IND vs AUS, Women 1st ODI: ਭਾਰਤ ਨੇ ਆਸਟ੍ਰੇਲੀਆ ਨੂੰ ਦਿੱਤਾ 215 ਦੌੜਾਂ ਦਾ ਟੀਚਾ

ਬ੍ਰਿਸਬੇਨ : ਕਪਤਾਨ ਹਰਮਨਪ੍ਰੀਤ ਕੌਰ ਅਤੇ ਉਪ-ਕਪਤਾਨ ਸਮ੍ਰਿਤੀ ਮੰਧਾਨਾ ਦੇ ਸ਼ਾਨਦਾਰ ਅਰਧ ਸੈਂਕੜਿਆਂ ਦੇ ਬਾਵਜੂਦ, ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਆਸਟ੍ਰੇਲੀਆ ਵਿਰੁੱਧ ਪਹਿਲੇ ਵਨਡੇ ਅੰਤਰਰਾਸ਼ਟਰੀ (ODI) ਮੈਚ ਵਿੱਚ ਮੰਗਲਵਾਰ ਨੂੰ 214 ਦੌੜਾਂ ਬਣਾ ਕੇ ਆਊਟ ਹੋ ਗਈ। ਆਸਟ੍ਰੇਲੀਆ ਵੱਲੋਂ ਸਪਿਨਰ ਐਸ਼ਲੇ ਗਾਰਡਨਰ ਸਭ ਤੋਂ ਸਫਲ ਗੇਂਦਬਾਜ਼ ਰਹੀ, ਜਿਸ ਨੇ 33 ਦੌੜਾਂ ਦੇ ਕੇ 3 ਅਹਿਮ ਵਿਕਟਾਂ ਹਾਸਲ ਕੀਤੀਆਂ।

ਖ਼ਰਾਬ ਰਹੀ ਭਾਰਤ ਦੀ ਸ਼ੁਰੂਆਤ 
ਭਾਰਤ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਸੀ, ਪਰ ਸ਼ੁਰੂਆਤ ਬੇਹੱਦ ਨਿਰਾਸ਼ਾਜਨਕ ਰਹੀ। ਸੱਟ ਤੋਂ ਉਭਰ ਕੇ ਵਾਪਸੀ ਕਰ ਰਹੀ ਪ੍ਰਤਿਕਾ ਰਾਵਲ ਮੈਚ ਦੇ ਪਹਿਲੇ ਓਵਰ ਦੀ ਦੂਜੀ ਹੀ ਗੇਂਦ 'ਤੇ ਮੇਗਨ ਸ਼ਟ ਦੀ ਇਨਸਵਿੰਗਰ ਦਾ ਸ਼ਿਕਾਰ ਹੋ ਗਈ। ਤੀਜੇ ਨੰਬਰ 'ਤੇ ਬੱਲੇਬਾਜ਼ੀ ਕਰਨ ਉਤਰੀ ਸ਼ੇਫਾਲੀ ਵਰਮਾ (04) ਵੀ ਕੁਝ ਖ਼ਾਸ ਨਹੀਂ ਕਰ ਸਕੀ ਅਤੇ ਡਾਰਸੀ ਬ੍ਰਾਊਨ ਨੂੰ ਸਿੱਧਾ ਕੈਚ ਦੇ ਬੈਠੀ।

ਮੰਧਾਨਾ ਅਤੇ ਹਰਮਨਪ੍ਰੀਤ ਨੇ ਸੰਭਾਲੀ ਪਾਰੀ 
ਸ਼ੁਰੂਆਤੀ ਝਟਕਿਆਂ ਤੋਂ ਬਾਅਦ ਸਮ੍ਰਿਤੀ ਮੰਧਾਨਾ ਨੇ 68 ਗੇਂਦਾਂ ਵਿੱਚ 58 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ, ਜਿਸ ਵਿੱਚ ਉਨ੍ਹਾਂ ਦੇ ਦਰਸ਼ਨੀ ਡਰਾਈਵ ਅਤੇ ਸਲਿਪ ਵੱਲ ਲਗਾਏ ਚੌਕੇ ਖਿੱਚ ਦਾ ਕੇਂਦਰ ਰਹੇ। ਜੈਮੀਮਾ ਰੌਡਰਿਗਜ਼ (08) ਅਤੇ ਦੀਪਤੀ ਸ਼ਰਮਾ (02) ਦੇ ਜਲਦੀ ਆਊਟ ਹੋਣ ਤੋਂ ਬਾਅਦ ਕਪਤਾਨ ਹਰਮਨਪ੍ਰੀਤ ਕੌਰ ਨੇ 84 ਗੇਂਦਾਂ ਵਿੱਚ 53 ਦੌੜਾਂ ਬਣਾ ਕੇ ਪਾਰੀ ਨੂੰ ਸੰਭਾਲਣ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਵੀ ਗਾਰਡਨਰ ਦੀ ਗੇਂਦ 'ਤੇ ਸਵੀਪ ਸ਼ਾਟ ਖੇਡਦਿਆਂ ਆਪਣੀ ਵਿਕਟ ਗੁਆ ਬੈਠੀ।

ਕਾਸ਼ਵੀ ਗੌਤਮ ਦਾ ਤੂਫ਼ਾਨੀ ਅੰਦਾਜ਼ 
ਭਾਰਤ ਨੂੰ 200 ਦੌੜਾਂ ਦੇ ਪਾਰ ਪਹੁੰਚਾਉਣ ਵਿੱਚ ਕਾਸ਼ਵੀ ਗੌਤਮ ਨੇ ਅਹਿਮ ਭੂਮਿਕਾ ਨਿਭਾਈ। ਉਨ੍ਹਾਂ ਨੇ 44 ਗੇਂਦਾਂ ਵਿੱਚ 43 ਦੌੜਾਂ ਦੀ ਤੇਜ਼ ਪਾਰੀ ਖੇਡੀ, ਜਿਸ ਵਿੱਚ ਤਿੰਨ ਸ਼ਾਨਦਾਰ ਛੱਕੇ ਸ਼ਾਮਲ ਸਨ। ਰਿਚਾ ਘੋਸ਼ ਨੇ ਵੀ 23 ਦੌੜਾਂ ਦਾ ਯੋਗਦਾਨ ਪਾਇਆ।

ਆਸਟ੍ਰੇਲੀਆਈ ਟੀਮ ਵਿੱਚ ਬਦਲਾਅ 
ਜ਼ਿਕਰਯੋਗ ਹੈ ਕਿ ਕਿਮ ਗਾਰਥ ਅਤੇ ਐਲੀਸੇ ਪੈਰੀ ਦੇ ਜ਼ਖਮੀ ਹੋ ਕੇ ਸੀਰੀਜ਼ ਤੋਂ ਬਾਹਰ ਹੋਣ ਕਾਰਨ ਮੇਗਨ ਸ਼ਟ ਅਤੇ ਲੂਸੀ ਹੈਮਿਲਟਨ ਨੂੰ ਆਖਰੀ ਸਮੇਂ 'ਤੇ ਆਸਟ੍ਰੇਲੀਆਈ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਸੀ। ਆਸਟ੍ਰੇਲੀਆਈ ਸਪਿਨਰਾਂ ਨੇ ਵਿਚਕਾਰਲੇ ਓਵਰਾਂ ਵਿੱਚ ਭਾਰਤੀ ਬੱਲੇਬਾਜ਼ਾਂ 'ਤੇ ਲਗਾਤਾਰ ਦਬਾਅ ਬਣਾਈ ਰੱਖਿਆ।