ਐਡਿਸੂ ਗੋਬੇਨਾ ਨੇ ਨਵੇਂ ਰਿਕਾਰਡ ਨਾਲ ਜਿੱਤਿਆ ਸਿਡਨੀ ਮੈਰਾਥਨ ਦਾ ਖ਼ਿਤਾਬ

ਸਿਡਨੀ : ਇਥੋਪੀਆ ਦੇ ਐਡਿਸੂ ਗੋਬੇਨਾ ਨੇ ਐਤਵਾਰ ਨੂੰ ਸਿਡਨੀ ਮੈਰਾਥਨ 2026 ਵਿੱਚ ਪੁਰਸ਼ਾਂ ਦਾ ਐਲੀਟ ਖ਼ਿਤਾਬ ਜਿੱਤ ਕੇ ਇੱਕ ਸ਼ਾਨਦਾਰ ਇਤਿਹਾਸ ਰਚ ਦਿੱਤਾ ਹੈ। 21 ਸਾਲਾ ਗੋਬੇਨਾ ਨੇ ਪਿਛਲੇ ਸਾਲ ਜਿੱਤੇ ਆਪਣੇ ਚਾਂਦੀ ਦੇ ਤਗਮੇ ਨੂੰ ਰਿਕਾਰਡ ਦੇ ਨਾਲ ਸੋਨੇ ਦੇ ਤਗਮੇ  ਵਿੱਚ ਬਦਲ ਦਿੱਤਾ। ਉਨ੍ਹਾਂ ਨੇ ਇਹ ਰੇਸ 2 ਘੰਟੇ, 4 ਮਿੰਟ ਅਤੇ 42 ਸੈਕਿੰਡ (2:04:42) ਵਿੱਚ ਬੇਹੱਦ ਸ਼ਾਨਦਾਰ ਅੰਦਾਜ਼ ਵਿੱਚ ਪੂਰੀ ਕੀਤੀ ਅਤੇ ਪਿਛਲੇ ਕੋਰਸ ਰਿਕਾਰਡ ਨੂੰ ਲਗਭਗ ਡੇਢ ਮਿੰਟ ਦੇ ਫਰਕ ਨਾਲ ਤੋੜਿਆ। ਉਨ੍ਹਾਂ ਦੇ ਹਮਵਤਨ ਚਿਮਡੇਸਾ ਡੇਬੇਲੇ ਉਨ੍ਹਾਂ ਤੋਂ ਸਿਰਫ਼ ਤਿੰਨ ਸੈਕਿੰਡ ਪਿੱਛੇ ਰਹੇ ਅਤੇ ਦੂਜਾ ਸਥਾਨ ਹਾਸਲ ਕੀਤਾ, ਜਦਕਿ ਲੈਸੋਥੋ ਦੇ ਟੇਬੇਲੋ ਰਾਮਾਕੋਂਗੋਆਨਾ (2:04:57) ਨੇ ਤੀਜਾ ਸਥਾਨ ਹਾਸਲ ਕੀਤਾ।  ਇਸ ਰੇਸ ਦੀ ਖ਼ਾਸ ਗੱਲ ਇਹ ਰਹੀ ਕਿ ਪੋਡੀਅਮ 'ਤੇ ਆਉਣ ਵਾਲੇ ਤਿੰਨੋਂ ਧਾਵਕਾਂ ਨੇ ਪਿਛਲਾ ਕੋਰਸ ਰਿਕਾਰਡ ਤੋੜ ਦਿੱਤਾ।

ਮਹਿਲਾ ਵਰਗ ਵਿੱਚ, ਮੌਜੂਦਾ ਵਿਸ਼ਵ ਚੈਂਪੀਅਨ ਪੇਰੇਸ ਜੇਪਚਿਰਚਿਰ ਨੇ ਆਪਣੀ ਰੇਸ 2:18:31 ਦੇ ਸਮੇਂ ਵਿੱਚ ਜਿੱਤ ਕੇ ਪਹਿਲਾ ਸਥਾਨ ਹਾਸਲ ਕੀਤਾ। ਉਹ ਸਿਫਾਨ ਹਸਨ ਦੇ ਕੋਰਸ ਰਿਕਾਰਡ ਤੋਂ ਸਿਰਫ਼ ਨੌਂ ਸੈਕਿੰਡ ਪਿੱਛੇ ਰਹਿ ਗਈ। ਰੇਸ ਦੇ ਸ਼ੁਰੂਆਤੀ ਪਲਾਂ ਵਿੱਚ ਮੁਕਾਬਲਾ ਬਹੁਤ ਸਖ਼ਤ ਸੀ, ਜਿੱਥੇ ਪੁਰਸ਼ਾਂ ਦੇ ਐਲੀਟ ਗਰੁੱਪ ਦੇ ਕਈ ਧਾਵਕਾਂ ਨੇ ਪਹਿਲੇ 5 ਕਿਲੋਮੀਟਰ ਦੀ ਦੂਰੀ ਸਿਰਫ਼ 14 ਮਿੰਟ 30 ਸੈਕਿੰਡ ਦੇ ਤੇਜ਼ ਸਮੇਂ ਵਿੱਚ ਪੂਰੀ ਕਰ ਲਈ ਸੀ। ਇਨ੍ਹਾਂ ਲੀਡਰਾਂ ਵਿੱਚ ਮੌਜੂਦਾ ਚੈਂਪੀਅਨ ਹੇਲੇਮਰੀਅਮ ਕਿਰੋਸ ਅਤੇ ਮੌਜੂਦਾ ਵਿਸ਼ਵ ਚੈਂਪੀਅਨ ਅਲਫੋਂਸ ਸਿੰਬੂ ਵੀ ਸ਼ਾਮਲ ਸੀ.  ਅੱਧੀ ਦੂਰੀ ਤੱਕ ਪਹੁੰਚਦੇ-ਪਹੁੰਚਦੇ ਲੀਡਰਸ ਕਿਰੋਸ ਦੇ ਪਿਛਲੇ ਸਾਲ ਦੇ ਕੋਰਸ ਰਿਕਾਰਡ ਨਾਲੋਂ ਲਗਭਗ 30 ਸੈਕਿੰਡ ਤੋਂ ਵੀ ਘੱਟ ਸਮੇਂ 'ਤੇ ਦੌੜ ਰਹੇ ਸਨ।