ਭਾਰਤ ਨੇ ਏਸ਼ੀਅਨ ਕੁਸ਼ਤੀ ਚੈਂਪੀਅਨਸ਼ਿਪ ਵਿੱਚ ਜਿੱਤੇ 10 ਤਮਗੇ

ਅੰਮਾਨ- ਭਾਰਤੀ ਪਹਿਲਵਾਨਾਂ ਨੇ ਏਸ਼ੀਅਨ ਕੁਸ਼ਤੀ ਚੈਂਪੀਅਨਸ਼ਿਪ 2025 ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਇੱਕ ਸੋਨ, ਤਿੰਨ ਚਾਂਦੀ ਅਤੇ ਛੇ ਕਾਂਸੀ ਦੇ ਤਮਗਿਆਂ ਸਮੇਤ ਕੁੱਲ 10 ਤਮਗੇ ਜਿੱਤੇ। ਦੋ ਭਾਰਤੀ ਪਹਿਲਵਾਨ, ਉਦਿਤ (61 ਕਿਲੋਗ੍ਰਾਮ) ਅਤੇ ਦੀਪਕ ਪੂਨੀਆ (92 ਕਿਲੋਗ੍ਰਾਮ) ਐਤਵਾਰ ਨੂੰ ਜੌਰਡਨ ਦੇ ਅਮਾਨ ਵਿੱਚ ਚੈਂਪੀਅਨਸ਼ਿਪ ਦੇ ਆਖਰੀ ਦਿਨ ਪੰਜ ਭਾਰ ਵਰਗਾਂ ਵਿੱਚ ਫ੍ਰੀਸਟਾਈਲ ਕੁਸ਼ਤੀ ਦੇ ਫਾਈਨਲ ਵਿੱਚ ਪਹੁੰਚੇ। ਦੋ ਹੋਰ ਮੁਕੁਲ ਦਹੀਆ (86 ਕਿਲੋਗ੍ਰਾਮ) ਅਤੇ ਦਿਨੇਸ਼ (125 ਕਿਲੋਗ੍ਰਾਮ) ਨੇ ਕਾਂਸੀ ਦੇ ਤਗਮੇ ਲਈ ਮੁਕਾਬਲਾ ਕੀਤਾ। 

ਦੀਪਕ ਪੂਨੀਆ 92 ਕਿਲੋਗ੍ਰਾਮ ਦੇ ਫਾਈਨਲ ਵਿੱਚ ਦੋ ਵਾਰ ਦੇ ਏਸ਼ੀਅਨ ਚੈਂਪੀਅਨ ਈਰਾਨ ਦੇ ਅਮੀਰ ਹੁਸੈਨ ਫਿਰੋਜ਼ਪੁਰ ਤੋਂ ਤਕਨੀਕੀ ਉੱਤਮਤਾ ਦੇ ਆਧਾਰ 'ਤੇ 10-0 ਨਾਲ ਹਾਰ ਗਏ। ਚੈਂਪੀਅਨਸ਼ਿਪ ਵਿੱਚ ਦੀਪਕ ਪੂਨੀਆ ਦਾ ਪੰਜਵਾਂ ਤਮਗਾ ਸੀ। ਉਸਨੇ ਕੁੱਲ ਪੰਜ ਤਗਮੇ ਜਿੱਤੇ ਹਨ ਜਿਨ੍ਹਾਂ ਵਿੱਚ ਤਿੰਨ ਚਾਂਦੀ ਅਤੇ ਦੋ ਕਾਂਸੀ ਦੇ ਤਮਗੇ ਸ਼ਾਮਲ ਹਨ। ਪੂਨੀਆ ਦੇ ਪਿਛਲੇ ਸਾਰੇ ਤਮਗੇ 86 ਕਿਲੋਗ੍ਰਾਮ ਵਰਗ ਵਿੱਚ ਆਏ ਸਨ। ਫਾਈਨਲ ਵਿੱਚ ਪਹੁੰਚਣ ਤੋਂ ਪਹਿਲਾਂ, ਦੀਪਕ ਪੂਨੀਆ ਨੇ ਇੱਕ ਔਖੇ ਕੁਆਰਟਰ ਫਾਈਨਲ ਮੈਚ ਵਿੱਚ ਕਿਰਗਿਸਤਾਨ ਦੇ ਬੇਕਜਾਤ ਰਾਖੀਮੋਵ ਨੂੰ 12-7 ਨਾਲ ਹਰਾਇਆ ਸੀ। ਇਸ ਤੋਂ ਬਾਅਦ ਉਸਨੇ ਜਾਪਾਨ ਦੇ ਤਾਕਾਸ਼ੀ ਇਸ਼ੀਗੁਰੋ ਵਿਰੁੱਧ 8-1 ਦੀ ਆਸਾਨ ਜਿੱਤ ਦਰਜ ਕੀਤੀ।     

ਇੱਕ ਹੋਰ ਮੈਚ ਵਿੱਚ, ਭਾਰਤੀ ਪਹਿਲਵਾਨ ਉਦਿਤ 61 ਕਿਲੋਗ੍ਰਾਮ ਦੇ ਫਾਈਨਲ ਵਿੱਚ ਜਾਪਾਨੀ ਪਹਿਲਵਾਨ ਸੁਦਾ ਤਕਾਰਾ ਤੋਂ 6-4 ਦੇ ਫਰਕ ਨਾਲ ਹਾਰ ਗਿਆ। ਉਦਿਤ ਨੇ ਕਿਰਗਿਸਤਾਨ ਦੇ ਬੇਕਬੋਲੋਤ ਮਿਰਜ਼ਾਨਾਜ਼ਾਰ ਉਲੂ ਨੂੰ 9-6 ਅਤੇ ਚੀਨ ਦੇ ਵਾਨਹਾਓ ਝੌ ਨੂੰ 2-0 ਨਾਲ ਹਰਾ ਕੇ ਫਾਈਨਲ ਵਿੱਚ ਆਪਣੀ ਜਗ੍ਹਾ ਬਣਾਈ ਸੀ।  ਭਾਰਤੀ ਪਹਿਲਵਾਨ ਦਿਨੇਸ਼ 125 ਕਿਲੋਗ੍ਰਾਮ ਸੈਮੀਫਾਈਨਲ ਵਿੱਚ ਮੰਗੋਲੀਆ ਦੇ ਮੁੰਖਤੂਰ ਲਖਗਾਵਾਗੇਰੇਲ ਤੋਂ ਹਾਰ ਗਿਆ। ਉਸਨੇ ਆਪਣੇ ਮੌਕੇ ਦਾ ਪੂਰਾ ਫਾਇਦਾ ਉਠਾਇਆ ਅਤੇ ਤੁਰਕਮੇਨਿਸਤਾਨ ਦੇ ਜ਼ਿਆਮੁਹੰਮਤ ਸਪਾਰੋਵ ਨੂੰ 14-12 ਦੇ ਸਕੋਰ ਨਾਲ ਹਰਾ ਕੇ ਕਾਂਸੀ ਦਾ ਤਗਮਾ ਜਿੱਤਿਆ। ਭਾਰਤ ਨੇ ਐਤਵਾਰ ਨੂੰ ਇਸ ਚੈਂਪੀਅਨਸ਼ਿਪ ਵਿੱਚ ਤਿੰਨ ਤਗਮੇ ਜਿੱਤੇ।