ਭਾਰਤ ਦੇ ਮਸ਼ਹੂਰ ਖਿਡਾਰੀ ਦਾ ਹੋਇਆ ਦੇਹਾਂਤ, ਖੇਡ ਜਗਤ ''ਚ ਫੈਲੀ ਸੋਗ ਦੀ ਲਹਿਰ

ਸਪੋਰਟਸ ਡੈਸਕ- ਭਾਰਤ ਅਤੇ ਈਸਟ ਬੰਗਾਲ ਦੇ ਸਾਬਕਾ ਦਿੱਗਜ ਡਿਫੈਂਡਰ ਇਲੀਆਸ ਪਾਸ਼ਾ ਦਾ ਲੰਬੀ ਬਿਮਾਰੀ ਤੋਂ ਬਾਅਦ ਵੀਰਵਾਰ ਨੂੰ ਦੇਹਾਂਤ ਹੋ ਗਿਆ। ਉਨ੍ਹਾਂ ਦੇ ਪਰਿਵਾਰ ਵਿੱਚ ਪਤਨੀ, ਦੋ ਬੇਟੀਆਂ ਅਤੇ ਦੋ ਬੇਟੇ ਹਨ। ਆਲ ਇੰਡੀਆ ਫੁੱਟਬਾਲ ਫੈਡਰੇਸ਼ਨ (AIFF) ਨੇ ਪਾਸ਼ਾ ਦੇ ਦੇਹਾਂਤ 'ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਖੇਡ ਪ੍ਰਤੀ ਉਨ੍ਹਾਂ ਦੇ ਅਨਮੋਲ ਯੋਗਦਾਨ ਨੂੰ ਯਾਦ ਕੀਤਾ ਹੈ। ਕਰਨਾਟਕ ਦੇ ਸਰਵੋਤਮ ਫੁੱਟਬਾਲ ਖਿਡਾਰੀਆਂ ਵਿੱਚੋਂ ਇੱਕ ਮੰਨੇ ਜਾਣ ਵਾਲੇ ਪਾਸ਼ਾ ਆਪਣੇ ਅਨੁਸ਼ਾਸਿਤ ਖੇਡ, ਗੇਂਦ 'ਤੇ ਸ਼ਾਨਦਾਰ ਨਿਯੰਤਰਣ ਅਤੇ ਸ਼ਾਂਤ ਸੁਭਾਅ ਲਈ ਜਾਣੇ ਜਾਂਦੇ ਸਨ।

ਪਾਸ਼ਾ ਨੇ ਆਪਣੇ ਅੰਤਰਰਾਸ਼ਟਰੀ ਕਰੀਅਰ ਦੀ ਸ਼ੁਰੂਆਤ 27 ਜਨਵਰੀ 1987 ਨੂੰ ਨਹਿਰੂ ਕੱਪ ਦੌਰਾਨ ਬੁਲਗਾਰੀਆ ਵਿਰੁੱਧ ਕੀਤੀ ਸੀ। ਉਨ੍ਹਾਂ ਨੇ ਕੁੱਲ 8 ਅੰਤਰਰਾਸ਼ਟਰੀ ਮੈਚਾਂ ਵਿੱਚ ਭਾਰਤ ਦੀ ਨੁਮਾਇੰਦਗੀ ਕੀਤੀ, ਜਿਸ ਵਿੱਚ ਨਹਿਰੂ ਕੱਪ, ਸੈਫ ਖੇਡਾਂ (1991) ਅਤੇ ਏਸ਼ੀਆਈ ਕੱਪ ਕੁਆਲੀਫਾਇਰ (1992) ਸ਼ਾਮਲ ਸਨ। ਘਰੇਲੂ ਫੁੱਟਬਾਲ ਵਿੱਚ ਉਨ੍ਹਾਂ ਦਾ ਦਬਦਬਾ ਬਰਕਰਾਰ ਰਿਹਾ; ਉਨ੍ਹਾਂ ਨੇ ਕਰਨਾਟਕ ਲਈ ਕਈ ਸਾਲ ਸੰਤੋਸ਼ ਟਰਾਫੀ ਖੇਡੀ ਅਤੇ ਬਾਅਦ ਵਿੱਚ 1993 ਅਤੇ 1995 ਵਿੱਚ ਬੰਗਾਲ ਦੀ ਟੀਮ ਵੱਲੋਂ ਖੇਡਦਿਆਂ ਦੋ ਵਾਰ ਇਹ ਖਿਤਾਬ ਜਿੱਤਿਆ।

ਈਸਟ ਬੰਗਾਲ ਕਲੱਬ ਨਾਲ ਉਨ੍ਹਾਂ ਦਾ ਸਫ਼ਰ ਸਭ ਤੋਂ ਸੁਨਹਿਰੀ ਰਿਹਾ, ਜਿੱਥੇ ਉਨ੍ਹਾਂ ਨੇ 1993-94 ਦੇ ਸੀਜ਼ਨ ਵਿੱਚ ਟੀਮ ਦੀ ਕਪਤਾਨੀ ਕੀਤੀ। ਉਨ੍ਹਾਂ ਦੀ ਅਗਵਾਈ ਵਿੱਚ ਕਲੱਬ ਨੇ ਕਾਠਮਾਂਡੂ ਵਿਖੇ 'ਵਾਈ ਵਾਈ ਕੱਪ' (1993) ਜਿੱਤ ਕੇ ਆਪਣੀ ਪਹਿਲੀ ਅੰਤਰਰਾਸ਼ਟਰੀ ਟਰਾਫੀ ਹਾਸਲ ਕੀਤੀ ਸੀ। ਪਾਸ਼ਾ ਨੇ ਆਪਣੇ ਕਰੀਅਰ ਦੌਰਾਨ ਕਈ ਵਾਰ ਕਲਕੱਤਾ ਫੁੱਟਬਾਲ ਲੀਗ, ਆਈ.ਐੱਫ.ਏ. ਸ਼ੀਲਡ ਅਤੇ ਡੂਰੰਡ ਕੱਪ ਵਰਗੇ ਵੱਕਾਰੀ ਖਿਤਾਬ ਜਿੱਤੇ। ਸਾਲ 2012 ਵਿੱਚ, ਈਸਟ ਬੰਗਾਲ ਨੇ ਉਨ੍ਹਾਂ ਨੂੰ 'ਲਾਈਫਟਾਈਮ ਅਚੀਵਮੈਂਟ ਅਵਾਰਡ' ਨਾਲ ਸਨਮਾਨਿਤ ਕੀਤਾ ਸੀ।