ਦਿੱਲੀ ਓਪਨ: ਕਰਨ ਸਿੰਘ ਤੇ ਮਾਨਸ ਧਾਮਨੇ ਨੂੰ ਮਿਲਿਆ ਸਿੰਗਲਜ਼ ਵਾਈਲਡ ਕਾਰਡ

ਨਵੀਂ ਦਿੱਲੀ : ਦਿੱਲੀ ਲਾਅਨ ਟੈਨਿਸ ਐਸੋਸੀਏਸ਼ਨ (DLTA) ਨੇ ਸੋਮਵਾਰ ਤੋਂ ਸ਼ੁਰੂ ਹੋ ਰਹੇ ਏਟੀਪੀ ਦਿੱਲੀ ਓਪਨ (ATP Delhi Open) ਦੇ ਮੁੱਖ ਡਰਾਅ ਸਿੰਗਲਜ਼ ਮੁਕਾਬਲਿਆਂ ਲਈ ਵਾਈਲਡ ਕਾਰਡਾਂ ਦਾ ਐਲਾਨ ਕਰ ਦਿੱਤਾ ਹੈ। ਡੇਵਿਸ ਕੱਪ ਖਿਡਾਰੀ ਕਰਨ ਸਿੰਘ ਅਤੇ ਦੇਸ਼ ਦੀ ਉਭਰਦੀ ਨੌਜਵਾਨ ਪ੍ਰਤਿਭਾ ਮਾਨਸ ਧਾਮਨੇ ਨੂੰ ਮੁੱਖ ਡਰਾਅ ਲਈ ਵਾਈਲਡ ਕਾਰਡ ਪ੍ਰਦਾਨ ਕੀਤੇ ਗਏ ਹਨ।

DLTA ਨੇ ਹਾਲ ਹੀ ਵਿੱਚ ਨੀਦਰਲੈਂਡ ਵਿਰੁੱਧ ਖੇਡੇ ਗਏ ਡੇਵਿਸ ਕੱਪ ਮੁਕਾਬਲੇ ਵਿੱਚ ਭਾਰਤੀ ਟੀਮ ਦੇ ਰਿਜ਼ਰਵ ਮੈਂਬਰ ਰਹੇ ਦਿਗਵਿਜੇ ਪ੍ਰਤਾਪ ਸਿੰਘ ਨੂੰ ਵੀ ਮੁੱਖ ਡਰਾਅ ਵਾਈਲਡ ਕਾਰਡ ਦੇਣ ਦੀ ਪੁਸ਼ਟੀ ਕੀਤੀ ਹੈ। ਕਰਨ ਸਿੰਘ ਨੂੰ ਇਹ ਮੌਕਾ ਬੈਂਗਲੁਰੂ ਵਿੱਚ ਡੇਵਿਸ ਕੱਪ ਟਾਈ ਵਿੱਚ ਭਾਰਤ ਦੀ ਜਿੱਤ ਵਿੱਚ ਨਿਭਾਈ ਅਹਿਮ ਭੂਮਿਕਾ ਤੋਂ ਬਾਅਦ ਮਿਲਿਆ ਹੈ, ਜਦਕਿ 18 ਸਾਲਾ ਮਾਨਸ ਧਾਮਨੇ ਨੂੰ ਭਾਰਤੀ ਟੈਨਿਸ ਦੀ ਸਭ ਤੋਂ ਚਮਕਦਾਰ ਨੌਜਵਾਨ ਪ੍ਰਤਿਭਾ ਵਜੋਂ ਦੇਖਿਆ ਜਾ ਰਿਹਾ ਹੈ।

ਡੀਐਲਟੀਏ ਦੇ ਪ੍ਰਧਾਨ ਰੋਹਿਤ ਰਾਜਪਾਲ ਨੇ ਕਿਹਾ ਕਿ ਕਰਨ ਸਿੰਘ ਅਤੇ ਦਿਗਵਿਜੇ ਪ੍ਰਤਾਪ ਸਿੰਘ ਨੇ ਡੇਵਿਸ ਕੱਪ ਅਭਿਆਨ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ ਅਤੇ ਇਹ ਵਾਈਲਡ ਕਾਰਡ ਉਨ੍ਹਾਂ ਦੇ ਯੋਗਦਾਨ ਦੀ ਮਾਨਤਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਮਾਨਸ ਧਾਮਨੇ ਵਰਗੇ ਹੋਣਹਾਰ ਖਿਡਾਰੀਆਂ ਨੂੰ ਦਿੱਲੀ ਓਪਨ ਵਰਗੇ ਟੂਰਨਾਮੈਂਟਾਂ ਵਿੱਚ ਮੌਕਾ ਦੇਣਾ ਜ਼ਰੂਰੀ ਹੈ ਤਾਂ ਜੋ ਉਹ ਉੱਚ ਪੱਧਰ 'ਤੇ ਅਨੁਭਵ ਹਾਸਲ ਕਰ ਸਕਣ।

ਕੁਆਲੀਫਾਇੰਗ ਵਾਈਲਡ ਕਾਰਡ ਮੁੱਖ ਡਰਾਅ ਤੋਂ ਇਲਾਵਾ, ਕੁਆਲੀਫਾਇੰਗ ਸਿੰਗਲਜ਼ ਮੁਕਾਬਲਿਆਂ ਲਈ ਨਿਤਿਨ ਕੁਮਾਰ ਸਿਨਹਾ, ਇਸ਼ਾਕ ਇਕਬਾਲ, ਉਦਿਤ ਕੰਬੋਜ ਅਤੇ ਡੈਨਿਸ ਯੇਵਸੇਯੇਵ ਨੂੰ ਵਾਈਲਡ ਕਾਰਡ ਦਿੱਤੇ ਗਏ ਹਨ। ਇਹ ਖਿਡਾਰੀ ਮੁੱਖ ਟੂਰਨਾਮੈਂਟ ਵਿੱਚ ਆਪਣੀ ਜਗ੍ਹਾ ਪੱਕੀ ਕਰਨ ਲਈ ਕੁਆਲੀਫਾਇੰਗ ਡਰਾਅ ਵਿੱਚ ਇੱਕ-ਦੂਜੇ ਨੂੰ ਟੱਕਰ ਦੇਣਗੇ।