ਟ੍ਰਿਪਲ ਜੰਪਰ ਸੇਲਵਾ ਪ੍ਰਭੂ ਨੇ 17 ਮੀਟਰ ਦਾ ਅੜਿੱਕਾ ਪਾਰ ਕਰਕੇ ਜਿੱਤਿਆ ਚਾਂਦੀ ਦਾ ਤਗਮਾ

ਨਵੀਂ ਦਿੱਲੀ : ਭਾਰਤ ਦੇ ਉਭਰਦੇ ਟ੍ਰਿਪਲ ਜੰਪਰ ਸੇਲਵਾ ਪ੍ਰਭੂ ਨੇ ਅਮਰੀਕਾ ਦੇ ਫੇਏਟਵਿਲੇ ਵਿੱਚ ਚੱਲ ਰਹੀ ਐਨਸੀਏਏ (NCAA) ਇੰਡੋਰ ਚੈਂਪੀਅਨਸ਼ਿਪ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਚਾਂਦੀ ਦਾ ਤਗਮਾ ਜਿੱਤ ਕੇ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। ਇਸ 21 ਸਾਲਾ ਖਿਡਾਰੀ ਨੇ ਪੁਰਸ਼ਾਂ ਦੇ ਟ੍ਰਿਪਲ ਜੰਪ ਮੁਕਾਬਲੇ ਵਿੱਚ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕਰਦਿਆਂ ਦੂਜਾ ਸਥਾਨ ਹਾਸਲ ਕੀਤਾ।

ਪਹਿਲੀ ਵਾਰ 17 ਮੀਟਰ ਦਾ ਅੜਿੱਕਾ ਕੀਤਾ ਪਾਰ 
ਸੇਲਵਾ ਪ੍ਰਭੂ ਨੇ ਸ਼ਨੀਵਾਰ ਨੂੰ 17.05 ਮੀਟਰ ਦੀ ਲੰਬੀ ਛਾਲ ਲਗਾ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ। ਇਹ ਉਨ੍ਹਾਂ ਦੇ ਕਰੀਅਰ ਦੀ ਪਹਿਲੀ ਅਜਿਹੀ ਛਾਲ ਹੈ ਜਿੱਥੇ ਉਨ੍ਹਾਂ ਨੇ 17 ਮੀਟਰ ਦੇ ਅੜਿੱਕੇ ਨੂੰ ਪਾਰ ਕੀਤਾਹੈ। ਜ਼ਿਕਰਯੋਗ ਹੈ ਕਿ ਪ੍ਰਭੂ ਪਹਿਲਾਂ ਹੀ ਵਿਸ਼ਵ ਐਥਲੈਟਿਕਸ ਅੰਡਰ-20 ਚੈਂਪੀਅਨਸ਼ਿਪ 2022 ਵਿੱਚ ਚਾਂਦੀ ਦਾ ਤਗਮਾ ਜਿੱਤ ਚੁੱਕੇ ਹਨ ਅਤੇ ਉਹ ਅੰਡਰ-20 ਰਾਸ਼ਟਰੀ ਰਿਕਾਰਡ ਧਾਰਕ ਵੀ ਹਨ।

ਬਣਾਇਆ ਨਵਾਂ ਰਾਸ਼ਟਰੀ ਇੰਡੋਰ ਰਿਕਾਰਡ 
ਕੰਸਾਸ ਸਟੇਟ ਯੂਨੀਵਰਸਿਟੀ ਵੱਲੋਂ ਖੇਡਦਿਆਂ ਸੇਲਵਾ ਪ੍ਰਭੂ ਨੇ ਆਪਣੀ ਇਸ ਛਾਲ ਰਾਹੀਂ ਨਵਾਂ ਰਾਸ਼ਟਰੀ ਇੰਡੋਰ ਰਿਕਾਰਡ ਵੀ ਕਾਇਮ ਕੀਤਾ ਹੈ। ਹਾਲਾਂਕਿ, ਭਾਰਤੀ ਐਥਲੈਟਿਕਸ ਮਹਾਸੰਘ (AFI) ਦੇ ਦਿਸ਼ਾ-ਨਿਰਦੇਸ਼ ਇਸ ਰਿਕਾਰਡ ਨੂੰ ਮਾਨਤਾ ਦੇਣ ਦੇ ਸਬੰਧ ਵਿੱਚ ਕਾਫ਼ੀ ਸਖ਼ਤ ਹਨ। ਏਐਫਆਈ ਵਿਦੇਸ਼ਾਂ ਵਿੱਚ ਕੀਤੇ ਗਏ ਪ੍ਰਦਰਸ਼ਨਾਂ ਨੂੰ ਉਦੋਂ ਤੱਕ ਮਾਨਤਾ ਨਹੀਂ ਦਿੰਦਾ ਜਦੋਂ ਤੱਕ ਉਹ ਤਕਨੀਕੀ ਅਤੇ ਡੋਪਿੰਗ ਨਾਲ ਜੁੜੀਆਂ ਸ਼ਰਤਾਂ ਨੂੰ ਪੂਰਾ ਨਹੀਂ ਕਰਦੇ।

ਡੋਪਿੰਗ ਟੈਸਟ ਨੂੰ ਲੈ ਕੇ ਪੇਚ 
ਐਨਸੀਏਏ ਆਪਣਾ ਡੋਪਿੰਗ ਟੈਸਟ ਪ੍ਰੋਗਰਾਮ ਖੁਦ ਚਲਾਉਂਦਾ ਹੈ, ਜਿਸ ਨੂੰ ਵਿਸ਼ਵ ਡੋਪਿੰਗ ਵਿਰੋਧੀ ਏਜੰਸੀ (WADA) ਤੋਂ ਮਾਨਤਾ ਪ੍ਰਾਪਤ ਨਹੀਂ ਹੈ। ਇਸੇ ਕਾਰਨ ਅਕਸਰ ਵਿਦੇਸ਼ੀ ਮੁਕਾਬਲਿਆਂ ਵਿੱਚ ਕੀਤੇ ਗਏ ਪ੍ਰਦਰਸ਼ਨਾਂ ਨੂੰ ਰਾਸ਼ਟਰੀ ਰਿਕਾਰਡ ਵਜੋਂ ਪ੍ਰਮਾਣਿਤ ਕਰਨ ਵਿੱਚ ਮੁਸ਼ਕਲਾਂ ਆਉਂਦੀਆਂ ਹਨ।