ਕ੍ਰਿਕਟ ਬੋਰਡ ਦਾ ਸਖਤ ਐਕਸ਼ਨ! ਮੁੱਖ ਕੋਚ ਨੂੰ 'ਟੈਸਟ ਟੀਮ' ਤੋਂ ਕੱਢਿਆ ਬਾਹਰ, ਕ੍ਰਿਕਟ ਜਗਤ 'ਚ ਮਚੀ ਤਰਥੱਲੀ

ਲਾਹੌਰ: ਪਾਕਿਸਤਾਨ ਕ੍ਰਿਕਟ ਬੋਰਡ (PCB) ਨੇ ਰਾਸ਼ਟਰੀ ਟੈਸਟ ਟੀਮ ਦੇ ਮੁੱਖ ਕੋਚ ਅਜ਼ਹਰ ਮਹਿਮੂਦ ਨਾਲ ਆਪਣਾ ਰਿਸ਼ਤਾ ਖ਼ਤਮ ਕਰਨ ਦਾ ਫੈਸਲਾ ਕੀਤਾ ਹੈ। ਬੋਰਡ ਨੇ ਸਾਬਕਾ ਟੈਸਟ ਆਲਰਾਊਂਡਰ ਅਜ਼ਹਰ ਦੇ ਕਰਾਰ ਨੂੰ ਉਸ ਦੀ ਮਿਆਦ ਖ਼ਤਮ ਹੋਣ ਤੋਂ ਤਿੰਨ ਮਹੀਨੇ ਪਹਿਲਾਂ ਹੀ ਖ਼ਤਮ ਕਰ ਦਿੱਤਾ ਹੈ। ਅਜ਼ਹਰ ਮਹਿਮੂਦ ਨੂੰ ਪਿਛਲੇ ਸਾਲ ਦੋ ਸਾਲਾਂ ਦੇ ਇਕਰਾਰਨਾਮੇ 'ਤੇ ਨਿਯੁਕਤ ਕੀਤਾ ਗਿਆ ਸੀ, ਜੋ ਕਿ ਮਾਰਚ 2026 ਤੱਕ ਚੱਲਣਾ ਸੀ, ਪਰ ਬੋਰਡ ਨੇ ਹੁਣ ਉਨ੍ਹਾਂ ਨੂੰ ਸਮੇਂ ਤੋਂ ਪਹਿਲਾਂ ਹੀ ਅਹੁਦੇ ਤੋਂ ਹਟਾ ਦਿੱਤਾ ਹੈ।

ਪੀਸੀਬੀ (PCB) ਦੇ ਇੱਕ ਭਰੋਸੇਯੋਗ ਸੂਤਰ ਅਨੁਸਾਰ, ਕਿਉਂਕਿ ਪਾਕਿਸਤਾਨ ਦੀ ਟੀਮ ਨੇ ਆਪਣਾ ਅਗਲਾ ਟੈਸਟ ਮੈਚ ਮਾਰਚ 2026 ਵਿੱਚ ਖੇਡਣਾ ਹੈ, ਇਸ ਲਈ ਬੋਰਡ ਨਵੇਂ ਮੁੱਖ ਕੋਚ ਲਈ ਆਪਣੀ ਰਣਨੀਤੀ ਅਜੇ ਤੋਂ ਹੀ ਤਿਆਰ ਕਰਨਾ ਚਾਹੁੰਦਾ ਹੈ। ਬੋਰਡ ਨੇ ਹੁਣ ਨਵੇਂ ਕੋਚ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ ਅਤੇ ਸੰਕੇਤ ਦਿੱਤੇ ਹਨ ਕਿ ਸਹਾਇਕ ਸਟਾਫ ਵਿੱਚ ਵੀ ਫੇਰਬਦਲ ਕੀਤਾ ਜਾ ਸਕਦਾ ਹੈ। ਪਾਕਿਸਤਾਨ ਦੇ ਆਗਾਮੀ ਟੈਸਟ ਸ਼ਡਿਊਲ ਵਿੱਚ ਮਾਰਚ 2026 ਵਿੱਚ ਬੰਗਲਾਦੇਸ਼ ਦਾ ਦੌਰਾ, ਜੁਲਾਈ ਵਿੱਚ ਵੈਸਟਇੰਡੀਜ਼ ਅਤੇ ਅਗਸਤ-ਸਤੰਬਰ ਵਿੱਚ ਇੰਗਲੈਂਡ ਦਾ ਦੌਰਾ ਸ਼ਾਮਲ ਹੈ। ਇਸ ਤੋਂ ਬਾਅਦ, ਪਾਕਿਸਤਾਨੀ ਟੀਮ ਨਵੰਬਰ-ਦਸੰਬਰ 2026 ਵਿੱਚ ਸ੍ਰੀਲੰਕਾ ਅਤੇ ਮਾਰਚ 2027 ਵਿੱਚ ਨਿਊਜ਼ੀਲੈਂਡ ਦੀ ਮੇਜ਼ਬਾਨੀ ਕਰੇਗੀ। ਬੋਰਡ ਦਾ ਮੰਨਣਾ ਹੈ ਕਿ ਲੰਬੇ ਸਮੇਂ ਦੇ ਅੰਤਰਾਲ ਨੂੰ ਦੇਖਦੇ ਹੋਏ, ਨਵੀਂ ਰਣਨੀਤੀ ਬਣਾਉਣ ਲਈ ਇਹ ਬਿਲਕੁਲ ਸਹੀ ਸਮਾਂ ਹੈ।