ਨਿਊਯਾਰਕ ਹਾਫ ਮੈਰਾਥਨ: ਗੁਲਵੀਰ ਸਿੰਘ ਨੇ ਕਾਂਸੀ ਦਾ ਤਗਮਾ ਜਿੱਤ ਕੇ ਰਚਿਆ ਇਤਿਹਾਸ

ਸਪੋਰਟਸ ਡੈਸਕ : ਭਾਰਤ ਦੇ ਲੰਬੀ ਦੂਰੀ ਦੇ ਦੌੜਾਕ ਗੁਲਵੀਰ ਸਿੰਘ ਨੇ ਐਤਵਾਰ ਨੂੰ ਨਿਊਯਾਰਕ ਸਿਟੀ (NYC) ਹਾਫ ਮੈਰਾਥਨ 2026 ਵਿੱਚ ਇੱਕ ਇਤਿਹਾਸਕ ਪ੍ਰਦਰਸ਼ਨ ਕਰਦਿਆਂ ਕਾਂਸੀ ਦਾ ਤਗਮਾ ਆਪਣੇ ਨਾਮ ਕੀਤਾ ਹੈ। ਇਸ ਸ਼ਾਨਦਾਰ ਦੌੜ ਦੇ ਨਾਲ ਹੀ ਗੁਲਵੀਰ ਨੇ ਭਾਰਤ ਦਾ ਰਾਸ਼ਟਰੀ ਰਿਕਾਰਡ ਵੀ ਤੋੜ ਦਿੱਤਾ ਹੈ। 

ਇੱਕ ਘੰਟੇ ਦੇ ਅੜਿੱਕੇ ਨੂੰ ਪਾਰ ਕਰਨ ਵਾਲੇ ਪਹਿਲੇ ਭਾਰਤੀ 
27 ਸਾਲਾ ਗੁਲਵੀਰ ਸਿੰਘ ਨੇ 21 ਕਿਲੋਮੀਟਰ ਦੀ ਇਹ ਦੌੜ ਸਿਰਫ਼ 59:42 ਮਿੰਟ ਵਿੱਚ ਪੂਰੀ ਕੀਤੀ। ਇਸ ਦੇ ਨਾਲ ਹੀ ਉਹ ਹਾਫ ਮੈਰਾਥਨ ਵਿੱਚ ਇੱਕ ਘੰਟੇ ਦੇ ਸਮੇਂ ਦੀ ਅੜਿੱਕੇ ਨੂੰ ਪਾਰ ਕਰਨ ਵਾਲੇ ਪਹਿਲੇ ਭਾਰਤੀ ਪੁਰਸ਼ ਦੌੜਾਕ ਬਣ ਗਏ ਹਨ।

ਅਵਿਨਾਸ਼ ਸਾਬਲੇ ਦਾ 6 ਸਾਲ ਪੁਰਾਣਾ ਰਿਕਾਰਡ ਤੋੜਿਆ
ਗੁਲਵੀਰ ਨੇ ਆਪਣੀ ਇਸ ਇਤਿਹਾਸਕ ਕੋਸ਼ਿਸ਼ ਨਾਲ ਅਵਿਨਾਸ਼ ਸਾਬਲੇ ਦੇ ਪੁਰਾਣੇ ਰਾਸ਼ਟਰੀ ਰਿਕਾਰਡ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਸਾਬਲੇ ਨੇ ਸਾਲ 2020 ਵਿੱਚ ਦਿੱਲੀ ਹਾਫ ਮੈਰਾਥਨ ਦੌਰਾਨ 1:00:30 ਦਾ ਸਮਾਂ ਕੱਢਿਆ ਸੀ। ਗੁਲਵੀਰ ਨੇ ਇਸ ਸਮੇਂ ਵਿੱਚ 48 ਸੈਕੰਡ ਦੀ ਕਟੌਤੀ ਕਰਕੇ ਭਾਰਤੀ ਲੰਬੀ ਦੂਰੀ ਦੀ ਦੌੜ ਵਿੱਚ ਨਵੀਂ ਮਿਸਾਲ ਕਾਇਮ ਕੀਤੀ ਹੈ।

