ਹਾਕੀ ਵਿਸ਼ਵ ਕੱਪ 2026: ਭਾਰਤ ਦਾ ਸਫ਼ਰ ਖ਼ਤਮ, ਸੈਮੀਫਾਈਨਲ ਦੀ ਦੌੜ ''ਚੋਂ ਹੋਇਆ ਬਾਹਰ

ਸਪੋਰਟਸ ਡੈਸਕ - ਭਾਰਤੀ ਪੁਰਸ਼ ਹਾਕੀ ਟੀਮ ਦਾ ਹਾਕੀ ਵਿਸ਼ਵ ਕੱਪ 2026 ਦੇ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕਰਨ ਦਾ ਸੁਪਨਾ ਟੁੱਟ ਗਿਆ ਹੈ। ਐਮਸਟਲਵੀਨ ਵਿੱਚ ਖੇਡੇ ਗਏ ਦੂਜੇ ਰਾਊਂਡ ਦੇ ਪੂਲ-ਈ ਦੇ ਇੱਕ ਅਹਿਮ ਮੁਕਾਬਲੇ ਵਿੱਚ ਅਰਜਨਟੀਨਾ ਨੇ ਭਾਰਤ ਨੂੰ 5-3 ਨਾਲ ਹਰਾ ਕੇ ਟੂਰਨਾਮੈਂਟ ਵਿੱਚੋਂ ਬਾਹਰ ਕਰ ਦਿੱਤਾ ਹੈ। ਭਾਰਤ ਨੂੰ ਸੈਮੀਫਾਈਨਲ ਦੀਆਂ ਉਮੀਦਾਂ ਜ਼ਿੰਦਾ ਰੱਖਣ ਲਈ ਸਿਰਫ਼ ਜਿੱਤ ਹੀ ਨਹੀਂ, ਬਲਕਿ ਇੱਕ ਵੱਡੇ ਅੰਤਰ ਦੀ ਜਿੱਤ ਦੀ ਲੋੜ ਸੀ, ਪਰ ਅਰਜਨਟੀਨਾ ਦੇ ਮਜ਼ਬੂਤ ਹਮਲੇ ਅੱਗੇ ਭਾਰਤੀ ਡਿਫੈਂਸ ਟਿਕ ਨਹੀਂ ਸਕਿਆ ਅਤੇ ਟੀਮ 2 ਗੋਲਾਂ ਦੇ ਅੰਤਰ ਨਾਲ ਇਹ ਮੈਚ ਹਾਰ ਗਈ।

ਅਰਜਨਟੀਨਾ ਨੇ ਮੈਚ ਦੇ ਪਹਿਲੇ ਕੁਆਰਟਰ ਵਿੱਚ ਹੀ ਬੜ੍ਹਤ ਬਣਾ ਲਈ ਸੀ ਅਤੇ ਦੂਜੇ ਕੁਆਰਟਰ ਵਿੱਚ ਆਪਣਾ ਸਕੋਰ 2-0 ਕਰ ਦਿੱਤਾ। ਭਾਰਤ ਵੱਲੋਂ ਸੁਖਜੀਤ ਸਿੰਘ ਨੇ ਇੱਕ ਗੋਲ ਕਰਕੇ ਵਾਪਸੀ ਦੀ ਕੋਸ਼ਿਸ਼ ਜ਼ਰੂਰ ਕੀਤੀ, ਪਰ ਅਰਜਨਟੀਨਾ ਨੇ ਤੁਰੰਤ ਜਵਾਬੀ ਗੋਲ ਕਰਕੇ ਫਿਰ ਤੋਂ ਦੋ ਗੋਲਾਂ ਦੀ ਬੜ੍ਹਤ ਬਣਾ ਲਈ। ਦੂਜੇ ਹਾਫ਼ ਵਿੱਚ ਅਰਜਨਟੀਨਾ ਨੇ ਦੋ ਹੋਰ ਗੋਲ ਕਰਕੇ ਸਕੋਰ ਨੂੰ 5-1 'ਤੇ ਪਹੁੰਚਾ ਦਿੱਤਾ। ਚੌਥੇ ਕੁਆਰਟਰ ਦੇ ਆਖਰੀ ਮਿੰਟਾਂ ਵਿੱਚ ਭਾਰਤ ਦੇ ਸੁਖਜੀਤ ਅਤੇ ਹਾਰਦਿਕ ਨੇ ਗੋਲ ਕਰਕੇ ਅੰਤਰ ਨੂੰ ਘੱਟ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਉਦੋਂ ਤੱਕ ਕਾਫ਼ੀ ਦੇਰ ਹੋ ਚੁੱਕੀ ਸੀ। ਸੈਮੀਫਾਈਨਲ ਦੀ ਦੌੜ 'ਚੋਂ ਬਾਹਰ ਹੋਣ ਤੋਂ ਬਾਅਦ ਹੁਣ ਭਾਰਤੀ ਟੀਮ 7ਵੇਂ ਅਤੇ 8ਵੇਂ ਸਥਾਨ ਲਈ ਬੈਲਜੀਅਮ ਦੀ ਟੀਮ ਨਾਲ ਮੁਕਾਬਲਾ ਕਰੇਗੀ। 

ਹਾਕੀ ਵਿਸ਼ਵ ਕੱਪ 2026 ਵਿੱਚ ਭਾਰਤ ਦੇ ਸਫ਼ਰ 'ਤੇ ਨਜ਼ਰ ਮਾਰੀਏ ਤਾਂ ਟੀਮ ਨੇ ਵੇਲਜ਼ ਨੂੰ 3-1 ਨਾਲ ਹਰਾ ਕੇ ਚੰਗੀ ਸ਼ੁਰੂਆਤ ਕੀਤੀ ਸੀ, ਪਰ ਅਗਲੇ ਮੈਚ ਵਿੱਚ ਇੰਗਲੈਂਡ ਤੋਂ 4-2 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਇਸ ਤੋਂ ਬਾਅਦ ਭਾਰਤ ਨੇ ਪਾਕਿਸਤਾਨ ਨੂੰ 5-3 ਨਾਲ ਹਰਾਇਆ, ਪਰ ਨੀਦਰਲੈਂਡਜ਼ ਹੱਥੋਂ 3-1 ਅਤੇ ਹੁਣ ਅਰਜਨਟੀਨਾ ਹੱਥੋਂ 5-3 ਨਾਲ ਮਿਲੀ ਹਾਰ ਨੇ ਭਾਰਤ ਦੇ ਖ਼ਿਤਾਬੀ ਸਫ਼ਰ 'ਤੇ ਪਾਣੀ ਫੇਰ ਦਿੱਤਾ।