ਬੀ.ਸੀ.ਸੀ.ਆਈ. ਦੀ ਬੇਨਤੀ ’ਤੇ ਟੀ. ਐੱਨ. ਸੀ. ਏ. ਨੇ ਨਟਰਾਜਨ ਨੂੰ ਕੀਤਾ ਰਿਲੀਜ਼

ਚੇਨਈ– ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ. ਸੀ. ਸੀ. ਆਈ.) ਤੇ ਭਾਰਤੀ ਟੀਮ ਮੈਨੇਜਮੈਂਟ ਦੀ ਬੇਨਤੀ ਤੋਂ ਬਾਅਦ ਤਾਮਿਲਨਾਡੂ ਕ੍ਰਿਕਟ ਐਸੋਸੀਏਸ਼ਨ (ਟੀ. ਐੱਨ. ਸੀ. ਏ.) ਨੇ ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਟੀ. ਨਟਰਾਜਨ ਨੂੰ ਘਰੇਲੂ ਵਨ ਡੇ ਵਿਜੇ ਹਜ਼ਾਰੇ ਟਰਾਫੀ ਟੂਰਨਾਮੈਂਟ ਤੋਂ ਰਿਲੀਜ਼ ਕਰ ਦਿੱਤਾ ਹੈ ਤਾਂ ਕਿ ਉਹ ਇੰਗਲੈਂਡ ਵਿਰੁੱਧ ਸੀਮਤ ਓਵਰਾਂ ਦੀ ਸੀਰੀਜ਼ ਲਈ ਤਰੋਤਾਜ਼ਾ ਹੋ ਸਕੇ।

ਬੀ. ਸੀ. ਸੀ. ਆਈ. ਤੇ ਭਾਰਤੀ ਟੀਮ ਮੈਨੇਜਮੈਂਟ ਵਲੋਂ ਇਹ ਅਪੀਲ ਇੰਗਲੈਂਡ ਵਿਰੁੱਧ ਅਹਿਮਦਾਬਾਦ ਵਿਚ ਆਗਾਮੀ 12 ਮਾਰਚ ਤੋਂ ਖੇਡੀ ਜਾਣ ਵਾਲੀ 5 ਟੀ-20 ਤੇ 3 ਵਨ ਡੇ ਦੀ ਸੀਰੀਜ਼ ਦੇ ਮੱਦੇਨਜ਼ਰ ਕੀਤਾ ਗਿਆ। ਟੀ. ਐੱਨ. ਸੀ. ਏ. ਦੇ ਸਕੱਤਰ ਐੱਚ. ਰਾਮਾਸਾਮੀ ਨੇ ਇਸ ਸਬੰਧ ਵਿਚ ਬੇਨਤੀ ਪੱਤਰ ਪ੍ਰਾਪਤ ਹੋਣ ਦੀ ਪੁਸ਼ਟੀ ਕੀਤੀ ਹੈ।