਰਾਸ਼ਟਰੀ ਮੁੱਕੇਬਾਜ਼ੀ ਟੂਰਨਾਮੈਂਟ ਵਿੱਚ ਜਿੱਤਾਂ ਨਾਲ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕੀਤੀ। ਥਾਪਾ (63.5 ਕਿਲੋਗ੍ਰਾਮ) ਨੇ ਫਰੈਡਰਿਕ ਜੇਨਸਨ ਲੁੰਡਗਾਰਡ ਦੇ ਖਿਲਾਫ ਸ਼ੁਰੂ ਤੋਂ ਹੀ ਦਬਦਬਾ ਬਣਾਇਆ ਅਤੇ ਆਪਣੇ ਵਿਰੋਧੀ ਨੂੰ 5-0 ਨਾਲ ਹਰਾਇਆ। 

ਹੁਸਾਮੁਦੀਨ (57 ਕਿਲੋ) ਵੀ ਆਤਮਵਿਸ਼ਵਾਸ ਨਾਲ ਭਰਿਆ ਨਜ਼ਰ ਆਇਆ ਕਿਉਂਕਿ ਉਸ ਨੇ ਮੁਕਾਬਲੇ ਦੀ ਸ਼ੁਰੂਆਤ ਤੋਂ ਹੀ ਚੀਨ ਦੇ ਲਿਊ ਪਿੰਗ ਨੂੰ ਬੈਕਫੁੱਟ 'ਤੇ ਲਿਆਇਆ ਅਤੇ 4-1 ਨਾਲ ਜਿੱਤ ਦਰਜ ਕਰਕੇ ਪ੍ਰੀ-ਕੁਆਰਟਰ ਫਾਈਨਲ 'ਚ ਜਗ੍ਹਾ ਬਣਾਈ। ਨਿਸ਼ਾਂਤ ਦੇਵ (71 ਕਿਲੋ) ਟੋਕੀਓ ਓਲੰਪਿਕ ਕਾਂਸੀ ਤਮਗਾ ਜੇਤੂ ਆਇਰਲੈਂਡ ਦੇ ਏਡਨ ਵਾਲਸ਼ ਤੋਂ 2-3 ਨਾਲ ਹਾਰ ਗਿਆ। ਭਾਰਤ ਦੀਆਂ ਤਿੰਨ ਮਹਿਲਾ ਮੁੱਕੇਬਾਜ਼ਾਂ ਨੇ ਸੋਮਵਾਰ ਰਾਤ ਨੂੰ ਅਗਲੇ ਦੌਰ ਵਿੱਚ ਥਾਂ ਬਣਾਈ। 

ਕਲਾਵਾਨੀ (48 ਕਿਲੋ) ਨੇ ਫਿਲੀਪੀਨਜ਼ ਦੀ ਟੇਸਾਰਾ ਕਲੀਓ ਨੂੰ 5-0 ਨਾਲ ਜਦਕਿ ਅਨਾਮਿਕਾ (50 ਕਿਲੋ) ਨੇ ਚੀਨ ਦੀ ਚਾਂਗ ਯੁਆਨ ਨੂੰ 5-0 ਨਾਲ ਹਰਾ ਕੇ ਅਗਲੇ ਦੌਰ ਵਿੱਚ ਪ੍ਰਵੇਸ਼ ਕੀਤਾ। ਵਿਨਾਕਸ਼ੀ (57 ਕਿਲੋਗ੍ਰਾਮ) ਨੇ ਅਜ਼ਰਬਾਈਜਾਨ ਦੀ ਹਮਜ਼ਾਏਵਾ ਅਗਮਾਲੀਏਵਾ ਮਸ਼ਾਤੀ ਨੂੰ 4-1 ਨਾਲ ਹਰਾਇਆ। ਅੰਕੁਸ਼ਿਤਾ ਬੋਰੋ (66 ਕਿਲੋ) ਮੌਜੂਦਾ ਵਿਸ਼ਵ ਚੈਂਪੀਅਨ ਆਇਰਲੈਂਡ ਦੀ ਐਮੀ ਬ੍ਰਾਡਹਰਸਟ ਤੋਂ 1-4 ਨਾਲ ਹਾਰ ਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਗਈ।