ਕਨੇਰੀਆ ਦੇ ਬਿਆਨ ''ਤੇ ਗੌਤਮ ਗੰਭੀਰ ਨੇ ਪਾਕਿਸਤਾਨ ਨੂੰ ਲਿਆ ਲੰਮੇਂ ਹੱਥੀਂ

ਸਪੋਰਟਸ ਡੈਸਕ— ਸਾਬਕਾ ਕ੍ਰਿਕਟਰ ਅਤੇ ਮੌਜੂਦਾ ਭਾਜਪਾ ਸੰਸਦ ਮੈਂਬਰ ਗੌਤਮ ਗੰਭੀਰ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਹਿੰਦੂ ਹੋਣ ਕਾਰਨ ਸਾਥੀ ਖਿਡਾਰੀਆਂ ਦਾ ਬੁਰਾ ਸਲੂਕ ਝੱਲਣ ਵਾਲੇ ਪਾਕਿਸਤਾਨੀ ਕ੍ਰਿਕਟਰ ਦਾਨਿਸ਼ ਕਨੇਰੀਆ ਦੇ ਬਿਆਨ ਨੇ ਪਾਕਿਸਤਾਨ ਦਾ ਅਸਲੀ ਚਿਹਰਾ ਦਿਖਾ ਦਿੱਤਾ ਹੈ। ਗੰਭੀਰ ਨੇ ਕਿਹਾ, ''ਭਾਰਤ 'ਚ ਮੁਹੰਮਦ ਅਜ਼ਹਰੂਦੀਨ ਜਿਹੇ ਕਪਤਾਨ ਹੋਏ ਹਨ ਜੋ ਲੰਬੇ ਸਮੇਂ ਤਕ ਕਪਤਾਨ ਰਹੇ।

ਧਾਰਮਿਕ ਵਿਤਕਰਾ ਉਸ ਦੇਸ਼ 'ਚ ਹੋ ਰਿਹਾ ਹੈ ਜਿਸ ਦੇ ਕਪਤਾਨ ਇਮਰਾਨ ਖਾਨ ਖੁਦ ਕ੍ਰਿਕਟਰ ਰਹੇ ਹਨ। ਉਨ੍ਹਾਂ ਕਿਹਾ, ''ਕਨੇਰੀਆ ਨੇ ਆਪਣੇ ਦੇਸ਼ ਲਈ ਕਈ ਟੈਸਟ ਮੈਚ ਖੇਡੇ ਹਨ। ਇਸ ਦੇ ਬਾਵਜੂਦ ਉਸ ਨੂੰ ਇਹ ਸਭ ਝੱਲਣਾ ਪਿਆ ਤਾਂ ਇਹ ਸ਼ਰਮਨਾਕ ਹੈ।''

ਪਾਕਿਸਤਾਨ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਸ਼ੋਏਬ ਅਖਤਰ ਨੇ ਦਾਅਵਾ ਕੀਤਾ ਸੀ ਕਿ ਉਨ੍ਹਾਂ ਦੇ ਸਾਥੀ ਖਿਡਾਰੀ ਦਾਨਿਸ਼ ਕਨੇਰੀਆ ਦੇ ਨਾਲ ਕੁਝ ਪਾਕਿਸਤਾਨੀ ਕ੍ਰਿਕਟਰਾਂ ਨੇ ਵਿਤਕਰੇ ਵਾਲਾ ਸਲੂਕ ਕੀਤਾ ਅਤੇ ਉਹ ਉਸ ਨਾਲ ਖਾਣਾ ਵੀ ਨਹੀਂ ਖਾਂਦੇ ਸਨ ਕਿਉਂਕਿ ਉਹ ਹਿੰਦੂ ਸੀ। ਕਨੇਰੀਆ ਨੇ ਉਨ੍ਹਾਂ ਦੇ ਦਾਅਵੇ ਦਾ ਸਮਰਥਨ ਕਰਦੇ ਹੋਏ ਕਿਹਾ ਸੀ, ''ਸ਼ੋਏਬ ਭਰਾ ਮਹਾਨ ਖਿਡਾਰੀ ਹੈ। ਉਹ ਗੇਂਦਬਾਜ਼ੀ ਦੇ ਨਾਲ-ਨਾਲ ਗੱਲਾਂ ਵੀ ਖਰੀਆਂ-ਖਰੀਆਂ ਕਰਦੇ ਹਨ। ਜਦੋਂ ਮੈਂ ਖੇਡਦਾ ਸੀ ਤਾਂ ਇਨ੍ਹਾਂ ਮਸਲਿਆਂ 'ਤੇ ਬੋਲਣ ਦੀ ਹਿੰਮਤ ਨਹੀਂ ਸੀ ਪਰ ਸ਼ੋਏਬ ਭਰਾ ਦੇ ਬਿਆਨ ਦੇ ਬਾਅਦ ਹੁਣ ਆ ਗਈ ਹੈ। ਸ਼ੋਏਬ ਭਰਾ ਦੇ ਨਾਲ ਇੰਜੀ ਭਰਾ (ਇੰਜ਼ਮਾਮ ਉਲ ਹੱਕ), ਮੁਹੰਮਦ ਯੂਸੁਫ ਅਤੇ ਯੂਨਿਸ ਭਰਾ ਨੇ ਵੀ ਹਮੇਸ਼ਾ ਮੇਰਾ ਸਾਥ ਦਿੱਤਾ।'' ਉਨ੍ਹਾਂ ਕਿਹਾ, ''ਜਿਨ੍ਹਾਂ ਨੇ ਮੇਰਾ ਸਾਥ ਨਹੀਂ ਦਿੱਤਾ, ਮੈਂ ਛੇਤੀ ਹੀ ਉਨ੍ਹਾਂ ਦੇ ਨਾਵਾਂ ਦਾ ਖੁਲਾਸਾ ਕਰਾਂਗਾ।''