ICC Rankings : ਰਾਸ਼ਿਦ ਖਾਨ ਦੀ ਚੋਟੀ ਦੇ 10 ਵਿੱਚ ਵਾਪਸੀ, ਸੂਰਿਆਕੁਮਾਰ ਅਜੇ ਵੀ ਸਿਖਰ ''ਤੇ
Wednesday, Mar 20, 2024 - 06:27 PM (IST)
ਦੁਬਈ : ਸੱਟ ਤੋਂ ਉਭਰ ਕੇ ਟੀਮ 'ਚ ਵਾਪਸੀ ਕਰਦੇ ਹੋਏ ਅਫਗਾਨਿਸਤਾਨ ਦੇ ਲੈੱਗ ਸਪਿਨਰ ਰਾਸ਼ਿਦ ਖਾਨ ਨੇ ਆਇਰਲੈਂਡ ਖਿਲਾਫ ਹਾਲ ਹੀ 'ਚ ਖਤਮ ਹੋਈ ਸੀਰੀਜ਼ 'ਚ ਦਮਦਾਰ ਪ੍ਰਦਰਸ਼ਨ ਦੇ ਬਾਅਦ ਟੀ-20 ਆਈ ਗੇਂਦਬਾਜ਼ੀ ਰੈਂਕਿੰਗ ਦੇ ਸਿਖਰਲੇ 10 'ਚ ਮੁੜ ਪ੍ਰਵੇਸ਼ ਕਰ ਲਿਆ ਹੈ। ਰਾਸ਼ਿਦ ਆਈਸੀਸੀ ਦੁਆਰਾ ਅਪਡੇਟ ਕੀਤੀ ਰੈਂਕਿੰਗ ਵਿੱਚ ਚਾਰ ਸਥਾਨ ਦੇ ਫਾਇਦੇ ਨਾਲ ਨੌਵੇਂ ਸਥਾਨ 'ਤੇ ਪਹੁੰਚ ਗਿਆ ਹੈ। ਉਹ ਆਇਰਲੈਂਡ ਦੀ ਸੀਰੀਜ਼ ਵਿਚ ਪਲੇਅਰ ਆਫ ਦਿ ਸੀਰੀਜ਼ ਰਿਹਾ ਸੀ ਜਿਸ ਨੂੰ ਅਫਗਾਨਿਸਤਾਨ ਨੇ 2-1 ਦੇ ਫਰਕ ਨਾਲ ਜਿੱਤਿਆ ਸੀ।
ਇਸ 25 ਸਾਲਾ ਖਿਡਾਰੀ ਨੇ ਤਿੰਨ ਮੈਚਾਂ ਵਿੱਚ 5.62 ਦੀ ਔਸਤ ਨਾਲ 8 ਵਿਕਟਾਂ ਲਈਆਂ। 2023 ਵਿਸ਼ਵ ਕੱਪ ਦੌਰਾਨ ਪਿੱਠ ਦੀ ਸੱਟ ਤੋਂ ਉਭਰਨ ਤੋਂ ਬਾਅਦ ਕਿਸੇ ਵੀ ਫਾਰਮੈਟ ਵਿੱਚ ਇਹ ਉਸ ਦੀ ਪਹਿਲੀ ਲੜੀ ਸੀ। ਰਾਸ਼ਿਦ ਦੇ ਸਾਥੀ ਨਵੀਨ-ਉਲ-ਹੱਕ (ਦੋ ਸਥਾਨ ਚੜ੍ਹ ਕੇ 55ਵੇਂ ਸਥਾਨ 'ਤੇ) ਨੇ ਆਇਰਲੈਂਡ ਲੜੀ ਦੌਰਾਨ ਤਿੰਨ ਵਿਕਟਾਂ ਲੈਣ ਤੋਂ ਬਾਅਦ ਕੁਝ ਫਾਇਦਾ ਕੀਤਾ ਹੈ, ਜਦਕਿ ਆਇਰਲੈਂਡ ਦੀ ਤਿਕੜੀ ਜੋਸ਼ ਲਿਟਲ (ਸੱਤ ਸਥਾਨ ਚੜ੍ਹ ਕੇ 39ਵੇਂ ਸਥਾਨ 'ਤੇ), ਮਾਰਕ ਅਡਾਇਰ (ਦੋ ਸਥਾਨਾਂ ਦੇ ਵਾਧੇ ਨਾਲ 56ਵੇਂ ਸਥਾਨ 'ਤੇ) ਅਤੇ ਬੈਰੀ ਮੈਕਕਾਰਥੀ (15 ਸਥਾਨ ਉੱਪਰ 77ਵੇਂ ਸਥਾਨ 'ਤੇ) ਨੇ ਵੀ ਇੰਗਲੈਂਡ ਦੇ ਸਪਿਨਰ ਆਦਿਲ ਰਾਸ਼ਿਦ ਦੀ ਅਗਵਾਈ 'ਚ ਆਪਣੀ T20I ਗੇਂਦਬਾਜ਼ ਦਰਜਾਬੰਦੀ ਵਿੱਚ ਸੁਧਾਰ ਕੀਤਾ ਹੈ।
ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ ਬੁੱਧਵਾਰ ਨੂੰ ਆਈਸੀਸੀ ਵਨਡੇ ਬੱਲੇਬਾਜ਼ੀ ਰੈਂਕਿੰਗ 'ਚ ਚੌਥੇ ਸਥਾਨ 'ਤੇ ਪਹੁੰਚ ਗਿਆ ਹੈ। ਰੋਹਿਤ 746 ਰੇਟਿੰਗ ਅੰਕਾਂ ਨਾਲ ਚੌਥੇ ਸਥਾਨ 'ਤੇ ਪਹੁੰਚ ਗਿਆ ਹੈ ਅਤੇ ਉਹ ਆਪਣੇ ਸਾਥੀਆਂ ਵਿਰਾਟ ਕੋਹਲੀ (768 ਅੰਕ) ਅਤੇ ਸ਼ੁਭਮਨ ਗਿੱਲ (801 ਅੰਕ) ਤੋਂ ਪਿੱਛੇ ਹੈ। ਪਾਕਿਸਤਾਨ ਦੇ ਸਾਬਕਾ ਕਪਤਾਨ ਬਾਬਰ ਆਜ਼ਮ 824 ਅੰਕਾਂ ਨਾਲ ਰੈਂਕਿੰਗ 'ਚ ਸਿਖਰ 'ਤੇ ਹਨ।
ਟੈਸਟ ਰੈਂਕਿੰਗ ਦੀ ਗੱਲ ਕਰੀਏ ਤਾਂ ਭਾਰਤ ਦੇ ਸਟਾਰ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਕੁੱਲ 847 ਅੰਕਾਂ ਨਾਲ ਦੂਜੇ ਤੋਂ ਤੀਜੇ ਸਥਾਨ 'ਤੇ ਆ ਗਏ ਹਨ। ਹਾਲਾਂਕਿ ਆਸਟਰੇਲੀਆ ਦੇ ਸੱਜੇ ਹੱਥ ਦੇ ਤੇਜ਼ ਗੇਂਦਬਾਜ਼ ਜੋਸ਼ ਹੇਜ਼ਲਵੁੱਡ ਦੇ ਵੀ ਬਰਾਬਰ ਅੰਕ ਹਨ ਪਰ ਉਨ੍ਹਾਂ ਦੀ ਇਕਾਨਮੀ ਰੇਟ ਬਿਹਤਰ ਹੈ। ਭਾਰਤੀ ਬੱਲੇਬਾਜ਼ ਸੂਰਿਆਕੁਮਾਰ ਯਾਦਵ ਨੇ ਕੁੱਲ 861 ਅੰਕਾਂ ਦੇ ਨਾਲ ਟੀ-20I ਬੱਲੇਬਾਜ਼ੀ ਦਰਜਾਬੰਦੀ ਦੇ ਸਿਖਰ 'ਤੇ ਆਪਣਾ ਦਬਦਬਾ ਜਾਰੀ ਰੱਖਿਆ।
