ਇੰਡੀਅਨ ਵੇਲਜ਼ ਟੈਨਿਸ: ਸਬਾਲੇਂਕਾ ਅਤੇ ਰਾਇਬਾਕੀਨਾ ਵਿਚਾਲੇ ਹੋਵੇਗੀ ਖ਼ਿਤਾਬੀ ਜੰਗ

ਇੰਡੀਅਨ ਵੇਲਜ਼ : ਇੰਡੀਅਨ ਵੇਲਜ਼ ਟੈਨਿਸ ਟੂਰਨਾਮੈਂਟ (ਬੀਐਨਪੀ ਪਾਰਿਬਾਸ ਓਪਨ) ਦੇ ਮਹਿਲਾ ਸਿੰਗਲਜ਼ ਵਰਗ ਦਾ ਫਾਈਨਲ ਮੁਕਾਬਲਾ ਤੈਅ ਹੋ ਗਿਆ ਹੈ। ਦੁਨੀਆ ਦੀ ਚੋਟੀ ਦੀ ਦਰਜਾਬੰਦੀ ਵਾਲੀ ਖਿਡਾਰਨ ਐਰੀਨਾ ਸਬਾਲੇਂਕਾ ਅਤੇ ਕਜ਼ਾਕਿਸਤਾਨ ਦੀ ਐਲੇਨਾ ਰਾਇਬਾਕੀਨਾ ਵਿਚਾਲੇ ਐਤਵਾਰ ਨੂੰ ਵੱਕਾਰੀ ਖ਼ਿਤਾਬ ਲਈ ਜ਼ੋਰਦਾਰ ਟੱਕਰ ਹੋਵੇਗੀ।

ਸਬਾਲੇਂਕਾ ਨੇ ਤੀਜੀ ਵਾਰ ਫਾਈਨਲ 'ਚ ਮਾਰੀ ਐਂਟਰੀ 
ਬੇਲਾਰੂਸ ਦੀ ਸਟਾਰ ਖਿਡਾਰਨ ਸਬਾਲੇਂਕਾ ਨੇ ਸੈਮੀਫਾਈਨਲ ਵਿੱਚ ਲਿੰਡਾ ਨੋਸਕੋਵਾ ਨੂੰ 6-3, 6-4 ਨਾਲ ਹਰਾ ਕੇ ਚਾਰ ਸਾਲਾਂ ਵਿੱਚ ਤੀਜੀ ਵਾਰ ਇਸ ਟੂਰਨਾਮੈਂਟ ਦੇ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ। ਸਬਾਲੇਂਕਾ ਨੇ ਇਹ ਮੁਕਾਬਲਾ ਸਿਰਫ਼ ਇੱਕ ਘੰਟਾ 28 ਮਿੰਟ ਵਿੱਚ ਆਪਣੇ ਨਾਮ ਕਰ ਲਿਆ। ਇਸ ਜਿੱਤ ਨਾਲ ਸਾਲ 2026 ਵਿੱਚ ਸਬਾਲੇਂਕਾ ਦਾ ਰਿਕਾਰਡ 12-1 ਹੋ ਗਿਆ ਹੈ।

ਰਾਇਬਾਕੀਨਾ ਨੇ ਸਵਿਤੋਲੀਨਾ ਨੂੰ ਦਿੱਤੀ ਮਾਤ 
ਦੂਜੇ ਪਾਸੇ, ਵਿਸ਼ਵ ਦੀ ਤੀਜੇ ਨੰਬਰ ਦੀ ਖਿਡਾਰਨ ਐਲੇਨਾ ਰਾਇਬਾਕੀਨਾ ਨੇ ਦੂਜੇ ਸੈਮੀਫਾਈਨਲ ਵਿੱਚ ਯੂਕ੍ਰੇਨ ਦੀ ਐਲੀਨਾ ਸਵਿਤੋਲੀਨਾ (ਨੌਵਾਂ ਦਰਜਾ) ਨੂੰ 7-5, 6-4 ਨਾਲ ਸ਼ਿਕਸਤ ਦੇ ਕੇ ਫਾਈਨਲ ਵਿੱਚ ਜਗ੍ਹਾ ਬਣਾਈ।