ਕਾਰਲਸਨ ਨੇ ਹਾਰ ਕੇ ਵੀ ਜਿੱਤਿਆ ਨਾਰਵੇ ਸ਼ਤਰੰਜ ਦਾ ਖਿਤਾਬ

ਸਟਾਵੇਂਗਰ (ਨਿਕਲੇਸ਼ ਜੈਨ)– ਵਿਸ਼ਵ ਚੈਂਪੀਅਨ ਮੇਜ਼ਬਾਨ ਨਾਰਵੇ ਦੇ ਮੈਗਨਸ ਕਾਰਲਸਨ ਨੂੰ ਨਾਰਵੇ ਸ਼ਤਰੰਜ ਟੂਰਨਾਮੈਂਟ ਦੇ ਆਖਰੀ ਰਾਊਂਡ ਵਿਚ ਅਰਮੀਨੀਆ ਦੇ ਲੇਵੋਨ ਅਰੋਨੀਅਨ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਪਰ ਇਸਦੇ ਬਾਵਜੂਦ ਉਸ ਨੇ ਰਿਕਾਰਡ ਤੀਜੀ ਵਾਰ ਖਿਤਾਬ ਆਪਣੇ ਨਾਂ ਕਰ ਲਿਆ।
ਮੈਗਨਸ ਕਾਰਲਸਨ ਜਿਹੜਾ 125 ਮੁਕਾਬਲਿਆਂ ਤੱਕ ਅਜੇਤੂ ਸੀ, ਪਿਛਲੇ 5 ਮੁਕਾਬਲਿਆਂ ਵਿਚੋਂ 2 ਹਾਰਿਆ ਹੈ। ਆਖਰੀ ਰਾਊਂਡ ਵਿਚ ਸਫੇਦ ਮੋਹਰਿਆਂ ਨਾਲ ਖੇਡ ਰਹੇ ਮੈਗਨਸ ਨੇ ਕਿਊ. ਜੀ. ਡੀ. ਓਪਨਿੰਗ ਵਿਚ ਕਾਫੀ ਹਮਲਾਵਰ ਰੁਖ ਅਪਣਾਇਆ ਸੀ ਪਰ ਅਰੋਨੀਅਨ ਨੇ ਸ਼ਾਨਦਾਰ ਬਚਾਅ ਕੀਤਾ। ਖੇਡ ਕਾਫੀ ਉਤਾਰ-ਚੜਾਅ ਦੇ ਨਾਲ ਜਦੋਂ ਡਰਾਅ ਹੋਣ ਜਾ ਰਹੀ ਸੀ ਤਦ ਕਾਰਲਸਨ ਨੇ 50ਵੀਂ ਚਾਲ ਵਿਚ ਆਪਣੇ ਹਾਥੀ ਦੀ ਇਕ ਗਲਤ ਚਾਲ ਖੇਡੀ ਤੇ 58ਵੀਂ ਚਲ ਵਿਚ ਉਸ ਨੂੰ ਹਾਰ ਮੰਨਣੀ ਪਈ।
ਆਖਰੀ ਰਾਊਂਡ ਦੇ ਹੋਰਨਾਂ ਮੈਚਾਂ ਵਿਚ ਫਿਡੇ ਦੇ ਅਲੀਰੇਜਾ ਫਿਰੌਜਾ ਨੇ ਪੋਲੈਂਡ ਦੇ ਜਾਨ ਡੂਡਾ ਨੂੰ ਹਰਾਇਆ ਅਤੇ ਅਮਰੀਕਾ ਦੇ ਫਬਿਆਨੋ ਕਰੂਆਨਾ ਤੇ ਨਾਰਵੇ ਦੇ ਅਲੀਰੇਜਾ ਵਿਚਾਲੇ ਮੁਕਾਬਲਾ ਡਰਾਅ ਰਿਹਾ ਤੇ ਕਰੂਆਨਾ ਨੇ ਟਾਈਬ੍ਰੇਕ ਵਿਚ ਜਿੱਤ ਦਰਜ ਕੀਤੀ।
ਆਖਰੀ 10 ਰਾਊਂਡਾਂ ਤੋਂ ਬਾਅਦ ਮੈਗਨਸ ਕਾਰਲਸਨ 19.5 ਅੰਕਾਂ ਬਣਾ ਕੇ ਪਹਿਲੇ, ਅਲਰੀਜੇ 18.5 ਅੰਕਾਂ ਨਾਲ ਦੂਜੇ ਤੇ ਅਰੋਨੀਅਨ 17.5 ਅੰਕ ਬਣਾ ਕੇ ਤੀਜੇ ਸਥਾਨ 'ਤੇ ਰਿਹਾ ਤੇ ਉਨ੍ਹਾਂ ਨੂੰ ਕ੍ਰਮਵਾਰ 74000, 39000 ਤੇ 24000 ਅਮਰੀਕਨ ਡਾਲਰ ਇਨਾਮੀ ਰਾਸ਼ੀ ਦੇ ਤੌਰ 'ਤੇ ਮਿਲੇ। ਫਬਿਆਨੋ ਕਰੂਆਨਾ 15.5 ਅੰਕਾਂ ਨਾਲ ਚੌਥੇ, ਜਾਨ ਡੂਡਾ 9.5 ਅੰਕਾਂ ਨਾਲ ਪੰਜਵੇਂ ਤੇ ਆਰੀਅਨ ਤਾਰੀ 3.5 ਅੰਕਾਂ ਨਾਲ ਆਖਰੀ ਸਥਾਨ 'ਤੇ ਰਿਹਾ ਤੇ ਉਨ੍ਹਾਂ ਨੂੰ ਕ੍ਰਮਵਾਰ 19000, 18000 ਤੇ 17000 ਅਮਰੀਕਨ ਡਾਲਰ ਮਿਲੇ।