ਡਿਲੀਵਰੀ ਤੋਂ ਪਹਿਲਾਂ ਗਰਭਵਤੀ ਔਰਤ ਦੀ ਮੌਤ, 9 ਮਹੀਨੇ ਦੀ ਬੱਚੀ ਵੀ ਨਾ ਬਚੀ

ਲਾਲੜੂ (ਗੁਰਜੀਤ) : ਪਿੰਡ ਭੁੱਖੜੀ ਦੀ 26 ਸਾਲਾ ਔਰਤ ਦੀ ਡਿਲੀਵਰੀ ਤੋਂ ਪਹਿਲਾਂ ਹੀ ਸਿਹਤ ਵਿਗੜਣ ਕਾਰਨ ਮੌਤ ਹੋ ਗਈ। ਉਸ ਦੇ ਗਰਭ ’ਚ ਪਲ ਰਹੀ 9 ਮਹੀਨੇ ਦੀ ਬੱਚੀ ਦੀ ਵੀ ਮੌਤ ਹੋ ਗਈ। ਹਾਲਾਂਕਿ ਔਰਤ ਦੀ ਪਹਿਲੀ ਡਿਲੀਵਰੀ ਹੋਣੀ ਸੀ ਪਰ ਮਾਮਲਾ ਸ਼ੱਕੀ ਲੱਗਣ ਕਾਰਨ ਤਿੰਨ ਡਾਕਟਰਾਂ ਦਾ ਬੋਰਡ ਬਣਾ ਕੇ ਜੱਚਾ-ਬੱਚਾ ਦਾ ਪੋਸਟਮਾਰਟਮ ਕੀਤਾ ਗਿਆ। ਜਾਣਕਾਰੀ ਮੁਤਾਬਕ ਪਿੰਡ ਭੁੱਖੜੀ ਦੀ ਸਿਮਰਨ ਪੁੱਤਰੀ ਰਜਿੰਦਰ ਸਿੰਘ ਦਾ ਕਰੀਬ 2 ਸਾਲ ਪਹਿਲਾਂ ਦੁਰਗਿਆਨਾ ਕਾਲੋਨੀ, ਬਬਿਆਲ, ਜ਼ਿਲ੍ਹਾ ਅੰਬਾਲਾ ਦੇ ਦਵਿੰਦਰ ਸਿੰਘ ਨਾਲ ਵਿਆਹ ਹੋਇਆ ਸੀ। ਡਿਲੀਵਰੀ ਲਈ ਉਹ ਆਪਣੇ ਪੇਕੇ ਭੁੱਕੜੀ ਆਈ ਹੋਈ ਸੀ।

9 ਮਹੀਨੇ ਪੂਰੇ ਹੋਣ ’ਤੇ ਉਸ ਦੀ ਡਿਲੀਵਰੀ ਤਾਰੀਖ਼ ਦੇ ਮੱਦੇਨਜ਼ਰ ਮੰਗਲਵਾਰ ਨੂੰ ਪਰਿਵਾਰ ਵਾਲੇ ਉਸ ਨੂੰ ਬਰਵਾਲਾ ਦੇ ਪ੍ਰਾਈਵੇਟ ਡਾਕਟਰ ਕੋਲ ਲੈ ਗਏ। ਉੱਥੇ ਦਵਾਈ ਤੋਂ ਬਾਅਦ ਬੀ. ਪੀ. ਨਾਰਮਲ ਹੋ ਗਿਆ ਪਰ ਕੁੱਝ ਸਮੇਂ ਬਾਅਦ ਸਿਹਤ ਫਿਰ ਵਿਗੜਣ ’ਤੇ ਸਿਮਰਨ ਨੂੰ ਪੰਚਕੂਲਾ ਦੇ ਸਰਕਾਰੀ ਹਸਪਤਾਲ ਲੈ ਜਾਇਆ ਗਿਆ। ਉੱਥੇ ਸਾਹ ਲੈਣ ’ਚ ਦਿੱਕਤ ਆਉਣ ਕਾਰਨ ਸਿਮਰਨ ਨੇ ਬੁੱਧਵਾਰ ਨੂੰ ਦਮ ਤੋੜ ਦਿੱਤਾ। ਪੰਚਕੂਲਾ ਹਸਪਤਾਲ ਦੇ ਡਾਕਟਰਾਂ ਨੇ ਵੀ ਸਿਮਰਨ ਦੇ ਪਤੀ ਸਮੇਤ ਸਸੁਰਾਲੀ ਪਰਿਵਾਰ ਨਾਲ ਮਾਮਲੇ ਦੀ ਪੂਰੀ ਜਾਂਚ ਕੀਤੀ। ਬਾਅਦ ’ਚ ਸਰੀਰ ਨੂੰ ਡੇਰਾਬੱਸੀ ਸਿਵਲ ਹਸਪਤਾਲ ਲਿਆਂਦਾ ਗਿਆ।

ਪੰਚਕੂਲਾ ਦੇ ਡਾਕਟਰਾਂ ਵੱਲੋਂ ਜਾਰੀ ਕੀਤੀ ਮੈਡੀਕਲ ਰਿਪੋਰਟ ਦੇ ਆਧਾਰ ’ਤੇ ਮਾਮਲੇ ਦੀ ਡੂੰਘਾੀ ਨਾਲ ਜਾਂਚ ਕਰਨ ਲਈ ਤਿੰਨ ਡਾਕਟਰਾਂ ਦਾ ਬੋਰਡ ਬਣਾਇਆ ਗਿਆ। ਗਰਭ ’ਚ 9 ਮਹੀਨੇ ਦੀ ਬੱਚੀ ਸੀ। ਪੋਸਟਮਾਰਟਮ ਤੋਂ ਬਾਅਦ ਲਾਸ਼ ਪਰਿਵਾਰ ਨੂੰ ਭੁੱਖੜੀ ’ਚ ਸੌਂਪ ਦਿੱਤੀ ਗਈ। ਹੰਡੇਸਰਾ ਪੁਲਸ ਦੇ ਐੱਸ. ਐੱਸ. ਆਈ. ਗੌਰਵ ਸ਼ਰਮਾ ਮੁਤਾਬਕ ਸਿਮਰਨ ਦੇ ਪਿਤਾ ਰਜਿੰਦਰ ਸਿੰਘ ਦੇ ਬਿਆਨ ’ਤੇ ਪੁਲਸ ਨੇ ਬੀਐਨਐਸ 173 ਅਧੀਨ ਕਾਰਵਾਈ ਕੀਤੀ ਹੈ। ਪੋਸਟਮਾਰਟਮ ਰਿਪੋਰਟ ਮੁਤਾਬਕ ਕੋਈ ਫਾਊਲ ਪਲੇਅ ਸਾਹਮਣੇ ਆਇਆ ਤਾਂ ਉਸ ਮੁਤਾਬਕ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।