ਅਤਨੂ ਦਾਸ ਨੇ ਰਾਸ਼ਟਰੀ ਖੇਡਾਂ ਵਿੱਚ ਜਿੱਤਿਆ ‘ਗੋਲਡ’ ਮੈਡਲ

ਅਹਿਮਦਾਬਾਦ : ਓਲੰਪੀਅਨ ਤੀਰਅੰਦਾਜ਼ ਅਤਨੂ ਦਾਸ ਨੇ ਵੀਰਵਾਰ ਨੂੰ ਇੱਥੇ ਰਾਸ਼ਟਰੀ ਖੇਡਾਂ ਵਿੱਚ ਪੁਰਸ਼ਾਂ ਦਾ ਵਿਅਕਤੀਗਤ ਰਿਕਰਵ ਮੁਕਾਬਲੇ 'ਚ ਸੋਨ ਤਮਗਾ ਜਿੱਤ ਕੇ ਟੋਕੀਓ ਓਲੰਪਿਕ ਦੀ ਨਿਰਾਸ਼ਾ ਨੂੰ ਦੂਰ ਕੀਤਾ। ਟੋਕੀਓ ਵਿੱਚ ਮਿਲੀ ਨਿਰਾਸ਼ਾ ਤੋਂ ਬਾਅਦ ਅਤਨੂ ਛੁੱਟੀਆਂ 'ਤੇ ਚਲਾ ਗਿਆ ਅਤੇ ਆਪਣੀ ਪਤਨੀ ਦੀਪਿਕਾ ਕੁਮਾਰੀ ਨਾਲ ਪਰਿਵਾਰ ਨੂੰ ਵਧਾਉਣ ਬਾਰੇ ਗੱਲ ਕੀਤੀ ਤਾਂ ਜੋ ਉਹ ਤੀਰਅੰਦਾਜ਼ੀ ਤੋਂ ਇਲਾਵਾ ਜ਼ਿੰਦਗੀ ਵਿੱਚ ਹੋਰ ਚੀਜ਼ਾਂ ਕਰ ਸਕਣ। ਪੱਛਮੀ ਬੰਗਾਲ ਦੇ ਇਸ ਤੀਰਅੰਦਾਜ਼ ਨੇ ਆਪਣੀ ਟ੍ਰੇਨਿੰਗ ਵਿੱਚ ਬਦਲਾਅ ਕੀਤਾ ਜਿਸਦਾ ਉਸਨੂੰ ਇੱਥੇ ਫਾਇਦਾ ਹੋਇਆ। ਉਸ ਨੇ ਫਾਈਨਲ ਵਿੱਚ ਫੌਜ ਦੇ ਗੁਰਚਰਨ ਬੇਸਰਾ ਨੂੰ 6-4 ਨਾਲ ਹਰਾ ਕੇ ਪਹਿਲਾ ਸਥਾਨ ਹਾਸਲ ਕੀਤਾ।

ਹਰਿਆਣਾ ਨੇ ਬਾਕੀ ਦੇ ਸੋਨ ਤਗਮੇ ਜਿੱਤੇ ਅਤੇ ਰਿਕਰਵ ਮੁਕਾਬਲਿਆਂ ਵਿੱਚ ਦਬਦਬਾ ਬਣਾਇਆ, ਜਿਸ ਵਿੱਚ ਪੁਰਸ਼ ਅਤੇ ਮਹਿਲਾ ਟੀਮ, ਮਹਿਲਾ ਵਿਅਕਤੀਗਤ ਅਤੇ ਮਿਕਸਡ ਡਬਲਜ਼ ਮੁਕਾਬਲਿਆਂ ਵਿੱਚ ਪਹਿਲਾ ਸਥਾਨ ਸ਼ਾਮਲ ਸੀ। ਹਰਿਆਣਾ ਦੀ ਮਹਿਲਾ ਟੀਮ ਨੇ ਸ਼ੂਟਆਊਟ ਵਿੱਚ ਝਾਰਖੰਡ ਨੂੰ ਹਰਾਇਆ ਜਦਕਿ ਪੁਰਸ਼ ਟੀਮ ਨੂੰ ਫਾਈਨਲ ਵਿੱਚ ਆਰਮੀ ਤੋਂ ਵਾਕਓਵਰ ਮਿਲਿਆ। ਸੰਗੀਤਾ ਨੇ ਵਿਅਕਤੀਗਤ ਫਾਈਨਲ ਵਿੱਚ ਝਾਰਖੰਡ ਦੀ ਅਨੀਸ਼ਕਾ ਕੁਮਾਰੀ ਸਿੰਘ ਨੂੰ ਹਰਾ ਕੇ ਰਿਕਰਵ ਈਵੈਂਟ ਵਿੱਚ ਸੋਨ ਤਗ਼ਮੇ ਨਾਲ ਆਪਣਾ ਖਾਤਾ ਖੋਲ੍ਹਿਆ। ਆਕਾਸ਼ ਅਤੇ ਭਜਨ ਕੌਰ ਦੀ ਮਿਕਸਡ ਡਬਲਜ਼ ਜੋੜੀ ਨੇ ਫਿਰ ਮਹਾਰਾਸ਼ਟਰ ਦੇ ਗੌਰਵ ਲਾਂਬੇ ਅਤੇ ਚਾਰੁਤਾ ਕਮਲਾਪੁਰ ਨੂੰ ਸ਼ੂਟਆਊਟ ਵਿੱਚ ਹਰਾ ਕੇ ਸੋਨ ਤਮਗਾ ਜਿੱਤਿਆ।