ਏਸ਼ੀਆਈ ਖੇਡਾਂ : ਦੇਵ ਮੀਣਾ ਨੇ ਪੋਲ ਵੌਲਟ 'ਚ 5.50 ਮੀਟਰ ਨਾਲ ਨਵਾਂ ਰਾਸ਼ਟਰੀ ਰਿਕਾਰਡ ਬਣਾਇਆ, 7ਵੇਂ ਸਥਾਨ 'ਤੇ ਰਹੇ

ਆਈਚੀ-ਨਾਗੋਯਾ : ਜਾਪਾਨ ਦੇ ਆਈਚੀ-ਨਾਗੋਯਾ ਵਿਖੇ ਚੱਲ ਰਹੀਆਂ ਏਸ਼ੀਆਈ ਖੇਡਾਂ ਵਿੱਚ ਭਾਰਤ ਦੇ ਦੇਵ ਮੀਣਾ ਨੇ ਪੁਰਸ਼ਾਂ ਦੇ ਪੋਲ ਵੌਲਟ ਮੁਕਾਬਲੇ ਵਿੱਚ 5.50 ਮੀਟਰ ਦੀ ਉਚਾਈ ਪਾਰ ਕਰਕੇ ਨਵਾਂ ਰਾਸ਼ਟਰੀ ਰਿਕਾਰਡ ਬਣਾਇਆ ਹੈ। ਆਪਣੀ ਦੂਜੀ ਕੋਸ਼ਿਸ਼ ਵਿੱਚ 5.50 ਮੀਟਰ ਦੀ ਉਚਾਈ ਸਫ਼ਲਤਾਪੂਰਵਕ ਪਾਰ ਕਰਦਿਆਂ ਦੇਵ ਮੀਣਾ ਨੇ ਪ੍ਰਤੀਯੋਗਤਾ ਵਿੱਚ 7ਵਾਂ ਸਥਾਨ ਹਾਸਲ ਕੀਤਾ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਇਸੇ ਸਾਲ ਦੇ ਸ਼ੁਰੂ ਵਿੱਚ ਨੇਸ਼ਨਲ ਇੰਟਰ-ਸਟੇਟ ਸੀਨੀਅਰ ਐਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ ਬਣਾਏ ਆਪਣੇ ਹੀ 5.46 ਮੀਟਰ ਦੇ ਰਾਸ਼ਟਰੀ ਰਿਕਾਰਡ ਵਿੱਚ ਸੁਧਾਰ ਕੀਤਾ ਹੈ। ਇਸੇ ਈਵੈਂਟ ਵਿੱਚ ਭਾਰਤ ਦੇ ਇੱਕ ਹੋਰ ਐਥਲੀਟ ਕੁਲਦੀਪ ਕੁਮਾਰ 5.35 ਮੀਟਰ ਦੀ ਉਚਾਈ ਪਾਰ ਕਰਕੇ 10ਵੇਂ ਸਥਾਨ 'ਤੇ ਰਹੇ, ਪਰ ਉਹ 5.50 ਮੀਟਰ ਦੀ ਉਚਾਈ ਦੀਆਂ ਆਪਣੀਆਂ ਤਿੰਨੋਂ ਕੋਸ਼ਿਸ਼ਾਂ ਵਿੱਚ ਅਸਫ਼ਲ ਰਹੇ।

ਦੂਜੇ ਪਾਸੇ, ਨਾਗੋਯਾ ਸਿਟੀ ਮਿਜ਼ੂਹੋ ਪਾਰਕ ਐਥਲੇਟਿਕ ਸਟੇਡੀਅਮ ਵਿਖੇ ਹੋਏ ਹੋਰ ਮੁਕਾਬਲਿਆਂ ਵਿੱਚ ਵੀ ਭਾਰਤੀ ਐਥਲੀਟ ਤਗਮੇ ਦੀ ਦੌੜ ਤੋਂ ਬਾਹਰ ਰਹੇ। ਪੁਰਸ਼ਾਂ ਦੇ 800 ਮੀਟਰ ਫਾਈਨਲ ਵਿੱਚ ਹਾਂਗਝੋਊ ਏਸ਼ੀਆਈ ਖੇਡਾਂ ਦੇ ਚਾਂਦੀ ਤਗਮਾ ਜੇਤੂ ਮੁਹੰਮਦ ਅਫ਼ਸਲ 1:48.27 ਦੇ ਸਮੇਂ ਨਾਲ 8ਵੇਂ ਸਥਾਨ 'ਤੇ ਰਹੇ। ਇਸ ਤੋਂ ਇਲਾਵਾ, ਮਹਿਲਾਵਾਂ ਦੇ 800 ਮੀਟਰ ਫਾਈਨਲ ਵਿੱਚ ਭਾਰਤ ਦੀ ਪੂਜਾ ਓੱਲਾ 2:06.72 ਦਾ ਸਮਾਂ ਕੱਢ ਕੇ 7ਵੇਂ ਸਥਾਨ 'ਤੇ ਰਹੀ।