ਸਿਰਫ਼ ਇੱਕ ਸੈਕੰਡ ਦੇ ਫਰਕ ਨਾਲ ਚਾਂਦੀ ਤੋਂ ਖੁੰਝੇ
ਇਹ ਮੁਕਾਬਲਾ ਬੇਹੱਦ ਰੋਮਾਂਚਕ ਰਿਹਾ। ਦੱਖਣੀ ਅਫ਼ਰੀਕਾ ਦੇ ਐਡਰੀਆਨ ਵਾਈਲਡਸ਼ਟ ਨੇ 59:30 ਦੇ ਸਮੇਂ ਨਾਲ ਸੋਨ ਤਗਮਾ ਜਿੱਤਿਆ, ਜਦੋਂ ਕਿ ਅਮਰੀਕਾ ਦੇ ਜ਼ੁਹੈਰ ਤਲਬੀ 59:41 ਦੇ ਸਮੇਂ ਨਾਲ ਦੂਜੇ ਸਥਾਨ 'ਤੇ ਰਹੇ। ਗੁਲਵੀਰ ਸਿੰਘ ਚਾਂਦੀ ਦਾ ਤਗਮਾ ਜਿੱਤਣ ਵਾਲੇ ਤਲਬੀ ਤੋਂ ਸਿਰਫ਼ ਇੱਕ ਸੈਕੰਡ ਪਿੱਛੇ ਰਹੇ। ਖ਼ਾਸ ਗੱਲ ਇਹ ਹੈ ਕਿ ਇਹ ਗੁਲਵੀਰ ਦੀ ਪੇਸ਼ੇਵਰ ਹਾਫ ਮੈਰਾਥਨ ਵਜੋਂ ਪਹਿਲੀ ਦੌੜ ਸੀ।

ਅਗਲਾ ਟੀਚਾ : ਰਾਸ਼ਟਰਮੰਡਲ ਅਤੇ ਏਸ਼ੀਆਈ ਖੇਡਾਂ 
ਭਾਰਤੀ ਫੌਜ ਦਾ ਇਹ ਦੌੜਾਕ ਇਸ ਸਮੇਂ ਅਮਰੀਕਾ ਦੇ ਕੋਲੋਰਾਡੋ ਸਪ੍ਰਿੰਗਸ ਵਿੱਚ ਸਿਖਲਾਈ ਲੈ ਰਿਹਾ ਹੈ। ਗੁਲਵੀਰ ਨੇ ਕਿਹਾ, "ਮੈਂ ਫਿੱਟ ਹਾਂ ਅਤੇ ਆਉਣ ਵਾਲੀਆਂ ਵੱਡੀਆਂ ਅੰਤਰਰਾਸ਼ਟਰੀ ਰੇਸਾਂ ਵਿੱਚ ਚੰਗੇ ਨਤੀਜਿਆਂ ਦੀ ਉਮੀਦ ਕਰ ਰਿਹਾ ਹਾਂ"। ਉਨ੍ਹਾਂ ਦਾ ਅਗਲਾ ਟੀਚਾ ਜੁਲਾਈ ਵਿੱਚ ਹੋਣ ਵਾਲੀਆਂ ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ਅਤੇ ਸਤੰਬਰ ਵਿੱਚ ਜਾਪਾਨ ਵਿੱਚ ਹੋਣ ਵਾਲੀਆਂ ਏਸ਼ੀਆਈ ਖੇਡਾਂ ਵਿੱਚ ਤਗਮੇ ਜਿੱਤਣਾ ਹੈ। ਗੁਲਵੀਰ ਸਿੰਘ ਪਹਿਲਾਂ ਹੀ 3,000 ਮੀਟਰ ਟਰੈਕ ਤੋਂ ਲੈ ਕੇ 25 ਕਿਲੋਮੀਟਰ ਸੜਕ ਦੌੜ ਤੱਕ ਕਈ ਰਾਸ਼ਟਰੀ ਰਿਕਾਰਡ ਆਪਣੇ ਨਾਮ ਕਰ ਚੁੱਕੇ ਹਨ। ਉਹਨਾਂ ਕੋਲ 5,000 ਮੀਟਰ ਅਤੇ 10,000 ਮੀਟਰ ਦੌੜ ਦੇ ਰਾਸ਼ਟਰੀ ਰਿਕਾਰਡ ਵੀ ਹਨ।