ਸਾਹਮਣੇ ਆਈ ਰੋਨਾਲਡੋ ਨੂੰ ਫ੍ਰੀ ਬਰਗਰ ਦੇਣ ਵਾਲੀ ਮਹਿਲਾ ਕਰਮਚਾਰੀ, ਫੁੱਟਬਾਲਰ ਨੇ ਕੀਤੀ ਸੀ ਅਪੀਲ
09/21/2019 3:18:55 AM
ਨਵੀਂ ਦਿੱਲੀ - ਯੁਵੈਂਟਸ ਸਟਾਰ ਕ੍ਰਿਸਟੀਆਨੋ ਰੋਨਾਲਡੋ ਨੇ ਬੀਤੇ ਦਿਨੀਂ ਇਕ ਇੰਟਰਵਿਊ ਵਿਚ ਆਪਣੇ ਬਚਪਨ ਨਾਲ ਜੁੜੀਆਂ ਕਈ ਗੱਲਾਂ ਆਪਣੇ ਪ੍ਰਸ਼ੰਸਕਾਂ ਨਾਲ ਸਾਂਝੀਆਂ ਕੀਤੀਆਂ ਸਨ। ਰੋਨਾਲਡੋ ਨੇ ਕਿਹਾ ਸੀ ਕਿ ਗਰੀਬੀ ਦੇ ਦੌਰ ਵਿਚ ਅਜਿਹਾ ਸਮਾਂ ਵੀ ਆਇਆ, ਜਦੋਂ ਉਹ ਬਰਗਰ ਖਾਣ ਲਈ ਭੀਖ ਮੰਗਦਾ ਸੀ। ਰੋਨਾਲਡੋ ਨੇ ਕਿਹਾ, ''ਭੁੱਖ ਲੱਗਣ 'ਤੇ ਉਹ ਮੈਕਡੋਨਾਲਡ ਰੈਸਟੋਰੈਂਟ ਦੇ ਪਿਛਲੇ ਦਰਵਾਜ਼ੇ 'ਤੇ ਜਾਂਦਾ ਸੀ ਤੇ ਉਥੇ ਬਚੇ ਹੋਏ ਬਰਗਰ ਦੇਣ ਦੀ ਬੇਨਤੀ ਕਰਦਾ ਸੀ। ਰੈਸਟੋਰੈਂਟ 'ਚ ਕੰਮ ਕਰਦੀਆਂ 3 ਮਹਿਲਾਵਾਂ ਉਸ ਦੀ ਮਦਦ ਕਰਦੀਆਂ ਸਨ। ਇਨ੍ਹਾਂ 'ਚੋਂ ਇਕ ਮਹਿਲਾ ਦਾ ਨਾਂ ਏਡੇਨਾ ਸੀ।''
ਰੋਨਾਲਡੋ ਨੇ ਇੰਟਰਵਿਊ ਦੌਰਾਨ ਉਕਤ ਮਹਿਲਾਵਾਂ ਨੂੰ ਲੱਭਣ ਦੀ ਅਪੀਲ ਕੀਤੀ ਸੀ। ਹੁਣ ਬ੍ਰਿਟਿਸ਼ ਮੀਡੀਆ ਵਲੋਂ ਉਨ੍ਹਾਂ 'ਚੋਂ ਇਕ ਮਹਿਲਾ ਨੂੰ ਲੱਭ ਲਿਆ ਗਿਆ ਹੈ।
ਬ੍ਰਿਟਿਸ਼ ਪੱਤਰਕਾਰ ਪੀਅਰਸ ਮੋਰਗਨ ਨੇ ਟਵੀਟ ਕੀਤਾ ਹੈ ਕਿ ਸ਼ਾਇਦ ਅਸੀਂ ਐਡੇਨਾ ਨੂੰ ਲੱਭ ਲਿਆ ਹੈ। ਪੁਰਤਗਾਲੀ ਰੇਡੀਓ ਨੇ ਵੀ ਬਾਕੀ ਬਚੀਆਂ ਦੋਵਾਂ 'ਚੋਂ ਇਕ ਮਹਿਲਾ ਨੂੰ ਲੱਭ ਲਿਆ ਹੈ। ਪਾਓਲਾ ਲੇਕਾ ਨਾਂ ਦੀ ਇਹ ਮਹਿਲਾ ਖੁਦ ਹੀ ਸਾਹਮਣੇ ਆਈ ਤੇ ਖੁਦ ਨੂੰ ਮੈਕਡੋਨਾਲਡ ਦੀ ਸਾਬਕਾ ਕਰਮਚਾਰੀ ਦੱਸਿਆ ਅਤੇ ਉਸ ਨੇ ਰੋਨਾਲਡੋ ਦੀ ਕਹਾਣੀ ਦੀ ਪੁਸ਼ਟੀ ਕੀਤੀ।
ਪਾਓਲਾ ਨੇ ਕਿਹਾ ਕਿ ਕੰਮ ਦੌਰਾਨ ਉਦੋਂ ਐਡੇਨਾ ਉਨ੍ਹਾਂ ਦੀ ਸੀਨੀਅਰ ਸੀ, ਹਾਲਾਂਕਿ ਹੁਣ ਐਡੇਨਾ ਉਸ ਦੇ ਸੰਪਰਕ 'ਚ ਨਹੀਂ ਹੈ। ਪਾਓਲਾ ਨੇ ਕਿਹਾ ਕਿ ਉਸ ਦੌਰਾਨ ਰੋਨਾਲਡੋ ਤੇ ਉਸ ਦੇ ਦੋਸਤ ਆਉਂਦੇ ਸਨ। ਜਦੋਂ ਸਾਡੇ ਕੋਲ ਬਰਗਰ ਬਚ ਜਾਂਦੇ ਸਨ ਤਾਂ ਮੈਨੇਜਰ ਦੀ ਮਨਜ਼ੂਰੀ ਨਾਲ ਅਸੀਂ ਉਹ ਬਰਗਰ ਉਨ੍ਹਾਂ ਲੋਕਾਂ ਨੂੰ ਦੇ ਦਿੰਦੇ ਸੀ। ਰੋਨਾਲਡੋ ਉਨ੍ਹਾਂ ਸਾਰੇ ਲੋਕਾਂ ਵਿਚੋਂ ਸਭ ਤੋਂ ਸ਼ਰਮੀਲਾ ਸੀ। ਅਜਿਹਾ ਲਗਭਗ ਹਰ ਰਾਤ ਹੁੰਦਾ ਸੀ।