ਰੋਸ਼ੀਬੀਨਾ ਦੇਵੀ ਨੇ ਜਿੱਤਿਆ ਚਾਂਦੀ ਦਾ ਤਗ਼ਮਾ, ਏਸ਼ੀਆਈ ਖੇਡਾਂ ''ਚ ਤਗ਼ਮਿਆਂ ਦੀ ਹੈਟ੍ਰਿਕ ਕੀਤੀ ਪੂਰੀ

ਆਈਚੀ-ਨਾਗੋਆ (ਜਾਪਾਨ) : ਏਸ਼ੀਆਈ ਖੇਡਾਂ 'ਚ ਵੀਰਵਾਰ ਨੂੰ ਭਾਰਤੀ ਦੀ ਵੁਸ਼ੂ ਖਿਡਾਰਨ ਰੋਸ਼ੀਬੀਨਾ ਦੇਵੀ ਨਾਓਰੇਮ ਨੂੰ ਚੀਨ ਦੀ ਝਾਂਗ ਸ਼ਿਆਓਯੂ ਤੋਂ 0-2 ਨਾਲ ਹਾਰਨ ਤੋਂ ਬਾਅਦ ਔਰਤਾਂ ਦੇ ਸਾਂਡਾ  60 ਕਿੱਲੋ ਵੁਸ਼ੂ ਮੁਕਾਬਲੇ 'ਚ ਚਾਂਦੀ ਦੇ ਤਗ਼ਮੇ ਨਾਲ ਹੀ ਸੰਤੋਖ ਕਰਨਾ ਪਿਆ। ਖ਼ਿਤਾਬੀ ਮੁਕਾਬਲੇ 'ਚ ਝਾਂਗ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਦੋਵੇਂ ਰਾਊਂਡ 5-0 ਨਾਲ ਜਿੱਤ ਕੇ ਸੋਨੇ ਦਾ ਤਗ਼ਮਾ ਆਪਣੇ ਨਾਮ ਕੀਤਾ, ਜਦਕਿ ਰੋਸ਼ੀਬੀਨਾ ਨੂੰ ਇਸ ਵੱਡੇ ਮਹਾਦੀਪੀ ਟੂਰਨਾਮੈਂਟ 'ਚ ਲਗਾਤਾਰ ਦੂਜੀ ਵਾਰ ਚਾਂਦੀ ਦੇ ਤਗ਼ਮੇ ਨਾਲ ਸਬਰ ਕਰਨਾ ਪਿਆ। ਇਸ ਤਗ਼ਮੇ ਦੇ ਨਾਲ ਹੀ 25 ਸਾਲਾ ਮਣੀਪੁਰੀ ਖਿਡਾਰਨ ਨੇ ਇੱਕ ਸ਼ਾਨਦਾਰ ਹੈਟ੍ਰਿਕ ਪੂਰੀ ਕੀਤੀ ਹੈ। ਉਨ੍ਹਾਂ ਨੇ ਜਕਾਰਤਾ 2018 ਏਸ਼ੀਆਈ ਖੇਡਾਂ 'ਚ ਕਾਂਸੀ ਅਤੇ ਹਾਂਗਜ਼ੂ 2023 'ਚ ਚਾਂਦੀ ਦਾ ਤਗ਼ਮਾ ਜਿੱਤਿਆ ਸੀ। ਇਹ ਸਾਰੇ ਤਗ਼ਮੇ 60 ਕਿੱਲੋ ਸਾਂਡਾ ਕੈਟਾਗਰੀ 'ਚ ਹੀ ਆਏ ਹਨ।

ਰੋਸ਼ੀਬੀਨਾ ਨੇ ਟੂਰਨਾਮੈਂਟ 'ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਫਾਈਨਲ 'ਚ ਜਗ੍ਹਾ ਬਣਾਈ ਸੀ। ਉਨ੍ਹਾਂ ਨੇ ਪ੍ਰੀ-ਕੁਆਰਟਰ ਫਾਈਨਲ 'ਚ ਬੰਗਲਾਦੇਸ਼ ਦੀ ਸ਼ਿਖਾ ਖਾਤੂਨ ਨੂੰ ਹਰਾਇਆ ਅਤੇ ਫਿਰ ਕੁਆਰਟਰ ਫਾਈਨਲ 'ਚ ਮਕਾਊ ਦੀ ਚੂ ਮੈਨ ਸਿਨ ਨੂੰ 5-0 ਨਾਲ ਮਾਤ ਦਿੱਤੀ। ਸੈਮੀਫਾਈਨਲ 'ਚ ਉਨ੍ਹਾਂ ਨੇ ਇੰਡੋਨੇਸ਼ੀਆ ਦੀ ਥਾਨੀਆ ਕੁਸੁਮਾਨਿੰਗਤਿਆਸ ਨੂੰ 2-0 ਨਾਲ ਹਰਾ ਕੇ ਸੋਨ ਤਗ਼ਮੇ ਦੇ ਮੁਕਾਬਲੇ 'ਚ ਆਪਣੀ ਜਗ੍ਹਾ ਪੱਕੀ ਕੀਤੀ ਅਤੇ ਏਸ਼ੀਆਈ ਖੇਡਾਂ 'ਚ ਲਗਾਤਾਰ ਤੀਜੀ ਵਾਰ ਪੋਡੀਅਮ ਫਿਨਿਸ਼ (ਤਗ਼ਮਾ ਸੂਚੀ 'ਚ ਜਗ੍ਹਾ) ਹਾਸਲ ਕੀਤੀ।

ਰੋਸ਼ੀਬੀਨਾ ਹਾਂਗਜ਼ੂ 'ਚ ਜਿੱਤੇ ਆਪਣੇ ਚਾਂਦੀ ਦੇ ਤਗ਼ਮੇ ਤੋਂ ਬਿਹਤਰ ਪ੍ਰਦਰਸ਼ਨ ਕਰਨਾ ਚਾਹੁੰਦੀ ਸੀ, ਜਿੱਥੇ ਉਹ ਫਾਈਨਲ 'ਚ ਇੱਕ ਚੀਨੀ ਖਿਡਾਰਨ ਤੋਂ ਹਾਰ ਗਈ ਸੀ। ਇਸ ਤਾਜ਼ਾ ਹਾਰ ਦਾ ਮਤਲਬ ਹੈ ਕਿ 60 ਕਿੱਲੋ ਕੈਟਾਗਰੀ 'ਚ ਰੋਸ਼ੀਬੀਨਾ ਅਤੇ ਏਸ਼ੀਅਨ ਗੇਮਜ਼ ਦੇ ਸੋਨ ਤਗ਼ਮੇ ਦੇ ਵਿਚਕਾਰ ਇੱਕ ਵਾਰ ਫਿਰ ਚੀਨੀ ਖਿਡਾਰਨ ਅੜਿੱਕਾ ਬਣ ਕੇ ਸਾਹਮਣੇ ਆਈ।

ਇਸ ਚਾਂਦੀ ਦੇ ਤਗ਼ਮੇ ਨਾਲ ਏਸ਼ੀਅਨ ਗੇਮਜ਼ 'ਚ ਭਾਰਤ ਦੇ ਵੁਸ਼ੂ ਤਗ਼ਮਿਆਂ ਦੀ ਗਿਣਤੀ 11 ਹੋ ਗਈ ਹੈ, ਜਿਸ 'ਚ ਇੱਕ ਸੋਨਾ, ਦੋ ਚਾਂਦੀ ਅਤੇ ਕਾਂਸੀ ਦੇ ਤਗ਼ਮੇ ਸ਼ਾਮਲ ਹਨ।